Read cisena DEUTERONOMO 22 Bible Online

DEUTERONOMO 22 - cisena bible

DEUTERONOMO 22

¹“Ngakhala munaona ng'ombe penu bira wa Muisraele mnzanu atayika lekani kumsiya kwene, mbwezeni kuna mwenechiro.

²Mbwenye ngakhala mwenechiroache ambakhala kutali pyakwanga penu ngakhala imwe nkhabe kumdziwa mwenechiroache, penepo ndokoni naye pyanu kumusa kwanu. Mwenechiroache angabwera kumsaka, imwe mwathema kumpasa.

³Chitani chibodzi-bodzi mungagumana bulu, nguwo penu chinthu chonsene chinataya mwanzanu.

⁴“Ngakhala ng'ombe penu bulu wa mwanzanu agwa, lekani kumuleka kwene, mphedzeni kulamusa biracheyo.

⁵“Akazi mbaleke kuvala nguwo zachimuna, amunambo mbaleke kuvala nguwo zachikazi; MBUYA Mulungu wanu ambanyansirwa na anthu akuchita pinthu ninga penepi.

⁶“Ngakhala munagumana chisa cha mbalame m'muti penu pansi muna mbalame yakhalira mazayi ache penu ina anache penepo lekani kukwata mawoyo.

⁷Imwe munakwanisa kukwata anawo mbamuleka mawoyo kwenda pyache, towera mukhale na moyo wakulapha pontho kuti pinthu pyanu pikufambireni mwadidi.

⁸“Mungamanga nyumba itswa onesesani kuti mwaikha chakutchingira m'khundu-khundu mwa nsoyi, towera muleke dzaona nyatwa munthu unango angagwa mbafa.

⁹“Lekani bzala mbewu za mitundu miwiri m'mundanu wamfesa; ngakhala munachita tenepo pyakuvuna pyakubulukira kuna mbewu zidabzala imwe na mfesa zene pinakhala pyakukhondeswa kuna imwe.

¹⁰“Lekani limisa ng'ombe yakumangirwa goli pabodzi pene na bulu.

¹¹“Lekani vala nguwo yakulukwa na ubweya wa bira pabodzi pene na thonje.

¹²“Sonerani mavulere pankhomo zinayi za nguwo zanu.

¹³“Tisangize mamuna asemba mtsikana, m'nduli mwache iye anyerezera kuti hanamfunave mkazi ule tayu,

¹⁴penepo iye akupambizira mkaziyo kuti iye akhali mkazi wakudziwa kale mamuna ndzidzi ukhadamsemba iye.

¹⁵“Ngakhala penepi pinachitika, makolo a mkaziyo athema kukwata nguwo yamathotho a chiropa ikhadavala mkaziyo pansiku yakukazhali kuonesa kuti iye akhali mwali okhonda dziwa mamuna, pontho iwo athema kapionesa akadamu a muluwani m'thando ya miseru.

¹⁶Babache mkaziyo analonga kuna iwo kuti, ‘Ine ndidasembesa mwananga kuna mamunayi, tenepo iye chinchino nkhabe kumfunave tayu.

¹⁷Iye ampambizira pakulonga kuti iye akhali mkazi wakudziwa kale mamuna ndzidzi ukhamsemba iye. Apo ngayang'anani chitsikimizo chakuti iye akhali mwali okhonda dziwa mamuna; ngayang'anani mathotho a chiropa panguwo zikhadagonera iwo pansiku idakazhali iwo.’

¹⁸Penepo akadamu a muluwaniyo athema kukwata mamunayo mbammenya.

¹⁹Iwo athema kumpagalisa kobiri zasiliva dzana ibodzi mbapereka kobirizo kuna babache mkaziyo thangwi mamunayo alulupisa mkazi wa Chiisraele. Kuthimiza penepo iye anathimiza basi kukhala mkazache, tenepo iye nkhabe kumuleka tayu moyo wache onsene.

²⁰“Kwache ngakhala pinalonga mamunayo mphyakuona, pontho nkhabe chitsikimizo chakuti mkaziyo akhali mwali okhonda dziwa mamuna,

²¹penepo iwo athema kwenda naye kumsuwo wa nyumba ya babache kule kwathema amuna a mumzindawo kumpha na miyala. Iye achita chinthu chakuchitisa manyadzo pakati pa anthu athu pakugonana na mamuna iye mbadzati sembwa, mwenemo iye mbali m'nyumba ya babache. Na njira yeneyi imwe munabulusa chakuipa ninga chenechi.

²²“Ngakhala mamuna anaphatwa akuchita uputa na mkazi wa munthu unango, onsene uwiriawo athema kuphiwa. Na njira yeneyi imwe munabulusa chakuipa ninga chenechi.

²³“Tisangize mamuna aphatwa muluwani akuchita uputa na mtsikana ule avunzirwa kale na munthu unango,

²⁴penepo imwe mwathema kuabulusira kunja kwa luwani onsene uwiriawo mbamuaphe na miyala. Mtsikanayo athema kuphiwa thangwi iye hadakhuwe tayu kuti anthu amphedze, podi kwene kuti iye akhali muluwani mwakuti mbadakwanisa kuviwa. Tenepo mamuna athema kuphiwa thangwi adachita uputa na mkazi wakuvunzirwa kale. Na njira yeneyi imwe munabulusa chakuipa ninga chenechi.

²⁵“Tisangize mamuna aphatirira mtsikana wakuvunzirwa kale na munthu unango, kunja kuminda, mamuna yekha ndiye athema kuphiwa;

²⁶penepo nkhabe chinafuna kuchitwa kuna mtsikana ule, thangwi iye hadachite chinthu chakuthema kuphiwa nacho tayu. Mbwenye mamunayo athema kuphiwa. Mseru wenewu ndi sasawa na munthu wakuphata mwanzache mbampha,

²⁷thangwi munthu adaphatirira mtsikana wakuvunzirwa ule, kunja kuminda, pontho podi kwene kuti mtsikanayo adakhuwa kuti anthu amphedze, mbwenye pakhali nkhabe munthu unango wakumpulumusa tayu.

²⁸“Tisangize munthu aphatwa akuphatirira mtsikana ule hadavunzirwe tayu.

²⁹Penepo mamunayo athema kupagali babache mkazi champhete, kobiri zasiliva makumashanu, pontho iye athema kukhala mkazache thangwi iye adamkhakhamiza kugona naye. Iye nkhabe kwanisa kumwalana naye tayu moyo wache onsene.

³⁰“Nkhabe munthu athema kululupisa babache pakuchita uputa na mbodzi wa akazi a babache tayu.