Read cisena DEUTERONOMO 33 Bible Online

DEUTERONOMO 33 - cisena bible

DEUTERONOMO 33

¹Ufu ndi mtsanzayiso udapereka Mose, munthu wa Mulungu, pana Aisraele iye mbadzati kufa.

²MBUYA adadza kubulukira pa phiri ya Sinai; mbalamuka ninga kubuluka kwa dzuwa mu Edomu mbamwinikira anthu ache kubulukira pa phiri ya Parani. Angelo pikwi khumi akhali naye, moto wakuyerima kumadyo kwache.

³MBUYA ambafuna anthu ache[22] mbatchinjiriza anthu ale ngache. Natenepo timbalamba pamanyalo pache mbateweza matongero ache.

⁴Ife timbavera mwambo udatipasa Mose ule mfuma yakunyindirika ya dzinzathu.

⁵MBUYA akhali mfumu wa anthu ache, Aisraele, ndzidzi udagumanyikana pabodzi madzinzawo na akadamu awo.

⁶Mose adalonga pya dzinza ya Rubeni: “Rubeni mbakhale na moyo mbaleke kufa, Podi kwene kuti anthu ache ngakuchepa tani.”

⁷Pya dzinza ya Yuda iye adalonga tenepa: “MBUYA veserani kulira kwawo kufuna chiphedzo. Aphatanizeni pontho na madzinza anango. Amenyereni nkhondo, MBUYA, pontho aphedzeni kuna anyamalwawo.”

⁸Pya dzinza ya Levi iye adalonga tenepa: “MBUYA, tchululani kufuna kwanu kudzera muna Urimu na Tumimu, kudzera muna anyabasanu akukhulupirika, Alevi; imwe mudaayesera pa Masa mbamutsikimizira kuti ngakuona kumadzi a Meriba.

⁹Iwo adaonesa kukhulupirika kukulu kuna imwe kupiringana kuna makolo, abale, penu ana. Iwo adavera matongero anu, pontho adakhulupirika kuna chiverano chanu.

¹⁰Iwo anafunzisa anthu anu kuvera mwambo wanu; iwo anapereka nsembe paguwanu yansembe.

¹¹MBUYA phedzani dzinzawo kuti ikule na mphamvu; komerwani na pimbachita iwo. Peyani anyamalwawo onsene; lekani kuatawirisa kuti alamuke pontho.”

¹²Pya dzinza ya Benjemani iye adalonga tenepa: “Yeneyi ndi dzinza yapamtima pa MBUYA imbatchinjiriza iye ile; iye ambaayang'anira nsiku yonsene, pontho iye ambakhala pakati pawo.”[23]

¹³Pya dzinza ya Yosefe iye adalonga tenepa: “MBUYA mbatsanzayise dziko yawo na mvula, pontho na madzi akubulukira pansi pa mataka.

¹⁴Dziko yawo mbitsanzayiswe na nsapo zakutokota na dzuwa. Ifume na nsapo zadidiletu mwezi na mwezi.

¹⁵Mapiri akale mbaphophe na nsapo zadidiletu.

¹⁶Dziko yawo mbitsanzayiswe na pinthu pyonsene pyadidi, pontho na udidi wa ule adalonga m'thenthere yakugaka moto. Pyonsenepi pikhale pamsolo wa Yosefe thangwi iye akhali mfumu pakati pa abale ache.

¹⁷Yosefe ana mphamvu ninga ng'ombe imuna, nyanga zache zakhala ninga za nyati. Na nyanga zache, zile ndi anthu pikwi pya Manase, pontho pikwi khumi pya Eferemu, iye anadima nazo madzinza podi na ale ene ali kumadolomero a dziko yapansi.”

¹⁸Pya dzinza ya Zebuloni iye adalonga tenepa: “Komerwa Zebuloni, na maulendo ambachita iwe. Iwembo Isakara komerwa na kukhala kwako pamsuwo.

¹⁹Iwo anachemera alendo kwenda paphiri yawo mbapereka nsembe zakuthema penepo. Iwo anachita phwando na mfuma ya pabara, pontho na mfuma yakubisika m'khundu-khundu mwa bara.”

²⁰Pya dzinza ya Gadi iye adalonga tenepa: “Kuza Mulungu, nyakuchitisa nthembache kukula ule. Gadi ambabwathama mwenemo ninga nkhalamu kukhwadzula mkono na msolo.

²¹Iwo adapisankhulira mbuto zadidiletu za dzikoyo; khundu ya mkadamu idaperekwa kuna iwo, pidagumanyikana pabodzi akadamu a Aisraele. Iwo adachita pyakulungama pinafuna MBUYA pile, mbavera matongero ache.”

²²Pya dzinza ya Dani iye adalonga tenepa: “Dani akhala ninga mwana nkhalamu Iye ambanumpha kubulukira ku Bashani.”

²³Pya dzinza ya Nafitali iye adalonga tenepa: “Nafitali atsanzayiswa pikulu pene na kukoma mtima kwa MBUYA. Dziko yache yafika mpakana kumwera kwa nyanza ya Galilea.”

²⁴Pya dzinza ya Asheri adalonga tenepa: “Asheri ngwakutsanzayiswa pikulu pene kupiringana madzinza anango. Iye mbakhale wakufunikaletu pakati pa abale ache mbasambisa manyalo ache na mafuta aolivi.

²⁵Maluwani ache mbatchinjirizwe na misuwo yasimbi, pontho iye mbakhale pakupata moyo wache onsene.”

²⁶Nkhabe mbodzi unango ninga Mulungu wa Israele, ule ambapakira pamakole a kuthambo, mbagwanda na demelero m'makole kukuphedzani.

²⁷Mulungu ndzidzi onsene ndi nyakukutchinjirizani; mphamvu zache zakukhala na kukhala zimbakuikhirani kunduli. Iye athamangisa anyamalwanu pamaso panu mbakupangani kuti muavunge onsene.

²⁸Natenepo Israele yekha ene ali pamtendere. Pidzukulu pya Yakobo pili pakupata m'dziko ya mapira na vinyu wachinchino, kule kumbagwa bume kubulukira kudzulu.

²⁹Nyakutsanzaya pikulu ndiwe Israele! Mbani pontho sasawa na iwe, anthu akupulumuswa na MBUYA? Iye ntchakugedera matswimo chanu kukutchinjirizani, pontho talasadanu yakukunda nayo. Anyamalwanu anabwera kukupemphani kuti muavere nsisi, tenepo imwe munapondedza pansi.