Read cisena DEUTERONOMO 28 Bible Online

DEUTERONOMO 28 - cisena bible

DEUTERONOMO 28

¹“Ngakhala munavera MBUYA Mulungu wanu mbamukoya mwakukhulupirika matongero ache onsene anakupasani ine lerowa, iye anakuchitisani kukhala dzinza ikulu pyakwanga kupiringana dzinza inango yonsene padziko yapansi.

²Verani MBUYA Mulungu wanu natenepo mtsanzayiso onsenewu unakhala wanu:

³“MBUYA anatsanzayisa maluwani anu na mindanu ene.

⁴“MBUYA anakutsanzayisani na ana azinji, mbewu zizinji pontho na ng'ombe na mabira azinji.

⁵“MBUYA anatsanzayisa pyakuvuna pyanu pontho na pyakudya pinasasanya imwe kubulukira kupyakuvunapyo.

⁶“MBUYA anatsanzayisa pyonsene pene pimbachita imwe.

⁷“MBUYA anakunda anyamalwanu angakusosani. Iwo anakusosani kubulukira kukhundu ibodzi, kwache anakuthawani kukhundu zonsene.

⁸“MBUYA Mulungu wanu anatsanzayisa basanu mbachitisa pikwa pyanu kudzala na phoso. Iye anakutsanzayisani m'dziko inakupasani iyeyi.

⁹“Ngakhala munavera MBUYA Mulungu wanu mbamuchita pyonsene pinakutongani iye, anakuchitisani kukhala anthu ache ninga mudadumbira iye.

¹⁰Tenepo madzinza onsene a padziko yapansi anadziwa kuti MBUYA akusankhulani kuti mukhale anthu ache, natenepo iwo anachita namwe mantha.

¹¹MBUYA anakupasani ana azinji, ng'ombe zizinji pontho mbewu zizinji m'dziko idadumbira iye kuna makolo anu ile.

¹²Iye anavumbisa mvula pandzidzi wache kubulukira m'nyumba zimbakoyeramo iye mfumache kudzulu mbatsanzayisa basanu yonsene, towera mufiyalise kuna madzinza azinji, kwache imwe nkhabe dzafiyali kuna iwo tayu.

¹³MBUYA Mulungu wanu anakuchitisani kukhala mkadamu pakati pa madzinza nee nyakutewera tayu; ndzidzi onsene pinthu pyanu pinakufambirani mwadidi pontho nee munapichimwana tayu ngakhala munavera mwakukhulupirika matongero ache onsene anakupasani ine lerowa.

¹⁴Imwe mwathema kuavera monsene mwene pontho lekani kupembedza penu kutumikira milungu inango.

¹⁵“Mbwenye mungakhonda vera MBUYA Mulungu wanu mbamukhonda koya matongero ache na mwambo wache onsene mwakukhulupirika pinakupasani ine leropi, pyakuipa pyonsene pili m'tchindemu pinakugwerani:

¹⁶“MBUYA anatemberera maluwani anu na mindanu ene.

¹⁷“MBUYA anatemberera mapiranu pontho na pyakudya pyonsene pyakusasanywa kubulukira kumapirawo.

¹⁸“MBUYA anakutembererani pakukupasani ana akuchepa, mbewu zakupupwa pontho ng'ombe na mabira pyakuchepa.

¹⁹“MBUYA anatemberera pyonsene pene pimbachita imwe.

²⁰“Ngakhala munachita pyakuipa mbamukhonda MBUYA, iye anadzesa nyatwa pana imwe pontho kuzunguzika pana pyonsene pimbachita imwe kufikirana imwe mwavungika kabodzi kene pontho monsene mwene.

²¹Iye anadzesa utenda pana imwe mwakundondolozana kufikirana paleke sala munthu na mbodzi ene m'dziko ili imwe chifupi kuipokosera ile.

²²MBUYA anakusanyisani na utenda wakupasirana, pitupira pontho na anyampwanda, na kupisa thangwi ya kusowa kwa mvula pontho mphepo yambalu, na utenda wa mbewu, pile pinakunensani kufikirana mupuluzikiretu.

²³Mvula nkhabe dzavumba na pang'ono pene tayu, pontho mataka anasanduka akuwanga ninga simbi.

²⁴M'mbuto mwa mvula MBUYA anavumbisa chonzi cha fumbi na tchetcha kufikirana imwe monsene mumale vungika.

²⁵“MBUYA anachitisa anyamalwanu kukukundani. Imwe munaasosa kubulukira kukhundu ibodzi, kwache imwe munaathawa kukhundu zonsene, tenepo anthu onsene a padziko yapansi anachita mantha angaona pinthu pyakuchitikiranipyo.

²⁶Mungafa mbalame na nyama zam'tsanga zinadya manungo anu, tenepo panakhala nkhabe munthu na mbodzi ene wakuzizwinga tayu.

