Read cisena DEUTERONOMO 20 Bible Online

DEUTERONOMO 20 - cisena bible

DEUTERONOMO 20

¹“Ngakhala munaenda kamenya nkhondo na anyamalwanu mbamuona pingolo na akavalo pontho anyankhondo akuinjipa kupiringana anu, lekani chita nawo mantha. MBUYA Mulungu wanu ule adakupulumusani kukubulusani m'dziko ya Iguputo anakhala namwe.

²Imwe mbamudzati kumenya nkhondo, nyansembe athema kupita patsogolo mbalonga kuna anyankhondo mbati,

³‘Amuna a ku Israele veserani kuno! Lero mukwenda kamenya nkhondo. Lekani chita mantha na anyamalwanu penu kutaya mtima penu kukhala pampani-pani.

⁴MBUYA Mulungu wanu anakhala namwe tenepo iye anakuchitisani kukunda.’

⁵“Tenepo akadamu analonga kuna amuna kuti, ‘Ayi pana mamuna unango pano ule amalisa kwene kumanga nyumba mbakhonda kuichitisa kukhala yakupambulika? Ngakhala pili tenepo iye athema kwenda pyache m'mudzi gopesera iye angaphiwa pankhondo munthu unango anaichitisa nyumbacheyo kukhala yakupambulika.

⁶Ayi pana unango pano ule abzala kwene munda wamfesa mbakhonda tchola mfesazo? Ngakhala pili tenepo iye athema kwenda pyache m'mudzi, gopesera iye angaphiwa pankhondo munthu unango anasala mbakomerwa na mfesazo.

⁷Ayi pana unango pano ule avunzira kwene? Ngakhala pili tenepo iye athema kwenda pyache m'mudzi, gopesera iye anaphiwa pankhondo munthu unango mbasemba mkazi adavunzira iye kwene ule.’

⁸“Penepo akadamu ale analonga pontho kuna amuna ale kuti, ‘Ayi pana unango pano ataya mtima pontho akuchita mantha? Ngakhala pili tenepo iye athema kwenda pyache m'mudzi, gopesera anachitisambo anangowo kutaya mtima.’

⁹Akadamu angamala kulonga kuna anyankhondo ale, pagulu yonsene mkadamu athema kusankhulwa.

¹⁰Mungaenda kasosa mzinda, chakutoma pasani mwayi anthu a mumzindamo kuimisa manja.

¹¹Ngakhala iwo anafungula misuwo ya mpanda mbaimisa manja, penepo iwo athema kukhala mabitchu anu mbakhakhamizwa kukuphatirani basa.

¹²Mbwenye ngakhala anthu a mumzindawo hanaimisa manja tayu, mbasankhula kumenyana namwe, penepo zungulirani mzindawo na anyankhondo anu.

¹³Tenepo MBUYA Mulungu wanu angakutawirisani kukwata mzindawo, iphani amuna onsene mwenemo.

¹⁴Kwache imwe munakwanisa kupikwatira mwekha ene ana, akazi, pifuyo, na pinthu pyonsene mumzindamo. Imwe munakwanisa kuphatisa basa pinthu pyonsene pya anyamalwanu. MBUYA Mulungu wanu ndiye akupasani penepi.

¹⁵Mwenemo ndiye mwathema imwe kuchita na mizinda ili kutali na dziko inafuna imwe khazikikamo ile.

¹⁶“Kwache mungasosa mizinda ya m'dziko inakupasani MBUYA Mulungu wanuyi, iphani munthu onsene.

¹⁷Vungani anthu onsene monsene mwene: Ahiti, Aamori, Akanani, Aperizi, Ahivi, na Ayebusi ninga mudakupangirani MBUYA.

¹⁸Apheni towera aleke kukuchitisani kudawira MBUYA pakukufunzisani kuchita pinthu pyonsene pyakuchitisa manyadzo pimbachita iwo pandzidzi umbapembedza iwo milungu yawo pile.

¹⁹“Mungafuna kupokosera mzinda lekani kugwanda miti ya nsapo, podi kwene kuti nkhondo ikwate ndzidzi ukulu ene. Idyani nsapo, kwache lekani vunga miti yache; mitiyo si anyamalwanu tayu.

²⁰Imwe munakwanisa kugwisa miti inango mbamuiphatisa basa kugomolera mpanda kufikirana mzindawo wapokoswa.