Read cisena DEUTERONOMO 32 Bible Online

DEUTERONOMO 32 - cisena bible

DEUTERONOMO 32

¹“Dziko yapansi na thambo, veserani mafalanga, ikhani makutu kuna pinalonga inepi.

²Chifunziso changa chinagwa ninga madontho a mvula mbichidzachita mapovu padziko yapansi ninga bume. Mafalanga anagwa ninga mafazi pana mbewu zing'ono-zing'ono, ninga madontho akugwera pa pyakumera piwisi.

³Ndinakuza dzina ya MBUYA, tenepo anthu ache analonga pya ukulu wache.

⁴“MBUYA ndi Phanzwi, mabasache ngakuthema monsene mwene, pontho iye ngwachilungamo. Mulungu wako ngwakukhulupirika pontho wakuona; iye ambachita pyakulungama pontho pyakuthema.

⁵Mbwenye iwe ndiwe nyakukhonda kukhulupirika, pontho nyakukhonda thema kukhala anthu ache, dzinza yakudawika na yakunama.

⁶Ayi mwenemu ndiye munabwezera imwe MBUYA, imwe anthu akupupwa, pontho akusowa nzeru? Iye ndi babanu, nyakukulengani, iye adakusanduzani kukhala dzinza.

⁷“Nyerezerani pya m'nduli, pya mifendu yakaleletu; vunzani makolo anu kuti akupangeni pinthu pidachitika, vunzani nkhalamba kuti zikupangeni pinthu pyakale,

⁸Pidapasa Nyakudzulu-dzulu madzinza pidathema iwo dzatambira; ndzidzi udagawa iye anthu onsene, iye adaikha madire a madzinza mbapereka mngelo kada dzina kuayang'anira.[19]

⁹Thangwi khundu ya MBUYA ndi anthu ache, Yakobo adasankhula iye ule.

¹⁰“M'thando yatchetcha iye adagumana anthu ache, mbuto yakusowa pyakumera pontho ya chonzi. Iye adaatchinjiriza na kuayang'anira mwadidi, ninga munthu kutchinjiriza mboni ya diso yache.

¹¹Ninga mphamba kufunzisa anache kumbuluka,[20] kuathukula mwadidi pamaphaphido ache, MBUYA adakoya mwadidi Aisraele kuti aleke kugwa.

¹²MBUYA ene basi adaatsogolera, nee milungu yachilendo hidamphedze tayu.

¹³“Iye adaatawirisa kutonga pitunda, tenepo iwo akhadya pikhamera m'minda. Iwo adagumana uchi m'miyala; miti yawo yaolivi idavata pamataka a m'miyala.

¹⁴Ng'ombe na mbuzi zawo zidaapasa mkaka na mafuta amkaka. Iwo akhali na mabira, mbuzi na ng'ombe zakunenepa, tirigu wadidiletu, pontho vinyu wakudzipaletu.

¹⁵“Anthu a MBUYA adasanduka akufuma, kwache akhali akupandukira; iwo akhali akukula manungo mbabzimbirwa na kudya. Iwo adakhonda Mulungu, Nyakualenga, mbasedegula Phanzwi, Nyankhombo wawo ule.

¹⁶Kupembedza kwawo milungu inango kudachitisa MBUYA kukhala na ntchanje; pyakuipa pidaphata iwo pidamzhangalisa.

¹⁷Iwo adapereka nsembe kuna mizimu yakuipa, nee kuna Mulungu tayu, kuna milungu, ile ikhali yachilendo kuna iwo, yakuti chipo makolo awo hadaidziwe tayu, milungu yakuti chipo makolo awo hadaivere tayu.

¹⁸Iwo adaduwalira Mulungu, Phanzwi yawo, mbakhonda tsalakana pya iye, Nyakupasa moyo.

¹⁹“Pidaona MBUYA penepi adazhangali mbakhonda anache achimuna na chikazi

²⁰mbalonga mbati, ‘Ine nkhabe dzaaphedzave tayu; penepo tinaona pinafuna kuachitikira anthu akuuma mtima pontho okhonda khulupirikawa.

²¹Na mifanikizo idasasanya iwo adandizhangalisa nayo, na milungu yawo, ile njakusowa basa, andichitisa kukhala wantchanje; natenepo ndinaphatisa basa anthu ale, si dzinza tayu, kuazhangalisa; ndinaachitisa kukhala abivu na dzinza ya anthu akupupwa.

²²Kuzhangali kwanga kunayerima ninga moto mbupisa dziko yapansi na pinthu pili mwenemo; unafika mpakana kudziko ya anyakufa[21] mbupisa maziko a mapiri.

²³“‘Ndinagwisa pana iwo nyatwa zokhonda mala mbandiphatisa basa matswimo anga onsene kuamenya.

²⁴Iwo anafa na njala pontho anyampwanda; iwo anafa na utenda wakugoswa. Ine ndinatumiza nyama zam'tsanga kuaphata, pontho nyoka zakugoswa zinaaluma.

²⁵Nkhondo inaadzesa imfa m'njira; pyakugoswa pinaakang'antha m'misa mwawo. Aphale na atsikana anafa; nee akachiya penu nkhalamba anafuna dzasiyiwa na moyo tayu.