²⁷MBUYA anadzesa anyakadumu pana imwe ninga mudachitira iye kuna Aiguputo. Iye anachitisa manungo anu kubuluka pisungu. Anadzala na mphere mbamuva kufika kule kunakhonda imwe kukwanisa kukuwangisa.

²⁸MBUYA anakuchitisani kukhala na nsala, uboli-boli pontho na kuzunguza manyerezero anu.

²⁹Dzuwa mwenemo ikuswa miti imwe munamphamphasa ninga boli-boli, tenepo imwe nkhabe dzakwanisa kugumana njira tayu. Pinthu pyanu pyonsene pinachita imwe nkhabe kukufambirani mwadidi tayu. Imwe munaponderezwa pontho kuberwa pinthu pyanu nsiku na nsiku mbamusowa munthu na mbodzi ene wakukuphedzani.

³⁰“Imwe munavunzira mkazi, kwache munthu unango ndiye anafuna dzamsemba. Imwe munamanga nyumba, kwache nkhabe dzakhalamo tayu. Imwe munalima mfesa, kwache imwe nkhabe dzadya nsapo zachezo tayu.

³¹Ng'ombe zanu zinachekwa imwe mukuona maso, kwache imwe nkhabe dzadya nyamayo tayu. Mabulu anu anakwekwetwa imwe mukuona maso, kwache iwo nkhabe dzabwezerwa tayu. Mabiranu anaperekwa kuna anyamalwanu mbapasowa munthu na mbodzi ene wakukuphedzani.

³²Ananu achimuna na achikazi anaperekwa kuna alendo ninga mabitchu imwe mukuona maso. Nsiku na nsiku maso anu anakhala kunjira kulira kuyang'ana kwene kuti mwinango ananuwo anabwerera.

³³Dzinza yachilendo inakwata mbewu zanu zonsene zaphatira imwe basa mwakuwangisa kuzilima mbamukhonda dzatambira chinthu na chibodzi chene, mbwenye kuponderezwa na kuchitirwa vinga nsiku na nsiku.

³⁴Kusanyika kwanu kunakuyalusani.

³⁵MBUYA anachitisa miyendo yanu kudzala na anyakadumu okhonda kuva mtombwe, kubulukira kumsolo mpakana kumanyalo.

³⁶“MBUYA anakuendesani imwe na mafumu anu kudziko yachilendo yakuti chipo nee imwe penu makolo anu adzati khalako tayu. Kweneko munatumikira milungu yakusasanywa na muti pontho mwala.

³⁷Kumadziko kunafuna kukubalalisani MBUYA ale, anthu a kweneko anatutumuka na pinthu pyakuchitikiranipyo, mwakuti anakusekani na kukusedegulani.

³⁸“Imwe munabzala mbewu zizinji kwache munavuna pyakuchepa, thangwi nyadzombe anadya mbewuzo.

³⁹Imwe munabzala minda yamfesa, kwache nkhabe gumanya mfesazo, penu kumwa vinyu wakubulukira mfesazo tayu, thangwi mfunye zinadya mfesazo.

⁴⁰Miti yaolivi inamera ponsene pene m'dziko, kwache imwe nkhabe dzaphatisa basa mafutache tayu, thangwi nsapozo zinambwera pansi.

⁴¹Imwe munakhala na ana achimuna na achikazi, kwache nkhabe dzakhala nawo tayu, thangwi iwo anakwatwa ninga mabitchu pankhondo.

⁴²Miti yanu yonsene na mbewu zanu zonsene zinadyiwa na nyadzombe.

⁴³“Alendo ambakhala m'dziko mwanu ale anathimiza kukhala na mphamvu, mwenemo imwe mukuthimiza kukhala akusowa mphamvu.

⁴⁴Iwo anakhala na kobiri zakukufiyalisani, kwache imwe munasowa kobiri yakuti muafiyalisembo. Pakumalisira pache imwe munakhala pansi pa utongi wawo.

⁴⁵“Muliri onsenewu unagwa pana imwe kufikirana mwamala vungwa, thangwi imwe nee mwavera MBUYA Mulungu wanu, pontho mwambo wache onsene udakupasani iye ule tayu.

⁴⁶Ipyo pinakhala umboni yakukutongani kunafuna dzachita Mulungu pana imwe na pidzukulu pyanu kwenda na kwenda.

⁴⁷MBUYA adakutsanzayisani monsene mwene, kwache imwe nee mwamtumikira na mtima wakusekera pontho wakukomerwa tayu.

⁴⁸Natenepo imwe munatumikira anyamalwanu anafuna kukutumizirani MBUYA ale. Imwe munakhala na njala, nyota, usiwa mbamusowa pinthu pyonsene. MBUYA[16] anakuboneresani mwavinga kufikirana imwe mwamala vungwa.

