Read cisena DEUTERONOMO 2 Bible Online

DEUTERONOMO 2 - cisena bible

DEUTERONOMO 2

¹“Pakumalisira pache, tidazungunuka mbatienda kuthando yatchetcha na njira yakwendera ku Nyanza Yakufira ninga mukhadatipangira MBUYA, tenepo tidamala ndzidzi ukulu ene kutsalakatika m'nthemba ya mapiri ya Edomu.

²“Tenepo MBUYA adatipanga,

³kuti tikhadamala ndzidzi ukulu ene na kutsalakatika m'mapiri enewo pontho kuti tidathema kwenda kumpoto.

⁴Iye adandipanga kuti ndikupaseni matongero awa: ‘Imwe mwasala chifupi kugwanda na m'nthemba ya mapiri ya Edomu, m'nthemba ya abale anu, pidzukulu pya Esau. Iwo anachita namwe mantha,

⁵kwache lekani chita nawo nkhondo, thangwi ine sinakupasani na thanyo ene ya mbuto yawo tayu. Ine ndapereka Edomu kuna pidzukulu pya Esau.

⁶Imwe munakwanisa kugula phoso na madzi kuna iwo.’

⁷“Kumbukani mule mwakutsanzayisirani MBUYA Mulungu wanu papyonsene pyachita imwe. Iye akuyang'anirani mwadidi ndzidzi ukhatsalakatika imwe m'thando ikulu yatchetchayi. Iye akhala namwe pyaka makumanayi, pontho pyonsene pikhasowa imwe mukhali napyo.

⁸“Tenepo tidathimiza kwenda m'tsogolo kugwanda na muluwani ya Seiri mukhakhala abale athu, pidzukulu pya Esau, mbatizungunuka kusiya njira yakwendera ku Nyanza ya Munyu kubulukira ku Elati na Ezioni-Geberi kwenda ku Moabu.

⁹MBUYA adalonga kuna ine mbati, ‘Lekani nensa anthu a ku Moabu penu kuchita nawo nkhondo. Ine ndaapasa mzinda wa Ari, pontho ine sinakupasani khundu na ibodzi ene ya dziko yawoyo tayu.’ ”

¹⁰Mtundu wa kujintcha wakuthulwa Aemimu ukhakhala ku Ari. Onsene akhali akulapha ninga Aanakimu, mtundu unango wa anthu akujintcha.

¹¹Ninga Aanakimu, iwo adadziwika pontho na dzina yakuti Arefaimu; mbwenye anthu a ku Moabu akhaathula Aemimu.

¹²Ahori akhakhala ku Edomu, kwache pidzukulu pya Esau adaathamangisa, adavunga dzinzawo mbakhazikika okha ene kweneko ninga mudachitira Aisraele kuthamangisa anyamalwawo m'dziko idaapasa MBUYA ile.

¹³Kubuluka penepo tidawambuka mkhwawa wa Zeredi ninga mukhadatipangira MBUYA kuti tichite.

¹⁴Penepi pidachitika pyaka makumatatu na pisere pidabuluka ife ku Kadeshi Barinea. Anyakumenya nkhondo onsene a mfendu wenewo adamala kufa ninga mudapilongera MBUYA.

¹⁵MBUYA adathimiza kuapokanya kufikirana adamala kuavunga onsene.

¹⁶“Pidamala iwo onsene kufa,

¹⁷MBUYA adalonga kuna ife mbati,

¹⁸‘Lero imwe mwathema kugwanda na m'nthemba ya Moabu na njira yakwendera ku Ari.

¹⁹Natenepo imwe munakhala chifupi na dziko ya Aamoni, pidzukulu pya Loti. Lekani kuanensa penu kuchita nawo nkhondo, thangwi sinakupasani mbuto na ibodzi ene ya dziko yawo yaapasa ine ile tayu.’ ”

²⁰Nthemba yeneyi ikudziwika pontho na dzina yakuti dziko ya Arefaimu, dzinza ya anthu akukhala kweneko ale; Aamoni akhaathula na dzina yakuti Azamzumimu.

