Read cisena DEUTERONOMO 34 Bible Online

DEUTERONOMO 34 - cisena bible

DEUTERONOMO 34

¹Mose adakwira phiri ya Nebo kubulukira kumaphedi a Moabu, mbaenda pansonga ya phiri ya Pisiga kumabulukiro dzuwa a mzinda wa Yeriko. Kweneko MBUYA adamuonesa dziko yonsene: nthemba ya Gileadi mpakana kumpoto kwa luwani ya Dani;

²nthemba yonsene ya Nafitali; nthemba ya Eferemu na Manase; nthemba yonsene ya Yuda kufikirana kumadokero dzuwa a Bara ya Mediterania;

³thando yatchetcha ya Negebu; pontho na phedi yakufika ku Yeriko, mzinda wa miti yamdikhwa, kubulukira ku Zoari.

⁴Tenepo MBUYA adalonga kuna Mose mbati, “Yeneyi ndi dziko idadumbira ine kuna Abrahamu, Isake na Yakobo kuti ndinaipereka kuna pidzukulu pyawo. Ine ndakutawirisa kuiona kwene, kwache hunaipita tayu.”

⁵Penepo Mose, nyabasa wa MBUYA, adafa m'dziko ya Moabu ninga mukhadapilongera MBUYA.

⁶MBUYA adamfikhira m'phedi ya Moabu yakuyang'anisana na luwani ya Beti-Peori, kwache na lero nkhabe munthu anadziwa mbuto chadi-chadi idafikhirwa iye tayu.

⁷Mose akhali na pyaka dzana na makumawiri pidafa iye; iye akhali munthu wamphamvu basi mpakana kufa kwache, pontho maso ache akhali mwadidi basi.

⁸Aisraele adamsintili nsiku makumatatu m'phedi ya Moabu.

⁹Yoswa mwana Nuni adadzazwa na nzeru, thangwi Mose akhadamsankhula kupita mbuto yache. Aisraele adavera Yoswa mbakoya matongero onsene adaapasa MBUYA kudzera muna Mose.

¹⁰Chipo nee mukhali mprofeti mu Israele ninga Mose tayu; MBUYA adalonga naye maso na maso.

¹¹Chipo nee mprofeti achita pidzindikiro na pyakudodomesa ninga pile pidamtuma MBUYA Mose kupichita kuna mfumu wa ku Iguputo, mathubu ache na kuna dziko yonseneyo tayu.

¹²Chipo nee mprofeti unango adachita pinthu pikulu pontho pyakuchitisa mantha ninga pile pidachita Mose pamaso pa Aisraele onsene tayu.