⁴⁹MBUYA anakudzeserani dzinza kubulukira kumadolomero a dziko yapansi, anthu akuti chilongero chawo imwe nkhabe kuchidziwa tayu. Iwo anaphama pana imwe ninga mphamba.

⁵⁰Iwo anakhala amtima mbakhonda dzavera nsisi munthu na mbodzi ene, mkulu penu mwana.

⁵¹Iwo anadya pifuyo pyanu na mbewu zanu, tenepo imwe munafa na njala. Iwo nkhabe dzasiya mapira, vinyu, mafuta aolivi, pifuyo penu mabira na pang'ono pene tayu; imwe munafa.

⁵²Iwo anasosa luwani yonsene m'dziko inakupasani MBUYA Mulungu wanuyi, pontho mipanda yonsene yakulapha yakuzungulira inanyindira imweyi inagomolwa.

⁵³“Anyamalwanu angazungulira m'maluwani anu, imwe munanenseka pyakwanga kusowa pyakudya mwakuti munadya ana akupasani MBUYA ale.

⁵⁴Podi na munthu wakufunika ene pontho wanzeru ananenseka pyakwanga ndzidzi wenewu mwakuti anadya anache ene, thangwi ya kusowa pyakudya. Iye nkhabe dzapereka na pang'ono pene kuna mbaleache, mkazache ambafuna iye ule, penu kuna anache akusalira na moyo ale tayu.

⁵⁵

⁵⁶Podi na mkazi ene wakufulika pontho wanzeru; wanzeru pontho wakufulika pyakwanga wakuti chipo hadzati famba na manyalo ache tayu, ananenseka pyakwanga pandzidzi wa nyatwawu mwakuti anadya chibiso-biso mwanache wa m'chikuta na anache akukula kale. Iye nkhabe dzagawana na mamunache ambafuna iye ule, penu na mbodzi ene wa anache anango tayu.

⁵⁷

⁵⁸“Ngakhala munakhonda vera mwakukhulupirika pifunziso pyonsene pya Mulungu pyalembwa m'bukhuyi pontho ngakhala munakhonda lemedza dzina yakudodomesa pontho yakugopeka ya MBUYA Mulungu wanu,

⁵⁹iye anagwisa pana imwe pontho na pana pidzukulu pyanu utenda okhonda kuva mtombwe, pontho na miliri yakugoswa yokhonda mala.

⁶⁰Iye anadzesa pontho pana imwe utenda wakupha ninga udaona imwe ku Iguputo ule, tenepo imwe nkhabe dzawanga tayu.

⁶¹Iye anatumiza pontho mtundu onsene wa utenda na miliri pile nee pyalembwa m'bukhu ya pifunziso na mwambo wa Mulungu tayu, tenepo imwe munamala vungwa.

⁶²Podi kwene kuti imwe muinjipe ninga nyenyezi zakuthambo, akuchepa a imwe ndiye anafuna dzasalira na moyo, thangwi imwe hamudavere MBUYA Mulungu wanu tayu.

⁶³Pidamkomera MBUYA kuchitisa pinthu pyanu kufamba mwadidi pontho kukuchitisani kuinjipa, sasawambo pinamkomera kukuvungani pontho kukupuluzani. Imwe munabuluswa m'dziko inafuna imwe kwata kukhala yanu ene ile.

⁶⁴“MBUYA anakubalalisani pakati pa madzinza onsene kubulukira kumadolomero mpakana kumadolomero anango a dziko yapansi, kweneko munatumikira milungu yakusasanywa na muti pontho mwala, milungu yakuti chipo nee imwe penu makolo anu mudzati mwaipembedza tayu.

⁶⁵Pakati pa madzinza anango imwe nkhabe dzagumana mtendere tayu. Nkhabe mbuto inafuna imwe dzalonga kuti njanu ene tayu; MBUYA anakuchitisani kukhala akusanyika mumtima, akusowa chidikhiro pontho akutaya mtima.

⁶⁶Moyo wanu ndzidzi onsene unakhala panyatwa zakugoswa. Mosiku na masikati munachita mantha pikulu pene, pontho munachita mantha na imfa kwenda na kwenda.

⁶⁷Mtimanu unadzala na mantha thangwi ya pinthu pyonsene pinaona imwe; machibese onsene munakhumba kuti kunja kudoke; na mawulombo munakhumba kuti kunja kuchene.

⁶⁸MBUYA anakubwezerani pontho kudziko ya Iguputo m'miyadiya mikulu-mikulu, podi kwene kuti iye[17] adalonga kuti nkhabe dzabwererave pontho kweneko tayu. Kweneko munapipereka mwekha ene kupigulisa ninga mabitchu a anyamalwa anu, kwache nkhabe mbodzi anafuna kukugulani tayu.”