Read cisena DEUTERONOMO 27 Bible Online

DEUTERONOMO 27 - cisena bible

DEUTERONOMO 27

¹Mose pabodzi pene na akadamu a ku Israele adalonga kuna anthu mbati, “Verani matongero onsene anakupasani ine lerowa.

²Nsiku idawambuka imwe mkulo wa Yorodani mbamupita m'dziko inakupasani MBUYA Mulungu wanu ile imwe mwathema kuikha mulu wa miyala, muuzirime

³mbamulembepo mwambo onsene na pifunzisopi. Mungapita m'dziko yamphonje idadumbira MBUYA Mulungu wa makolo anu kuna imwe ile,

⁴mwenemo imwe muli kumtunda unango wa mkulo wa Yorodani, ikhani mulu wa miyala paphiri ya Ebali, ninga munakupangirani ine lero mbamuuzirima.

⁵Mangani penepo guwa yansembe yamiyala yokhonda semwa na simbi,

⁶thangwi guwa yonsene ya nsembe inamangira imwe MBUYA Mulungu wanu yathema kumangwa na miyala yokhonda semwa mbamupereka nsembe zakupyerera kuna MBUYA Mulungu wanu.

⁷Penepo perekani nsembe zanu, pontho idyani nsembe zanu zachiphatizano mbamukomerwe pamaso pa MBUYA Mulungu wanu.

⁸Pamiyala yazirima imwe ile lembani mwakuoneka mwadidi mafala onsene a mwambo wa Mulungu.”

⁹Tenepo Mose pabodzi pene na anyansembe a Chilevi adalonga kuna Aisraele onsene mbati, “Ikhani makutu anu kuno, imwe Aisraele mbamundivesere. Lero mwasanduka anthu a MBUYA Mulungu wanu;

¹⁰natenepo mvereni mbamukoya mwambo wache onsene unakupasani ine lerowu.”

¹¹Tenepo Mose adalonga kuna Aisraele mbati,

¹²“Mungawambuka mkulo wa Yorodani madzinza a Simioni, Levi, Yuda, Isakara, Yosefe, na Benjemani athema kuimira paphiri ya Gerizimu kutsanzayisa anthu.

¹³Madzinza a Rubeni, Gadi, Asheri, Zebuloni, Dani na Nafitali athema kuimira paphiri ya Ebali kulalika dzedze.

¹⁴Alevi analonga mafalawa mwakugaluza fala:

¹⁵“‘Dzedze kuna munthu onsene anasasanya mfanikizo wamwala, wamuti penu wantove mbapipembedza chibiso-biso. MBUYA ambazonda kupembedza mifanikizo.’ “Natenepo anthu onsene anatawira kuti, ‘Ande, mbapikhale tenepo!’

¹⁶“‘Dzedze kuna munthu onsene anakhonda lemedza babache na mache.’ “Natenepo anthu onsene anatawira kuti, ‘Ande, mbapikhale tenepo!’

¹⁷“‘Dzedze kuna munthu onsene anafudza chidzindikiro cha madire a tsanthembache.’ “Natenepo anthu onsene anatawira kuti, ‘Ande, mbapikhale tenepo!’

¹⁸“‘Dzedze kuna munthu onsene anaphata boli-boli nsenji mbamuendesa m'tsanga.’ “Natenepo anthu onsene anatawira kuti, ‘Ande, mbapikhale tenepo!’

¹⁹“‘Dzedze kuna munthu onsene anadyera nkope-kope mlendo, ana masiye na amamfelwa.’ “Natenepo anthu onsene anatawira kuti, ‘Ande, mbapikhale tenepo!’

²⁰“‘Dzedze kuna munthu onsene analulupisa babache pakugonana na mbodzi wa akazi a babache.’ “Natenepo anthu onsene anatawira kuti, ‘Ande, mbapikhale tenepo!’

²¹“‘Dzedze kuna munthu onsene anachita pyakuzuda na nyama.’ “Natenepo anthu onsene anatawira kuti, ‘Ande, mbapikhale tenepo!’

²²“‘Dzedze kuna munthu onsene anagonana na nyamaingache penu nyamaingache wakunjira.’ “Natenepo anthu onsene anatawira kuti, ‘Ande, mbapikhale tenepo!’

²³“‘Dzedze kuna munthu onsene anagonana na mebzalache.’ “Natenepo anthu onsene anatawira kuti, ‘Ande, mbapikhale tenepo!’

²⁴“‘Dzedze kuna munthu onsene anachita pyaupandu chibiso-biso.’ “Natenepo anthu onsene anatawira kuti, ‘Ande, mbapikhale tenepo!’

²⁵“‘Dzedze kuna munthu onsene anatambira kobiri kuti aphe munthu okhonda dawa.’ “Natenepo anthu onsene anatawira kuti, ‘Ande, mbapikhale tenepo!’

²⁶“‘Dzedze kuna munthu onsene anakhonda vera mwambo onsene wa Mulungu na pifunziso pyache pene.’ “Natenepo anthu anatawira kuti, ‘Ande, mbapikhale tenepo!’