Read cisena DEUTERONOMO 21 Bible Online

DEUTERONOMO 21 - cisena bible

DEUTERONOMO 21

¹“Tisangize kuti munthu agumanwa aphiwa m'munda m'dziko inafuna kukupasani MBUYA Mulungu wanu, mwenemo imwe nkhabe dziwa munthu adamphayo tayu,

²akadamu na anyakutonga miseru anu athema kwenda kweneko kapima nsinzo wa pakati pa mbuto idagumanwa mtembo na luwani yonsene ili chifupi.

³Tenepo akadamu a muluwani ya chifupiletu na mbuto idagumanwa mtembowo athema kusankhula mwanamphulu ule chipo hadzati phatiswa basa tayu.

⁴Iwo athema kutchithira naye kumbuto ya chifupi na mkulo ule chipo hudzati kupwa tayu pontho kule chipo kudzati limwa penu kubzalwa tayu, penepo iwo athema kwenda kamkhumula khosi.

⁵Anyansembe a Chilevi athema kwendambo kweneko, thangwi iwo athema kutonga mseru onsene wa upandu. MBUYA Mulungu wanu aasankhula kumtumikira pontho kutsanzayisa anthu na dzinache.

⁶Kubuluka penepo akadamu onsene a muluwani ya chifupiletu na mbuto idagumanwa mtembo ule athema kusamba m'manja pana ng'ombe ile mbalonga mbati,

⁷‘Ife hatidaphe munthuyu tayu, pontho ife nkhabe dziwa munthu adachita penepi tayu.

⁸MBUYA lekererani anthu anu a Israele, adapulumusa imwe kuabulusa ku Iguputo ale. Tilekerereni pontho lekani kutionesa nyatwa thangwi ya kufa kwa munthu okhonda dawa ule.’

⁹Tenepo pakuchita pinthu pinafuna MBUYA, imwe nkhabe dzaona nyatwa thangwi ya kuphiwa kwa munthuyo tayu.

¹⁰“MBUYA Mulungu wanu angakuchitisani kukunda pankhondo mbamukwata anyaperezo,

¹¹ngakhala munaona pakati pawo mkazi wakubalika mwakuti mwamfuna kuti akhale mkazanu munakwanisa kumkwata.

¹²Idzani naye kumusa kwanu, mpaleni mpala[13] pontho mmengeni ngole zache,

¹³pontho achinje nguwo zache zidavala iye ndzidzi udaphatwa iye. Angamala mwezi wa mumphu m'nyumba mwanu akusintili babache na mache, penepo imwe mwathema kwenda kuna iye kakhala mamunache iyembo mbakhala mkazanu.

¹⁴Ngakhala imwe munamfunave tayu, imwe mwathema kumsudzula mbaenda pyache konsene kwene kunafuna iye. Lekani kumgulisa penu kumphatisa basa ninga bitchu, thangwi imwe mudamululupisa.

¹⁵“Tisangize mamuna ana akazi awiri, tenepo onsene uwiriawo abala naye ana achimuna, kwache mwana wautombo si mwana wa mkazache wapamtima pache tayu.

¹⁶Iye anganyerezera pya kugawa mfumache pakati pa anache, iye aleke siyanisa na mwana wa mkazache wapamtima pache ule pakumpasa khundu idathema mwanache wautombo kutambira.

¹⁷Iye athema kupereka khundu yakuinjipa kawiri ya mfumache kuna mwanache wautombo podi kwene kuti si mwana wa mkazache wapamtima pache ule tayu. Iye athema kudzindikira chidzo cha mwanache wautombo pakumpasa khundu yathema iye kutambira.

¹⁸“Tisangize munthu ana mwana wamamuna ule ngwakukula mtima pontho wakupandukira ule nkhabe vera makolo ache podi kwene kuti makolo ache ambamtchunyusa,

¹⁹makolo ache athema kwenda naye kuna akadamu a luwani imbakhala iyeyo kuti akatongwe mseru.

²⁰Iwo athema kulonga kuna iwo mbati, ‘Mwanathuyi ngwakukula mtima pontho wakupandukira, iye nkhabe kutivera tayu; iye ambavunga kobiri pontho ndi dombe.’

²¹Amuna a muluwani athema kumpha na miyala tenepo imwe munabulusa chinthu chakuipa ninga chenechi. Munthu onsene mu Israele anava pinthu pyachitikapi mbachita mantha.

²²“Ngakhala munthu aphiwa thangwi ya kuchita pyaupandu pontho mtembo wache wamanikwa pamuti,

²³mtembo wache nee wathema kugona penepo tayu. Iwo wathema kuikhwa m'masiye nsiku yonthoyo thangwi mtembo wakumanikwa pa muti umbachitisa dziko kutembererwa na Mulungu. Fikhirani mtembowo towera muleke swipisa dziko inakupasani MBUYA Mulungu wanuyi.