Read cisena DEUTERONOMO 3 Bible Online

DEUTERONOMO 3 - cisena bible

DEUTERONOMO 3

¹“Kubuluka penepo, tidathimiza kwenda kumpoto kunthemba ya Bashani, tenepo Mfumu Ogi adabuluka na amunache onsene dzachita nafe nkhondo chifupi na luwani ya Edrei.

²Mbwenye MBUYA adalonga kuna ine mbati, ‘Leka chita naye mantha. Ndinati ndimpereke iye na amunache na dziko yache yonsene kuna imwe. Chitani sasawa kuna iye ninga pidachita imwe kuna Sihoni mfumu wa Aamori akhatonga ku Heshiboni ule.’

³“Natenepo MBUYA adaikha pontho Mfumu Ogi na anthu ache ene m'manja mwathu, tenepo ife tidaacheka onsene.

⁴Na ndzidzi onthowo tidapokosera maluwani ache onsene. Pakhali nkhabe mzinda na ubodzi ene udasiya ife okhonda kuukwata tayu. Pyonsene pidapokosera ife ndi maluwani makumatanthatu; nthemba yonsene ya Arigobu, kukhatonga Mfumu Ogi wa ku Bashani ule.

⁵Maluwani onsenewa adatchingwa mwadidi na mipanda yakulapha yakukhala na misuwo na mphinga zasimbi, pontho mukhali midzi mizinji yakusowa mipanda.

⁶Tidavunga maluwani onsene mbatipha amuna onsene, akazi na ana ene ninga montho mudachitira ife m'maluwani a Mfumu Sihoni wa ku Heshiboni.

⁷Tidakwata pifuyo pyonsene mbatipokosera pinthu pyonsene pya m'maluwanimo.

⁸“Pandzidzi wenewo tidapokosera kuna mafumu mawiri a Aamori dziko yakumabulukiro dzuwa a mkulo wa Yorodani, kubulukira kumkulo wa Arinoni mpakana kuphiri ya Herimoni.

⁹Phiri ya Herimoni imbachemerwa na Asidoni na dzina yakuti Sirioni, mbwenye Aamori ambaichemera Seniri.

¹⁰Ife tidapokosera nthemba yonsene ya Mfumu Ogi wa ku Bashani: mizinda yonsene ya pamapiri, nthemba ya Gileadi na za Bashani, mpakana kumabulukiro dzuwa kumaluwani a Saleka na Edrei.”

¹¹Mfumu Ogi akhali wakumalisira wa mafumu a Arefaimu. Baulu[2] yache yakusasanywa na miyala[3] ulaphiache ukhali makhono manayi; umimba ukhali ninga makhono mawiri malingana na mdida ukhaphatiswa basa ndzidzi wenewo. Baulu ilipo basi na lero mu Raba mzinda wa Aamoni.

¹²“Pidapokosera ife dzikoyo ndidapereka kuna madzinza a Rubeni na Gadi nthemba yakumpoto kwa luwani ya Aroeri chifupi na mkulo wa Arinoni pontho khundu ya nthemba ya mapiri ya Gileadi pabodzi pene na maluwani ache.

¹³Manase wakumabulukiro dzuwa ndidaipasa mbuto yonsene yakusalira ya Gileadi, pontho na Bashani onsene, kukhatonga Ogi kule. Yeneyi ndi nthemba yonsene ya Arigobu.” Bashani kale ikhadziwika na dzina ya dziko ya Arefaimu.

¹⁴Yairi wa dzinza ya Manase adakwata nthemba yonsene ya Arigobu, yeneyi ndi, Bashani, mpakana kumadire a Geshuri na Maaka. Midziyo adaithula na dzinache, tenepo iyo ikhadziwika basi ninga ya Yairi.

¹⁵“Ndidapereka Gileadi kuna mbumba ya Makiri wa dzinza ya Manase.

¹⁶Kuna madzinza a Rubeni na Gadi ndidapereka nthemba kubulukira ku Gileadi kwenda kumkulo wa Arinoni. Kati na kati ya mkulo ndiye ikhali madire awo akumwera, pontho madire awo akumpoto akhali mkulo wa Yaboki. Khundu idachita madire na Aamoni.

¹⁷Kumadokero dzuwa nthembawo idenda mpakana kumkulo wa Yorodani, kubulukira kunyanza ya Galilea kumpoto kutchithira ku Nyanza ya Munyu kumwera, pontho m'tchinde mwa phiri ya Pisiga kumabulukiro dzuwa.

¹⁸“Na ndzidzi onthowo, ine ndidaapasa matongero awa: MBUYA Mulungu wathu akupasani dzikoyi yakumabulukiro dzuwa a mkulo wa Yorodani kuti ikhale yanu ene. Chinchino sasanyani amunanu ankhondo mbuatumize kuwambuka mkulo wa Yorodani patsogolo pa madzinza anango a Israele kuaphedza kukwata dzikoyo.

¹⁹Akazanu, ananu na pifuyo pyanu pyene basi (ndikupidziwa kuti muna pifuyo pizinji) pinasalira m'nduli m'maluwani akupasani ine ale.

²⁰Phedzani Aisraele anzanu kufikirana iwo akwata dziko inaapasa MBUYA kumadokero dzuwa a mkulo wa Yorodani, pontho kufikirana MBUYA aatawirise kukhala kweneko na mtendere, ninga mwapichitira iye kale kuno kuna imwepo. Kubuluka penepo munakwanisa kubwerera kudziko yakupasani ineyi.

²¹“Tenepo ndidampanga Yoswa kuti: ‘Iwe waona pyonsene pyachita MBUYA Mulungu wako kuna mafumu awiri ale, Sihoni na Ogi: tenepo iye anachita chibodzi-bodzi kuna mafumu onsene anaendera imwe ale.

²²Lekani chita nawo mantha, thangwi MBUYA Mulungu wanu akukumenyerani nkhondo.’

²³“Pandzidzi wenewo ndidapemphera pikulu pene kuti,

²⁴‘MBUYA Mulungu ndikupidziwa imwe mwandionesa kwene nthomatoma ya pinthu pikulu pontho pyakudodomesa pifuna imwe dzachita. Nkhabe mulungu unango kudzulu penu padziko yapansi anakwanisa kuchita pinthu pyamphamvu ninga pyachita imwepi tayu!

²⁵Nditawiriseni kuwambuka kwene mkulo wa Yorodani MBUYA, mbandiona dziko ya mataka akubalisa pinthu khundu inangoyo, dziko yakubalika ya mapiri, pontho na mapiri a Lebanoni.’

²⁶“Mbwenye na thangwi ya imwe MBUYA adandizhangalira mbakhonda kundivesera. M'mbuto mwache, iye adalonga mbati, ‘Pyakwana! Leka longave pontho penepi!

²⁷Ndoko kuphiri yakusongoka ya Pisiga mbukayang'ane kumpoto na kumwera, kumabulukiro dzuwa na kumadokero dzuwa. Kayang'ane mwadidi pinthu pinakaona iwe, thangwi iwe hunawambuka Yorodani tayu.

²⁸Mpase Yoswa matongero ache. Muwangise mtima, thangwi ndiye anafuna dzatsogolera anthu kuwambuka mkulo kakwata dziko inaona imweyo.’

²⁹“Tenepo ife tidasalira paphedi yakuyang'anisana na luwani ya Beti-Peori.”