Read cisena DEUTERONOMO 16 Bible Online

DEUTERONOMO 16 - cisena bible

DEUTERONOMO 16

¹“Mulemedzeni MBUYA Mulungu wanu pakusekera Phwando ya Paska mwezi wa Abibu; ukhali mwezi wenewo udakubulusani iye m'dziko ya Iguputo na mosiku.

²Ndokoni kumbuto ibodzi yakupembedzerapo mbamucheke bira penu ng'ombe ya pa Phwando ya Paska kulemedza MBUYA Mulungu wanu.

³Ndzidzi unadya imwe pyakudya penepi, lekani kudya na mkate wakukhala na chakufufumisira. Thangwi nsiku zinomwe mukukhondeswa kudya mikate yakukhala na chakufufumisira ninga pidachitira imwe ndzidzi ukhabuluka imwe m'dziko ya Iguputo mwakuchimbiza. Idyani mikate yeneyi; iyo inachemerwa mikate yakusanyika, towera ndzidzi onsene unakhala imwe na moyo mukumbuke nsiku idabuluka imwe m'dziko ya Iguputo, m'dziko ya kusanyika.

⁴Thangwi nsiku zinomwe nee mbodzi wa imwe m'dziko mwanu athema kukhala na chakufufumisira mkate m'nyumba mwache tayu; pontho nyama yakuphiwa na mawulo a nsiku yakutoma yathema kudyiwa mosiku onthowo.

⁵“Iphani nyama za pa Phwando ya Paska pambuto ibodzi yakupembedzerapo, pontho nkhabe panango pene m'dzikomo panafuna kukupasani MBUYA Mulungu wanu tayu. Pichiteni pakuthobila dzuwa, ndzidzi wa nsiku idabuluka imwe m'dziko ya Iguputo ile.

⁷Terekani nyama mbamuidyere pambuto ibodzi yakupembedzerapo; tenepo mangwana mwache na machibese bwererani m'misa mwanu.

⁸Thangwi nsiku zinango zitanthatu imwe mwathema kudya mikate yakusowa chakufufumisira, tenepo pansiku yachinomwe gumanyikanani kupembedza MBUYA Mulungu wanu, pontho lekani phata basa pansiku yeneyo.

⁹“Lengesani madimingu manomwe kubulukira ndzidzi udatoma imwe kuvuna mapiranu,

¹⁰tenepo musekere Phwando ya Pyakuvuna kulemedza MBUYA Mulungu wanu pakumdzesera pyakupereka na kufuna kwanu malingana na kuinjipa kwa pinthu pyakutsanzasayisani iye napyo.

¹¹Komerwani pamaso pa MBUYA, pabodzi pene na ananu, anyabasanu, Alevi, alendo, ana masiye na amamfelwa ambakhala m'maluwani anu ale. Chitani penepi pambuto ibodzi yakupembedzerapo ile.

¹²Onesesani kuti mwavera matongero enewa; lekani duwalira kuti imwe mukhali mabitchu m'dziko ya Iguputo.

¹³“Mungamala kububuda mapira onsene, pontho kutchitchitha vinyu wanu, musekere Phwando ya Misasa nsiku zinomwe.

¹⁴Komerwani imwe pabodzi pene na ananu, anyabasanu, Alevi, alendo, ana masiye, na amamfelwa ene ambakhala m'maluwani mwanu ale.

¹⁵Mulemedzeni MBUYA Mulungu wanu pakusekera Phwando ya Misasayi nsiku zinomwe pambuto ibodzi yakupembedzerapo ile. Komerwani thangwi MBUYA atsanzayisa pyakuvuna pyanu na mabasanu ene.

¹⁶“Amuna onsene a dzinzanu athema kudzapembedza MBUYA katatu pachaka pambuto ibodzi yakupembedzerapoyi; pa Phwando ya Paska, Phwando ya Pyakuvuna na Phwando ya Misasa. Mamuna onsene athema kudza na mitukwa,

¹⁷ninga munakwanisira iye malingana na kuinjipa kwa pinthu pidamtsanzayisa na MBUYA Mulungu wanu.

¹⁸“Sankhulani anyakutonga miseru na mathubu muluwani yonsene inakupasani MBUYA Mulungu wanu. Anthu enewa athema kutonga miseru ya anthu mwakukhonda kuyang'ana nkhope.

¹⁹Iwo athema khala na chilungamo pontho aleke tonga mwakuyang'ana nkhope, aleke tawira kudyekerwa, thangwi mitukwa imbapha maso na nzeru za munthu pontho anthu akuona mtima ambachitiswa kutonga mwakusowa chilungamo.

²⁰Ndzidzi onsene khalani adidi pontho achilungamo, towera mukakwate dziko inakupasani MBUYA Mulungu wanuyi pontho kuti muthimize kukhala mwenemo.

²¹Mungasasanyira MBUYA Mulungu wanu guwa yansembe, lekani ikha m'khundu mwache dzimunthu wamuti wa milungu Ashera.

²²Pontho lekani kuimisa mwala kuupembedza ninga milungu inango; thangwi ine MBUYA Mulungu wanu ndimbazondana napyo.