Read cisena DEUTERONOMO 26 Bible Online

DEUTERONOMO 26 - cisena bible

DEUTERONOMO 26

¹“Mungamala kwata dzikoyi kukhala yanu ene, dziko inakupasani MBUYA Mulungu wanuyi mbamukhala m'dzikomo,

²munthu onsene wa imwe athema kukwatira m'chitundu khundu yakutoma ya mbewu yonsene inavuna imwe mbamuende nayo kumbuto ibodzi yakupembedzerapo ile.

³Ndokoni kuna nyansembe ali pabasa ndzidzi wenewo mbamulonga kuna iye kuti, ‘Lero ndikutawira kuna MBUYA Mulungu wanga kuti ndapita m'dziko idadumbira MBUYA kuna makolo athu ile.’

⁴“Nyansembe ule anakwata chitundu kuna iwe mbachiikha patsogolo pa guwa yansembe ya MBUYA Mulungu wako.

⁵Penepo pamaso pa MBUYA ulonge mafala awa: ‘Kholo yanga akhali Muaramu manzenza, ule adakwata banjache mbakakhala kudziko ya Iguputo. Iwo akhali akuchepa ndzidzi ukhaenda iwo kweneko, kwache iwo adasanduka dzinza ikulu pontho ya mphamvu.

⁶Aiguputo adatichitira vinga mbatikhakhamiza kuphata basa ninga mabitchu.

⁷Tenepo ife tidalira kuna MBUYA Mulungu wa makolo athu kuti atiphedze. Iye adativa mbaona kusanyika kwathu, nyatwa zathu na kutsukwala kwathu.

⁸Na mphamvu zache zikulu iye adatipulumusa kubuluka mu Iguputo. Iye adachita pidzindikiro na pyakudodomesa mbachitisa kuti pinthu pyakugoswa pichitike.

⁹Iye adatidzesa kuno mbatipasa dziko yamphonjeyi.

¹⁰Natenepo chinchino ndikudza kuna MBUYA na khundu yakutoma ya pyakuvuna pyandipasa iye.’ “Kubuluka penepo tchithisa chitundu pamaso pa MBUYA mbamumpembedze penepo.

¹¹Komerwani thangwi ya pinthu pyakupasani MBUYA Mulungu wanu imwe na banjanu; pontho Alevi na alendo ambakhala pakati panu ale asekerembo namwe pabodzi.

¹²“Chaka chachitatu chonsene perekani chakhumi cha mbewu zanu kuna Alevi, alendo, ana masiye na amamfelwa, towera m'banja monsene iwo akhale na pyakudya pinasowa iwo. Imwe mungachita penepi

¹³longani kuna MBUYA kuti, ‘Nkhabe chakhumi na chibodzi chene chasalira m'nyumba mwanga tayu. Ine ndachipereka kuna Alevi, alendo, ana masiye na amamfelwa ninga mudanditongera imwe kuchita. Ine sidakhonde kuvera penu kuduwalira matongero anu akulonga pya chakhumi tayu.

¹⁴Ine sidadye na chibodzi chene tayu ndzidzi ukhasintili ine. Ine sidapambule chinthu na chibodzi chene tayu ndzidzi ukhali ine okhonda chena; nee sidapereke khundu inango kuna anyakufa tayu. Ine ndakuverani MBUYA; ine ndachita pyonsene pya chakhumi pidanditonga imwe pile.

¹⁵Yang'anani pansi kubulukira kumbuto yanu yakuchena kudzulu mbamutsanzayise anthu anu a Israele; tsanzayisani dziko yamphonjeyi ninga mudadumbira imwe kuna makolo athu.’

¹⁶“Lero MBUYA Mulungu wanu akukupangani kuti muvere mwambo wache onsene; tenepo uvereni mwakukhulupirika na mtimanu onsene.

¹⁷Lero mwamtawira MBUYA kukhala Mulungu wanu; imwe mwadumbira kumvera, kukoya mwambo wache onsene pontho na kuchita pyonsene pimbatonga iye.

¹⁸Lero MBUYA akutawirani kukhala anthu ache ene ninga mudadumbira iye kuna imwe; tenepo iye akukutongani kuvera mwambo wache onsene.

¹⁹Iye anakuchitisani kukhala dzinza ikulu kupiringana dzinza inango yonsene yalenga iye, natenepo imwe munadzesa ukulu, mbiri na chilemedzo kuna dzinache. Imwe munakhala anthu ache ninga mudadumbira iye.”