Read cisena DEUTERONOMO 18 Bible Online

DEUTERONOMO 18 - cisena bible

DEUTERONOMO 18

¹“Dzinza ya Alevi, anyansembe ale, akhondeswa kutambira na khundu na ibodzi ene ya dziko ya Israele; m'mbuto mwache iwo athema kudya pyakuperekwa pontho nsembe zinango zakuperekwa kuna MBUYA.

²Iwo aleke khala na mbuto yawo ene ninga mumbachitira madzinza anango tayu; khundu yawo ntchidzo chakukhala anyansembe a MBUYA, ninga mudadumbira MBUYA kuna iwo.

³“Ndzidzi onsene unaperekwa nsembe za ng'ombe penu mabira, anyansembe athema kupaswa mwendo wakutsogolo, ntchabwada pontho chifu.

⁴Iwo athema kutambira khundu yakutoma ya mapira, vinyu, mafuta aolivi na ubweya wa mabira.

⁵MBUYA adasankhula kubulukira pa madzinzanu onsene dzinza ya Alevi kumtumikira ninga anyansembe kwenda na kwenda.

⁶“Mlevi onsene podi akhale pyache kupi mu Israele anakwanisa kudza kumbuto ibodzi yakupembedzerapo,

⁷penepo anakwanisa kutumikira ninga nyansembe wa MBUYA Mulungu wache, ninga mumbachitira Alevi anango ambatumikira penepo ale.

⁸Iye athema kutambira pyakudya sasawa ninga mumbachitira anyansembe, pontho anakwanisa kukoya pyonsene pinamtumizira banjache.

⁹“Mungadza m'dziko inakupasani MBUYA Mulungu wanuyi, lekani teweza makhaliro akunyansa a madzinza ambakhala mwenemo ale.

¹⁰Lekani pyereza ananu ninga nsembe; pontho anthu aleke kuombedza, penu kuloteswa, penu kukhumira, penu kuchita pyaufiti,

¹¹penu kulodza, pontho lekani kuatawirisa kuchita matsenga, penu kukhumira.

¹²MBUYA Mulungu wanu ambanyansirwa na anthu akuchita pinthu pyakuipa ninga penepi ale. Ndi thangwi yache iye akuthamangisa madzinza enewa m'dzikomo ndzidzi unaenda imwe.

¹³Khalani akukhulupirika monsene mwene kuna MBUYA.”

¹⁴Kubuluka penepo Mose adalonga mbati, “Anthu a m'dziko ina imwe chifupi kuipokoserayi ambaombedza pontho ambakhumira. Mbwenye MBUYA Mulungu wanu nkhabe tawirisa kuti muchite penepi tayu.

¹⁵M'mbuto mwache iye anakutumizirani mprofeti ninga ine wakubulukira pakati pa anthu anu onthowa, tenepo imwe mwathema kumvera.

¹⁶“Nsiku idagumanyikana imwe paphiri ya Sinai, imwe mudapempha kuti muleke kuva pontho fala ya MBUYA Mulungu wanu penu kuona pontho moto ukulu thangwi mukhagopesera kufa.

¹⁷Tenepo MBUYA adalonga kuna ine mbati, ‘Pyalonga iwo mphyadidi.

¹⁸Ine ndinaatumizira mprofeti ninga iwe wakubulukira pakati pa anthu awo onthowo; ine ndinampanga pyakuti alonge, tenepo iye anapanga anthu pyonsene pinatonga ine.

¹⁹Iye analonga na dzinanga, tenepo ine ndinatchunyusa munthu onsene okhonda kumvera.

²⁰Mbwenye ngakhala mprofeti anawanga mtima kulonga mphangwa na dzinanga ine ndingakhonda kumpanga kuti achite tenepo, iye athema kufa thangwi ya kuchita tenepo. Ntchibodzi-bodzi kuna mprofeti onsene ule ambalonga na dzina ya milungu inango.’

²¹“Munakwanisa kulonga mwekha ene kuti tinakwanisa tani kuzidziwa ngakhala mphangwa zinalonga mprofetizi nsakubulukira kuna MBUYA.

²²Ngakhala mprofeti analonga na dzina ya MBUYA pontho pinalonga iyepyo nkhabe kwana-kwana tayu, zenezo si mphangwa za MBUYA tayu. Mprofeti weneyo alonga na utongi wache ene, tenepo lekani kumgopa.