Read cisena DEUTERONOMO 23 Bible Online

DEUTERONOMO 23 - cisena bible

DEUTERONOMO 23

¹“Nee mamuna wakukapalwi penu wakugwandwa chimuna chonsene athema kukhala nawo pakati pa anthu a Mulungu tayu.

²“Nee munthu wakubalwa kudzera mu uputa penu chidzukulu cha munthu ninga weneyu podi na mfendu wachikhumi ene athema kukhala nawo pakati pa anthu a Mulungu tayu.

³“Nee munthu wa Chiamoni penu wa Chimoabu, penu na pidzukulu pyawo pene podi na mfendu wachikhumi ene, athema kukhala pakati pa anthu a Mulungu tayu.

⁴Iwo adakhonda kukupasani pyakudya na madzi ndzidzi ukhabuluka imwe kudziko ya Iguputo, tenepo iwo adalemba ganyo Balamu mwana Beori wa kumzinda wa Petori kudziko ya Mesopotamia kukutembererani.

⁵Kwache MBUYA Mulungu wanu hadamvesere Balamu tayu, m'mbuto mwache adasanduza kutemberera kukhala mtsanzayiso thangwi iye adakufunani.

⁶Ndzidzi onsene unakhala imwe na moyo, lekani chita chinthu na chibodzi chene kuphedza madzinza enewa penu kuchitisa pinthu pyawo kuafambira mwadidi.

⁷“Lekani khonda Aedomu, iwo mbabale anu, pontho lekani khonda Aiguputo thangwi ndzidzi unango imwe mudakhala m'dziko mwawo.

⁸Kubulukira mfendu wachitatu kwenda m'tsogolo pidzukulu pyawo pyathema kukhala nawo pakati pa anthu a MBUYA.

⁹“Ngakhala mukukhala mumsasa pandzidzi wa nkhondo imwe mwathema kuthunda chinthu chonsene chile chinakwanisa kukuswipisani pamaso pa MBUYA.

¹⁰Ngakhala munthu anapiswipisa thangwi mosiku pidalota iye adabuluka umuna, iye athema kwenda kunja kwa mzinda mbakakhala kweneko.

¹¹Mawulo angakwana iye athema kusamba tenepo dzuwa ingathobila anakwanisa kubwerera kumsasako.

¹²“Imwe mwathema kukhala na mbuto kunja kwa msasa kule kunakwanisa imwe kwenda kachita chumbudzu.

¹³Kwatani ndodo ninga chibodzi cha pida pyanu, towera mukwanise kutchokhola dzenje ngakhala m'mimba mwavunduka, mungamala penepo fikhirani.

¹⁴Chitisani msasanu kukhala wakuchena thangwi MBUYA Mulungu wanu ali namwe pamsasapo kukutchinjirizani pontho kukuchitisani kukunda anyamalwanu. Lekani chita chinthu chakunyansa chile chinakwanisa kuchitisa MBUYA kukupasani nkhodolo.

¹⁵“Ngakhala bitchu anathawa mbuyache mbadza kuna imwe kuti atchinjirizwe, lekani kumpereka kuna mbuyache.

¹⁶Iye anakwanisa kukhala luwani yonsene inasankhula iye, tenepo lekani kumchitira vinga.

¹⁷“Nee Muisraele, mamuna penu mkazi athema kusanduka puta wa m'nyumba yakupembedzeramo milungu inango tayu.

¹⁸Pontho kobiri zakugumanwa kudzera na njira yeneyi nee zathema kudzeswa kunyumba ya MBUYA Mulungu wanu kuchitisa kudumbira kukwana-kwana tayu, MBUYA Mulungu wanu ambanyansirwa napyo.

¹⁹“Mungafiyalisa kobiri penu pyakudya penu chinthu chinango chene kuna Muisraele mnzanu lekani kumpagalisa na pyakuthimizirapo.

²⁰Imwe munakwanisa kupagalisa pyakuthimizirapo mlendo, kwache nee pidafiyalisa imwe Muisraele mnzanu tayu. Verani matongero enewa, tenepo MBUYA Mulungu wanu anatsanzayisa pyonsene pinachita imwe m'dziko inafuna imwe dzapokosera ile.

²¹“Mungadumbira kuna MBUYA Mulungu wanu, lekani dembuka kuchita pidadumbira imwe pile MBUYA anakuvunzani pya kudumbira kwanuko, nkhudawa kukhonda chita pidadumbira imwepyo.

²²Kukhonda dumbira kuna MBUYA si kudawa tayu;

²³kwache ngakhala unadumbira kuna MBUYA Mulungu wako na kufuna kwako, onesesa kuti wachita pidalonga iwe na mulomo wako.

²⁴“Mungagwanda na njira ya m'munda wamfesa wa munthu unango, imwe munakwanisa kudya mfesazo ninga munafunira imwe kwache lekani kuikha zinango m'budu.

²⁵Mungagwanda na njira ya m'munda wa mapira wa munthu unango, imwe munakwanisa kunununa, kwache lekani gwanda mapira na chikwakwa.