Read cisena DEUTERONOMO 15 Bible Online

DEUTERONOMO 15 - cisena bible

DEUTERONOMO 15

¹“Kumala kwa chaka chachinomwe chonsene, imwe mwathema kufudza mangawa a anthu akufiyalini kobiri.

²Ipyo pyathema kuchitwa tenepa. Munthu onsene ule afiyali Muisraele mnzache iye athema kufudza mangawawo; iye hadatheme kumbwezesa kobirizo tayu; MBUYA mwenechiroache alonga kuti mangawa enewa afudzwe.

³Imwe munakwanisa kubwezesa mlendo akufiyalini pinthu ule, kwache lekani bwezesa pinthu pyakufiyalini munthu wa dzinzanu.

⁴“MBUYA Mulungu wanu anakutsanzayisani m'dziko inakupasani iyeyi. Nee na mbodzi ene wa imwe anatcherenga tayu

⁵ngakhala imwe munamvera mbamuchita mphole-mphole kuteweza pyonsene pinakupangani ine leropi.

⁶MBUYA anakutsanzayisani ninga mudadumbirira iye. Imwe munafiyalisa kobiri kuna madzinza azinji, kwache imwe nkhabe dzafiyali munthu na mbodzi ene tayu; imwe munakhala na utongi pana madzinza azinji, kwache nkhabe dzinza inafuna dzakhala na utongi pana imwe tayu.

⁷“Ngakhala ibodzi mwa maluwani m'dziko inakupasani MBUYA Mulungu wanu muna Muisraele mnzanu akusowa pinthu, penepo lekani khala anthu akupifuna mwekha ene mbamukhonda kumphedza.

⁸M'mbuto mwache khalani akufewa manja mbamufiyalisa pyonsene pinasowa iye.

⁹Lekani kumkhondera kumfiyalisa pinthu pyanu thangwi chaka chakufudza mangawa chili chifupi. Lekani khala na manyerezero akuipa ninga enewa mumtima mwanu. Ngakhala munakhonda kumfiyalisa iye analira kuna MBUYA, tenepo imwe munayeswa akudawa.

¹⁰Mpaseni mwakukhonda kumpagalisa pontho mwakukhonda kupifuna mwekha ene, tenepo MBUYA anakutsanzayisani papyonsene pinachita imwe.

¹¹Ndzidzi onsene panakhala Aisraele akutcherenga na akusowa, natenepo imwe ndikukutongani kuti muapase mwakufewa manja.

¹²“Ngakhala Muisraele mnzanu wamamuna penu wamkazi anapigulisa yekha ene[10] kuna imwe ninga bitchu mbakuphatirani basa pyaka pitanthatu, imwe mwathema kumsudzula chaka chachinomwe chingakwana kuti aende pyache.

¹³Kwache mungamsudzula, lekani kumgwinya kwawo chimanja-manja.

¹⁴Mpaseni mwakufewa manja kubulukira pa pinthu pyakutsanzayisani na MBUYA pile; mabira, mapira na vinyu.

¹⁵Kumbukani kuti imwe mukhalimbo mabitchu m'dziko ya Iguputo, tenepo MBUYA Mulungu wanu, adakusudzulani; ndi thangwi yache ndikukupasani matongerowa.

¹⁶“Kwache ngakhala bitchu wanu hanafuna pyakwenda tayu; thangwi ambakufunani, imwe na banjanu ene, pontho kuti pikumkomera kukhala namwe.

¹⁷Mtsamiriseni kumsuwo wa nyumbanu mbamumphola khutu na tchamfondo. Natenepo iye anakhala bitchu wanu ene moyo wache onsene. Chitani chibodzi-bodzi kuna bitchu wamkazi.

¹⁸Lekani kuona ninga chinthu chakupha kusudzula bitchu; mwenemo iye akuphatirani basa pyaka pitanthatu mbamumpagali theka ya kupagalwi kwa nyaganyo.[11] Chitani penepi, tenepo MBUYA anakutsanzayisani papyonsene pinachita imwe.

¹⁹“Mpambulireni MBUYA Mulungu wanu anamphulu na anabira onsene akutoma kubalwa; lekani kuziphatisa basa ng'ombe zenezi pontho lekani chinga ubweya wa mabira enewa.

²⁰Chaka na chaka imwe na mabanjanu mwathema kupidya pamaso pa MBUYA pambuto ibodzi yakupembedzerapo ile.

²¹Kwache ngakhala pana chinango chakudawika na nyamazo, ngakhala nsakulamala, penu nsakukhonda ona, penu zina chilema, imwe mukukhondeswa kuzipereka nsembe kuna MBUYA Mulungu wanu.

²²Imwe munakwanisa kudya nyama ninga zenezi m'misa mwanu. Munthu onsene wa imwe wakuchena, penu okhonda chena pamaso pa MBUYA, anakwanisa kudya nyama zenezi, ninga montho mumbadyera iye nyasa penu mphalapala.

²³Kwache lekani phatisa basa chiropa chawo ninga chakudya; m'mbuto mwache imwe mwathema kuchichusira pansi ninga madzi.