Read cisena DEUTERONOMO 19 Bible Online

DEUTERONOMO 19 - cisena bible

DEUTERONOMO 19

¹“MBUYA Mulungu angamala vunga anthu ale mbanachiro dziko inakupasani iye pontho mungamala kwata mizinda na nyumba pontho na kukhazikika mwenemo

²gawani dzikoyi khundu zitatu, khundu yonsene yakukhala na mzinda okhonda nensa kuufika. Tenepo munthu anapha mwanzacheyo anakwanisa kuthawira kuubodzi mwa mizinda yeneyo.

⁴Ngakhala munthu apha mwanzache mwasusudewu ule nee si nyamalwache tayu, anakwanisa kuthawira kumzinda ubodzi wa mizinda yeneyi mbakakhala pakupata.

⁵Tisangize tenepa, amuna awiri aenda mumsitu pabodzi pene katema miti; tenepo ngakhala mbodzi wa iwo akutema muti penepo mbadzo yangwirika mbipha munthu unango ule, iye anakwanisa kuthawira ku ubodzi wa mizinda itatuyi towera apulumuse moyo wache.

⁶Ngakhala pana mzinda ubodzi basi pontho nsinzo wakwenda kweneko ngukulu pyakwanga, tenepo mbaleache nyakuphiwayo, ule anafuna pyakubwezera anakwanisa kumphata mbapha munthu okhonda dawa na kuzhangali kwacheko; uku munthu adachita mwasusudewu kupha mwanzache ule si nyamalwache tayu.

⁷Ndi thangwi yache ndikukupangani kuti mupambule mizinda mitatu.

⁸“MBUYA Mulungu wanu angakulisa dziko yanu ninga mudapangira iye makolo anu mbakupasani dziko yonseneyo ninga mudadumbira iye

⁹penepo imwe mwathema kusankhula mizinda inango mitatu. Iye anakupasani dziko yeneyi ngakhala imwe munavera pyonsene pinakutongani ine leropi pontho ngakhala munamfuna MBUYA Mulungu wanu na kuteweza pifunziso pyache.

¹⁰Chitani penepi towera anthu okhonda dawa aleke kufa pontho kuti muleke konwa thangwi ya kuapha m'dziko inakupasani Mulunguyi.

¹¹“Mbwenye tisangize munthu achita pyaupandu kuna nyamalwache mbampha chadala, mbathawira kuubodzi wa mizinda ile,

¹²penepo akadamu a muluwani ya kwawo athema kumtumira mphangwa mbampereka kuna abale ache munthu adaphiwa ule, towera amphembo kubwezera kuphiwa kwa mbaleawo ule.

¹³Lekani kumvera nsisi. Bulusani mu Israele mphandu ninga zenezi towera pyonsene pikufambireni mwadidi.

¹⁴“Lekani kubulusa chidzindikiro cha madire a tsanthembanu chidakhazikiswa kale ene m'dziko inakupasani MBUYA Mulungu wanuyi.

¹⁵“Mboni ibodzi si yakukwana kuchitisa munthu wakuchita pyaupandu kukonwa tayu; mbwenye mboni ziwiri penu zitatu ndiye zathema kutsikimizira kuti munthu adawadi.

¹⁶Ngakhala munthu anayesa kukuwaza mwanzache kumpambizira kuti achita pyaupandu,

¹⁷uwiriawo athema kwenda kumbuto ibodzi yakupembedzerako kuti akatongwe mseru na anyansembe pontho na atongi akuphata basa pandzidzi wenewo.

¹⁸Atongi anauona mwadidi mseru wenewo; pontho ngakhala munthu apambizira Muisraele mnzache,

¹⁹iye athema kutchunyuswa ninga montho mukhafuna kutchunyusirwa nyakupambizirwayo. Na njira yeneyi imwe munabulusa chakuipa ninga chenechi.

²⁰Tenepo munthu unango onsene anava pyonsene pyachitikapyo, anachita mantha, tenepo nkhabeve mbodzi anachita chakuipa ninga chenechi tayu.

²¹Pinthu ninga penepi lekani kuva napyo nsisi; kutchunyuswa kwache kwathema kukhala moyo kubweza moyo, diso kubweza diso, dzino kubweza dzino, dzanja kubweza dzanja, dzinyalo kubweza dzinyalo.