Read cisena DEUTERONOMO 31 Bible Online

DEUTERONOMO 31 - cisena bible

DEUTERONOMO 31

¹Mose adathimiza kulonga na Aisraele mbati,

²“Ine pano ndina pyaka dzana na makumawiri pyakubalwa, tenepo ine nkhabe kwanisa khalave mkadamu wanu tayu. Padzulu pache MBUYA andipanga kuti sinawambuka mkulo wa Yorodani tayu.

³MBUYA Mulungu wanu anaenda patsogolo panu mbavunga madzinza anakhala mwenemo ale, towera mukwate dziko yawoyo kuti ikhale yanu ene; tenepo Yoswa anakhala mkadamu wanu ninga mwandipangira MBUYA.

⁴MBUYA anavunga anthu enewo ninga montho mudavungira iye Sihoni na Ogi, mafumu a Aamori mbavunga pontho dziko yawo.

⁵MBUYA anakuchitisani kuakunda, tenepo imwe mwathema dzaavunga ninga montho mwakupangirani ine.

⁶Khalani na chipapu pontho wangani mtima. Lekani chita nawo mantha. Mulungu wanu MBUYA mwenechiro anakhala namwe. Iye nkhabe kukuchimwanisani penu kukusiyani mwekha tayu.”

⁷Tenepo Mose adachemera Yoswa mbalonga naye pamaso pa Aisraele onsene mbati, “Khala na chipapu pontho wanga mtima; ndiwe anafuna dzatsogolera anthuwa kakwata dziko idadumbira MBUYA kuna makolo anu ile.

⁸MBUYA mwenechiro anakutsogolerani pontho anakhala namwe. Iye nkhabe kukuchimwanisani penu kukusiyani mwekha tayu, natenepo lekani taya mtima penu kuchita mantha.”

⁹Tenepo Mose adalemba mwambo wa Mulungu mbaupereka kuna anyansembe a Chilevi, ale akhathukula Bokosi ya Chiverano ya MBUYA, na kuna akadamu a Aisraele.

¹⁰Iye adaatonga mbati, “Kumala kwa chaka chachinomwe chonsene, chaka chakufudza mangawa chingafika, werengani mwambowu pa Phwando ya Misasa.

¹¹Muuwerenge kuna Aisraele angadza dzapembedza MBUYA Mulungu wawo pambuto ibodzi yakupembedzerapo.

¹²Chemeresani amuna onsene, akazi, ana na alendo ambakhala m'maluwani mwanu ale, towera avesere pontho adziwe kulemedza MBUYA Mulungu wanu na kuvera pifunziso pyache pyonsene mwakukhulupirika.

¹³Na njira yeneyi, pidzukulu pyanu pile pyadzati pyava mwambo wa MBUYA Mulungu wanu tayu anauva. Natenepo iwo anadziwa kuvera MBUYA Mulungu wanu ndzidzi onsene unakhala imwe na moyo m'dziko inafuna imwe kaipokosera chinchino ya kumtunda unango ya mkulo wa Yorodani ile.”

¹⁴MBUYA adalonga kuna Mose mbati, “Iwe hunakhalave na moyo ndzidzi ukulu ene tayu. Kwata Yoswa udze naye ku Chikhumbi cha Mulungu, towera ndimpange pyakuchita.” Tenepo Mose na Yoswa adendadi ku Chikhumbi chile,

¹⁵penepo MBUYA adaonekera kuna iwo m'makole adaimira pamsuwo wa Chikhumbi chile.

¹⁶MBUYA adalonga kuna Mose mbati, “Chinchino unati ufe, tenepo ungafa anthu anasanduka okhonda khulupirika kuna ine mbaswa chiverano chidasasanya ine nawo chile. Iwo anandikhonda mbapembedza milungu yachilendo m'dziko ina iwo chifupi kuipitayi.

¹⁷Penepi pingachitika, ine ndinaazhangalira; ine ndinaapasa nkhodolo mbavungwa. Nyatwa zizinji zakugoswa zinadza pana iwo, penepo iwo anadzindikira kuti penepi pikuchitika, thangwi ine, Mulungu wawo, nkhabe dzakhala nawove tayu.

¹⁸Tenepo sinaaphedza tayu, thangwi iwo achita pyakuipa mbapembedza milungu inango.

¹⁹“Chichino lemba nyimbo ishi. Ifunzise kuna Aisraele, towera ikhale umboni yakupokanyisana nawo.

²⁰Ine ndinaaendesa m'dziko yamphonje ninga mudadumbira ine kuna makolo awo. Kweneko anakhala na pyakudya pyonsene pinafuna iwo mbakhala mwadidi. Kwache iwo anabauka kupembedza milungu inango. Iwo anandikhonda mbaswa chiverano chathu,

²¹tenepo nyatwa zizinji zakugoswa zinagwa pana iwo. Mbwenye nyimbo yeneyi inathimizwa kuimbwa, tenepo inakhala umboni wakupokanyisana nawo. Podi chinchino ene pano, ine mbandidzati kuaendesa kudziko idadumbira ine kuna iwo ile, ine ndikudziwa manyerezero awo.”

²²Nsiku yonthoyo Mose adalemba nyimboyo mbaifunzisa Aisraele.

²³Natenepo MBUYA adalonga kuna Yoswa mwana Nuni mbati, “Khala na chipapu pontho wanga mtima. Ndiwe anafuna dzatsogolera Aisraele kwenda kudziko idadumbira ine kuna iwo ile, tenepo ine ndinakhala nawe.”

²⁴Mose adalemba mwambo wa Mulungu m'bukhu mbachita mphole-mphole kukhonda siya chinthu na chibodzi chene.

²⁵Pidamala iye, adalonga kuna anyansembe a Chilevi, ale akhathukula Bokosi ya Chiverano ya MBUYA mbati,

²⁶“Kwatani bukhu ya mwambo wa Mulungu muiikhe m'khundu mwa Bokosi ya Chiverano ya MBUYA Mulungu wanu, towera ikhale penepo ninga umboni wakupokanyisana na anthu ache.

²⁷Ine ndikudziwa kuuma mtima pontho kupandukira kwachita iwo. Iwo adapandukira MBUYA mwenemo ndikali moyo, tenepo anati athimize kunyanya kupandukira ine ndingafa.

²⁸Gumanyisa anthu, akadamu a madzinza onsene na mathubu pamaso panga, towera ndiapange pinthu ipi; kudzulu na dziko yapansi ndinapiyesa mboni zanga kupokanyisana nawo.

²⁹Ndikupidziwa kuti ine ndingafa anthu anasanduka akudawika, pontho anakhonda pinthu pyaafunzisa inepi. Tenepo ndzidzi unadzawo anaona nyatwa, thangwi anazhangalisa MBUYA pakuchita pinthu pyakukhondeswa.”

³⁰Tenepo Mose adaimba nyimbo yonseneyo uku anthu onsene Aisraele akuvesera.