Read cisena DEUTERONOMO 13 Bible Online

DEUTERONOMO 13 - cisena bible

DEUTERONOMO 13

¹“Mprofeti penu nyakuthumbusula ndoto anakwanisa kudumbira kuchita chakudodomesa penu chidzindikiro,

²towera kukubausani kuti mupembedze milungu inango yakuti chipo nee mudzati mwaipembedza tayu. Podi kwene kuti pinthu pyadumbira iyepyo pikwane-kwane,

³lekani kumvesera na pang'ono pene. MBUYA Mulungu wanu akumphatisa basa kukuyesani ngakhala imwe mumbamfuna MBUYA na mtimanu onsene.

⁴Tewerani MBUYA mbamumgopa; mvereni mbamukoya matongero ache; mpembedzeni mbamukhulupirike kuna iye.

⁵Kwache iphani nyakuthumbusula ndoto penu maprofeti onsene ambakupangani pyakupandukira MBUYA, ule adakupulumusani kudziko ya Iguputo kukhali imwe mabitchu kule. Munthu ninga weneyu ngwakuipa, pontho akuyesa kukubausani kuna makhaliro adakupangani MBUYA kuti mukhale nawo ale. Imwe mwathema kubulusa chakuipa ninga chenechi pakati panu.

⁶“Podi mbaleanu penu mwananu wamamuna penu wamkazi, penu mkazanu wapamtima, penu shamwalianu ponda ndipondembo ene anakwanisa kukunyengererani chibiso-biso kupembedza milungu inango, milungu yakuti chipo imwe nee makolo anu mudzati kuipembedza tayu,

⁷penu ikhale pyayo milungu ya anthu ambakhala chifupi na imwe, penu ya anthu ambakhala kutali na imwe ale.

⁸Lekani kuatawirisa kukunyengezani, penu kuavesera na pang'ono pene. Lekani kuakomera mtima penu kuavera nsisi, pontho lekani kuatchinjiriza.

⁹Apheni! Khalani akutoma kuaponyera miyala, kubuluka penepo anthu anango aaponyere miyala.

¹⁰Apheni na miyala! Iwo adayesa kukubausani kubuluka kuna MBUYA Mulungu wanu, adakupulumusani kudziko ya Iguputo kukhali imwe mabitchu kule.

¹¹Tenepo anthu a ku Aisraele onsene anapiva pidachitikapyo; natenepo iwo anachita mantha pontho nkhabeve mbodzi anachita chinthu chakuipa ninga chenechi tayu.

¹²“Ndzidzi unakhala imwe m'maluwani anakupasani MBUYA Mulungu wanu munakwanisa kuva

¹³kuti amuna anango akusowa basa a m'dzinza mwanu abausa anthu a muluwani mwawo kupembedza milungu inango yakuti chipo nee mudzati mwaipembedza tayu.

¹⁴Ngakhala imwe munava mbiri ninga yeneyi pivunzeni mwadidi mwene, tenepo ngakhala mphyakuona kuti chakuipachi chachitikadi,

¹⁵penepo apheni anthu onsene a muluwani yeneyo na pifuyo pyawo pene. Ivungeni luwaniyo monsene mwene.

¹⁶Gumanyisani pinthu pyonsene pya anthu ambakhala mwenemowo mbamupimuluke pakwecha kati na kati pa chintalo cha muluwaniyo. Tenepo pisani luwani na pyonsene ninga chakupereka kuna MBUYA Mulungu wanu. Iyo yathema kusanduka madembe kwenda na kwenda pontho mbikhonda dzamangwa pontho.

¹⁷Lekani kupikoyera chinthu na chibodzi chene chile chidathema kuvungika, penepo MBUYA analeka kukuzhangalirani mbakuverani nsisi. Iye anakukomerani mtima mbakuchitisani kukhala akuinjipa ninga mudadumbira iye kuna makolo anu,

¹⁸ngakhala munavera matongero ache onsene akupasani ine lerowa, mbamuchita pinafuna iye.