Read cisena DEUTERONOMO 24 Bible Online

DEUTERONOMO 24 - cisena bible

DEUTERONOMO 24

¹“Tisangize mamuna asemba mkazi m'nduli mwache anyerezera kuti hanamfunave tayu, thangwi agumana chinthu chinango muna iye chakukhonda kumkomera,[14] penepo iye akulemba kalata yakumwalana ninga msiku mbampasa, kubuluka penepo mbamgwinya kwawo.

²Tenepo tisangize mkazi ule asembwa na mamuna unango

³mamuna weneyo mbanyerezerambo kuti hanamfunave tayu mkazi ule, tenepo iye alemba kalata yakumwalanako mbampasa, kubuluka penepo mbamgwinya kwawo. Penu tisangize kuti mamunache wachiwiri ule afa.

⁴Penu na kutani kwene mamunache wakutoma ule aleke kumsemba pontho; kuna iye mkazi ule asanduka okhonda chena pamaso pa Mulungu. Ngakhala anamsemba pontho, penepo akudawira MBUYA. Lekani chita chakudawa chakugoswa ninga chenechi m'dziko inafuna kukupasani MBUYA Mulungu wanu.

⁵“Ngakhala mamuna asemba kwene chinchino iye aleke kupita basa ya unyankhondo, penu kupaswa basa inango ene; iye athema khala kwene chaka chamumphu nee kupaswa basa inango tayu, towera akwanise kukhala pamsuwo pache mbachitisa mkazache kukomerwa.[15]

⁶“Ngakhala munabwerekesa munthu unango chinthu imwe nee mwathema kukwata pinyolo libwe yache tayu. Kweneku nkhukwata chinthu chakumphedza pa moyo wache.

⁷“Ngakhala munthu anaba Muisraele mnzache mbamchitisa kukhala bitchu penu kumgulisa ninga bitchu, munthuyo athema kuphiwa. Na njira yeneyi imwe munabulusa chakuipa ninga chenechi.

⁸“Ngakhala muna matanya onesesani kuti mukuchita pyonsene pinakupangani anyansembe a Chilevi; imwe mwathema kuchita mphole-mphole kuteweza pinthu pyakupangani inepi.

⁹Kumbukani pidachita MBUYA Mulungu wanu kuna Miriamu pikhabulukira imwe ku Iguputo.

¹⁰“Mungabwerekesa chinthu munthu unango, lekani pita m'nyumba mwache kakwata pinyolo chakufinika chache chikhafuna iye kukupasani;

¹¹dikhirani panja kuti iye abwere nacho yekha ene.

¹²Ngakhala iye ngwakutcherenga lekani kagona nacho kwanu.

¹³Kachibwezereni kuna mwenechiroache mawulo onsene, towera akwanise kuona chakufinika. Penepo iye anapereka takhuta kuna imwe, pontho MBUYA Mulungu wanu anakomerwa namwe.

¹⁴“Lekani dyera nkope-kope nyaganyo wakutcherenga penu wakusowa, penu iye akhale Muisraele penu mlendo wakukhala muluwani ibodzi ya maluwani anu.

¹⁵Nsiku yonsene dzuwa mbidzati thobila mpagalini pyaphatira iye basa nsiku yeneyo, thangwi iye ngwakutcherenga pontho pananyindira iye mphenepo pene. Ngakhala nee munampagali tayu, iye anakulirirani kuna MBUYA, penepo imwe munadawa.

¹⁶“Makolo aleke kuphiwa thangwi ya kudawa kumbachita anawo, penu ana kuphiwa thangwi ya kudawa kumbachita makolo awo; munthu athema kuphiwa thangwi ya kudawa kumbachita iye yekha ene.

¹⁷“Lekani bera alendo pontho ana masiye chidzo chawo; lekani kwata pinyolo chakufinika cha mamfelwa wa pinthu pidafiyali iye kuna imwe.

¹⁸Kumbukani kuti imwe mukhali mabitchu ku Iguputo pontho kuti MBUYA Mulungu wanu adakusudzulani pa ubitchu; ndi thangwi yache ndakupasani matongero enewa.

¹⁹“Ngakhala munavuna mbewu zanu mbamuchimwana kututa zonsene lekani bwerera kakwata pontho pyakusalirapyo; ipyo pyathema kukhala pya alendo, ana masiye na amamfelwa, towera MBUYA Mulungu wanu akutsanzayiseni papyonsene pimbachita imwe.

²⁰Mungatchola nsapo zanu zaolivi kabodzi; lekani kachita nyabwereza kuvuna zidasalira zile, ipyo pyathema kusiyirwa alendo, ana masiye na amamfelwa.

²¹Mungatuta mfesa zanu kabodzi lekani kwendako pontho kuchita nyambwereza, izo zathema kukhala za alendo, ana masiye na amamfelwa.

²²Lekani duwalira kuti imwe mukhali mabitchu m'dziko ya Iguputo; ndi thangwi yache ndakupasani matongero enewa.