Read cisena DEUTERONOMO 17 Bible Online

DEUTERONOMO 17 - cisena bible

DEUTERONOMO 17

¹“Lekani kupereka nsembe kuna MBUYA Mulungu wanu ng'ombe penu bira wakukhala na chilema; MBUYA ambazondana napyo penepi.

²“Tisangize kuti imwe mwava kuti muluwani yanu ibodzi mamuna penu mkazi unango adawira MBUYA pakuswa chiverano cha MBUYA

³pakupembedza na kutumikira milungu inango, penu dzuwa, mwezi, penu nyenyezi, pinthu pile mphyakupokanyisana na matongero a MBUYA.

⁴Ngakhala munava pinthu ninga penepi vunza-vunzani mwadidi. Ngakhala mphyakuona kuti chakuipa chenechi chachitikadi mu Israele,

⁵penepo ndokoni na munthuyo kunja kwa luwani mbamumphe na miyala.

⁶Kwache iye athema kuphiwa ngakhala pana mboni ziwiri penu zizinji zakupokanyisana naye; iye hadatheme kuphiwa tayu ngakhala pana mboni ibodzi ene basi.

⁷Mbonizo ndiye zathema kutoma kuponya miyala, kubuluka penepo anthu anangombowo anakwanisa kumponyera miyala; na njira yeneyi imwe munabulusa chakuipa pakati panu.

⁸“Pinakwanisika kuti muluwani mwanu panakhala miseru inango yakunensa kutonga ninga miseru yakukanganirana pinthu, penu kukuwazana, penu miseru yakusiyanisa pakati pa kupha munthu chadala penu mwasusudewu. Penepi pingachitika ndokoni kumbuto ibodzi yakupembedzerako idasankhula MBUYA Mulungu wanu ile,

⁹mbamulonga miseru yanuyo kuna anyansembe a Chilevi pontho na kuna nyakutonga mseru ule akuphata basa pandzidzi wenewo tenepo iwo anatonga mseruwo.

¹⁰Iwo anatonga mseruwo, penepo imwe mwathema kuchita ninga montho munakupangirani iwomo.

¹¹Tawirani kutonga kwawoko, pontho tewezani mwadidi mwene pinakupangani iwo kuti mupichite.

¹²Munthu onsene anawanga mtima kukhonda vera nyakutonga mseru penu nyansembe ali pabuswa ndzidzi wenewoyo athema kuphiwa; na njira yeneyi imwe munabulusa chakuipa ninga chenechi mu Israele.

¹³Penepo munthu onsene anava pya penepi mbachita mantha, tenepo nkhabeve munthu na mbodzi ene anawanga mtima kuchita pinthu ninga penepi tayu.

¹⁴“Mungamala kupokosera dziko pontho kukhazikika m'dziko inafuna kukupasani MBUYA Mulungu wanu mbamunyerezera kuti munafuna mfumu ninga mumbachitira madzinza onsene akuzungulirani ale,

¹⁵onesesani kuti munthu anasankhula imwe kukhala mfumu akhale munthu wakusankhulwa na MBUYA. Iye athema kukhala mbodzi wa anthu anu, lekani kuikha mlendo kukhala mfumu wanu.

¹⁶Mfumu aleke khala na akavalo azinji a nkhondo, pontho iye aleke tuma anthu kwenda ku Iguputo kagula akavalo,[12] thangwi MBUYA alonga kuti anthu ache aleke bwerera ku Iguputo.

¹⁷Mfumu aleke khala na akazi azinji, thangwi penepi pinamchitisa kubauka kubuluka kuna MBUYA; pontho iye aleke kupifumisa yekha ene na golidi na siliva.

¹⁸Iye angapita ufumu athema kulemba mwambowu mumpukutu wache ene kubulukira mumpukutu wakukoyiwa na anyansembe a Chilevi.

¹⁹Iye athema kukoya mpukutuwo chifupi na iye mbauwerenga moyo wache onsene; towera adziwe kulemedza MBUYA pontho kuvera mwakukhulupirika pyonsene pinalonga mwambo na matongerowo.

²⁰Penepi pinamchitisa kukhondesa kupinyerezera kuti iye ngwakufunika kupiringana Aisraele anzache, pontho kumchitisa kuvera matongero a MBUYA monsene mwene. Penepo iye anakhala mfumu pyaka pizinji pene pontho pidzukulu pyache pinatonga Israele mifendu mizinji.