²¹Iwo akhali anthu akulapha ninga Aanakimu. Iwo akhali azinji pyakwanga pontho akhali mtundu wamphamvu. Kwache MBUYA adaavunga, towera Aamoni akwate dziko yawo mbakhazikikamo.

²²MBUYA adachitira chibodzi-bodzi Aedomu, pidzukulu pya Esau, ambakhala m'nthemba ya mapiri ya Edomu ale. Iye adavunga Ahori, towera Aedomu akwate dziko yawo mbakhazikikamo, m'dziko inathimiza iwo kukhala ile.

²³Mbwenye kulonga pya Aavi adakhazikika m'midzi mpakana ku Gaza ale, Akrete akubulukira kuntchuwa ya Krete adaavunga mbakhazikika m'mbuto zawo.

²⁴“Pidamala ife kugwanda na m'nthemba ya Moabu, MBUYA adalonga kuna ife mbati, ‘Chinchino utomeni ulendo wakuwambuka mkulo wa Arinoni. Yang'anani, ndikuikha m'manja mwanu Mfumu Sihoni wa ku Heshiboni pabodzi pene na dziko yache. Menyani naye nkhondo mbamukwate dziko yacheyo.

²⁵Kutomera lero kwenda m'tsogolo ndinachitisa anthu onsene konsene kwene kukugopani. Munthu onsene anatetemera na mantha angathula dzinanu.’

²⁶“Kubuluka penepo ine ndidatuma anyamphangwa kubulukira kuthando yatchetcha ya Kedemoti kwenda kuna Mfumu Sihoni wa ku Heshiboni na mafala a mtendere akuti:

²⁷‘Titawiriseni kugwanda na m'dziko mwanu muno. Ife tinaenda pyathu na njira mbatikhonda na kubauka kwene kumadyo penu kumabzere.

²⁸Ife tinakupagalini phoso na madzi pinafuna ife phatisa basa. Chinafuna ife nkhugwanda kwene na m'dziko mwanu muno basi,

²⁹kufikirana tiwambuke mkulo wa Yorodani kwenda kudziko yatipasa MBUYA Mulungu wathu. Pidzukulu pya Esau pimbakhala mu Edomu pile, na Amoabu ambakhala mu Ari ale, adatitawirisa kugwanda na m'nthemba mwawo.’

³⁰“Mbwenye Mfumu Sihoni hadatitawirise tayu kugwanda na m'dziko mwache. MBUYA Mulungu wanu akhadamchitisa kuumisa mtimache, pontho kukhala nyakupandukira, towera tikwanise kumkunda mbatikwata nthembache, inathimiza ife kukhalamo.

³¹“Kubuluka penepo MBUYA adalonga kuna ine mbati, ‘Yang'ana, ndachitisa Mfumu Sihoni na dziko yache ene kukhala yakusowa mphamvu pamaso panu; tenepo ikwateni dzikoyo kuti ikhale yanu ene.’

³²Sihoni adabuluka na amunache onsene dzachita nafe nkhondo chifupi na luwani ya Yahazi,

³³kwache MBUYA Mulungu wathu adamuikha m'manja mwathu mbatimpha, anache achimuna na amunache onsene.

³⁴Na ndzidzi onthowo tidakwata maluwani ache onsene mbatipha munthu onsene, amuna, akazi na ana ene. Nkhabe munthu adasiya ife na moyo tayu.

³⁵Tidakwata pifuyo pyawo na pyonsene pikhali m'maluwani mwawomo.

³⁶MBUYA Mulungu wathu adatitawirisa kupokosera maluwani onsene kutomera ku Aroeri, nkhomole ya phedi ya Arinoni, na mzinda wa pakati pa phediyo, kwenderatu ku Gileadi. Nkhabe luwani ikhali na mafufu akuwanga pyakwanga kuna ife tayu.

³⁷Kwache hatidende tayu chifupi na nthemba ya Aamoni penu m'magombe a mkulo wa Yaboki penu kumaluwani a m'nthemba ya mapiri penu na mbuto na ibodzi ene idatipanga MBUYA kuti tileke kwendako.