Read cisena DEUTERONOMO 14 Bible Online

DEUTERONOMO 14 - cisena bible

DEUTERONOMO 14

¹“Imwe ndimwe anthu a MBUYA Mulungu wanu. Tenepo mungasintili anyakufa, lekani kupitema mwekha ene penu kuchinga tsisi ninga mumbachitira anthu anango.

²Imwe ndimwe anthu a MBUYA Mulungu wanu; iye akusankhulani kuti mukhale anthu ache pakati pa anthu onsene a padziko yapansi ale.

³“Lekani kudya chinthu chonsene chokhonda chena pamaso pa Mulungu.

⁴Imwe munakwanisa kudya ng'ombe, mabira, mbuzi,

⁵mphoyo, ngoma, mbala, nyasa, mbidzi, penu mphalapala.

⁶Nyama zonsene zile zina njondo zakugawikana pontho zile zimbalukula.

⁷Lekani kudya nyama zokhonda khala na njondo zakugawikana na zokhonda kulukula. Imwe mukukhondeswa kudya nyama za ngamila, sulo, penu mbira. Izo zathema kuyeswa zokhonda chena; izo zimbalukula kwache nkhabe njondo zakugawikana.

⁸Lekani kudya nkhumba. Izo zathema kuyeswa zokhonda chena; izo zina njondo zakugawikana kwache nkhabe lukula tayu. Lekani kudya nyama zenezi penu na kukhuya kwene manungo awo zingafa.

⁹“Imwe munakwanisa kudya nsomba za mtundu onsene zakukhala na chitoto pontho mabade,

¹⁰mbwenye muleke kudya chinthu chonsene chakukhala m'madzi chakukhonda khala na chitoto pontho mabade; ipyo pyathema kuyeswa pyakukhonda chena.

¹¹“Imwe munakwanisa kudya mbalame zonsene zakuchena.

¹²Mbwenye imwe mukukhondeswa kudya mbalame za mtundu ufu: mphamba, dzidzi, gokomola, nyakasenera; tangwe, lezi, khungubwe; mphuwani; nkhukumadzi, magoti, chidokowe, vuwo-vuwo, mphipi;[9] nyachigoti pontho nyakalemwa-lemwa.

¹⁹“Pirombo ping'ono-ping'ono pyonsene pyakukhala na manthenga mphyokhonda chena; lekani kupidya.

²⁰Imwe munakwanisa kudya pyakumbuluka ping'ono-ping'ono pyakuchita kunumpha, thangwi mphyakuchena.

²¹“Lekani kudya nyama yakufa yokha. Alekeni alendo ambakhala pakati panu adye, penu munakwanisa kuzigulisa kuna alendo anango ene. Imwe ndimwe anthu a MBUYA Mulungu wanu; imwe ndimwe anthu ache. “Lekani kuphika mwanabira penu mwanambuzi kubodzi kwene na mkaka wa mache.

²²“Pambulani chakhumi cha pinthu pya kuminda kwanu chaka na chaka.

²³Tenepo ndokoni kumbuto ibodzi idasankhula MBUYA Mulungu wanu kuti ikhale yakupembedzerapo ile; penepo pamaso pa MBUYA idyani chakhumi cha mapiranu, vinyu na mafuta aolivi, ana akutoma kubalwa a ng'ombe na mabiranu. Chitani penepi towera imwe mukwanise kudziwa kugopa MBUYA Mulungu wanu ndzidzi onsene.

²⁴Ngakhala mbuto yakupembedzerapo ili kutali pyakwanga na misanu kuti imwe muthukule chakhumi cha pinthu pyanu pyakutsanzayisani na MBUYA kwenda kweneko, penepo chitani ipi:

²⁵Gulisani pinthupyo mbamuende na kobirizo kumbuto ibodzi yakupembedzerapo.

²⁶Ziphatiseni basa kobirizo papyonsene pinafuna imwe; nyama ya ng'ombe, mwana bira, vinyu na bwadwa. Tenepo imwe na mabanjanu mwathema kudya na kukomerwa pamaso pa MBUYA Mulungu wanu.

²⁷“Lekani taya Alevi ambakhala m'maluwani mwanu ale; iwo nkhabe pinthu pyawo pene tayu.

²⁸Kumala kwa chaka chachitatu chonsene mudze na chakhumi cha mbewu zanu zonsene mbamupikoye m'maluwani mwanu.

²⁹Phoso yeneyi nja Alevi podi iwo nkhabe pinthu pyawo pene tayu, pontho nja alendo, ana masiye na amamfelwa ambakhala m'maluwani mwanu ale. Iwo athema dzakwata pyonsene pinasowa iwo. Chitani penepi, tenepo MBUYA anakutsanzayisani papyonsene pinachita imwe.