²⁶Mbandidaavunga monsene mwene towera munthu na mbodzi ene aleke kuakumbukave.

²⁷Kwache ine nkhabe dzatawirisa anyamalwawo kuti iwo agaye kuti akunda anthu anga na mphamvu zawo tayu, mwenemo ndine ene ndikhadapichita kuna iwo.’

²⁸“Israele ndi dzinza yakusowa nzeru; iwo nkhabe kuvesa pinthu tayu.

²⁹Iwo akuchimwana kuona thangwi yache idaakundira anyamalwawo; iwo nkhabe kwanisa kuvesa pidachitika pile tayu.

³⁰Apo ninji anthu chikwi kukundwa na munthu mbodzi, pontho anthu pikwi khumi kukundwa na anthu awiri? Ndi thangwi yakuti Mulungu, Phanzwi yawo akhadaapasa nkhodolo; MBUYA adaapereka m'manja mwa anyamalwawo.

³¹Anyamalwawo ambapidziwa kuti milungu yawo ene njakusowa mphamvu. Nkhabe mphamvu tayu ninga mphamvu za Phanzwi ya Israele.

³²Anyamalwawo ngakuipa ninga Sodomu na Gomora, akhala ninga mtawi wamfesa zakuwawa pontho zakupha,

³³ninga vinyu wakusasanywa na nyongo ya mbobo.

³⁴“MBUYA aikha mumtima pidachita anyamalwawo, iye akudikhira ndzidzi wakuthema kuti aatchunyuse.

³⁵Kubwezera nkhwanga ndinati ndibwezere, ndzidzi unadzawo manyalo awo anati atherizike; nsiku yawo ya nyatwa pontho yakuvungwa ili chifupi.

³⁶MBUYA anapulumusa anthu ache angaona kuti mphamvu zawo zikumala. Iye anavera nsisi anyakumtumikira, angaona kuti iwo, bitchu na mtumbe ene, ngakusowa chiphedzo.

³⁷Tenepo MBUYA anavunza anthu ache mbati, ‘Ili kupi milungu ikhanyindira imwe kukutchinjirizani ile?

³⁸Imwe mudaidyesa na mafuta a nsembe zanu mbamuipasa pyakupereka pya vinyu kuti amwe. Ilekeni idze ikuphedzeni chinchino pano, ilekeni idze ikupulumuseni.

³⁹“‘Ine ene pano ndine Mulungu, nkhabe mulungu unango chadi-chadi tayu. Ndimbapha mbandipereka moyo, ndimbakuwaza pontho kuwangisa. Nkhabe munthu na mbodzi ene anakwanisa kupokanyisa pimbachita ine tayu.

⁴⁰Podi ine ndine Mulungu wamoyo kwenda na kwenda, ndimbakwiza dzanjanga m'dzulu mbandidumbira,

⁴¹kuti ndinanozwa talasadanga yakuyetimira mbandidzesa chilungamo. Ine ndinabwezera anyamalwanga mbanditchunyusa anyakundizonda.

⁴²Matswimo anga anachuchisa chiropa chawo, talasadanga inapha anyakundipokanya onsene. Ine nkhabe dzasiya na moyo munthu na mbodzi ene wakumenyana na ine tayu; podi anyakukuwazwa na anyaperezo ene anafa.’

⁴³“Madzinza, imwe mwathema kukuza anthu a MBUYA, iye ambatchunyusa anyakuapha onsene. Iye ambabwezera anyamalwache mbalekerera anthu ache pyakudawa pyawo.”

⁴⁴Mose na Yoswa mwana Nuni adaimba nyimbo yeneyi towera anthu a ku Israele akwanise kuivesera.

⁴⁵Pikhadamala Mose kupereka pifunziso pya Mulungu kuna anthu

⁴⁶adalonga mbati, “Onesesani kuti mukuvera matongero onsene anakupasani ine lerowa. Alongenimbo kuna ananu towera iwo avere pifunziso pyonsene pya Mulungu mwakukhulupirika.

⁴⁷Pifunziso penepi si mafala apezi tayu; ipyo ndi moyo wanu makawo. Pivereni tenepo munakhala na moyo wakulapha m'dziko yakumtunda unango wa mkulo wa Yorodani inafuna imwe pokosera chinchino panoyi.”

⁴⁸Nsiku yonthoyo MBUYA adalonga kuna Mose mbati,

⁴⁹“Ndoko kumapiri a Abarimu m'dziko ya Moabu kuyang'anisani na mzinda wa Yeriko; kwira pa Phiri ya Nebo mbukayang'ane dziko ya Kanani inafuna ine pasa Aisraele ile.

⁵⁰Iwe unafa paphiri yeneyo ninga mudafera mbaleako Aroni paphiri ya Hori,

⁵¹thangwi monsene uwirianu mukhali okhonda khulupirika kuna ine pamaso pa Aisraele. Pikhali iwe kumadzi a Meriba chifupi na luwani ya Kadeshi m'thando yatchetcha ya Zini, iwe hudandilemedze tayu pamaso pa anthu.

⁵²Iwe unaona dzikoyi na pakansinzo, kwache iwe nkhabe dzapita m'dziko inapasa ine Aisraele ile tayu.”