Read cisena DEUTERONOMO 4 Bible Online

DEUTERONOMO 4 - cisena bible

DEUTERONOMO 4

¹Tenepo Mose adalonga kuna anthu mbati, “Verani matongero onsene anakufunzisani ine, tenepo imwe munakhala na moyo mbamupokosera dziko inakupasani MBUYA Mulungu wa makolo anuyi.

²Lekani thimizira chinthu na chibodzi chene pana mwambo wakupasani inewu, pontho lekani kubulusapo chinthu na chibodzi chene. Verani matongero a MBUYA Mulungu wanu akupasani inewa.

³Imwe ene mudaona pinthu pikulu pidachita MBUYA pa Baala-Peori. Iye adavunga munthu onsene akhapembedza Baala penepo,

⁴mbwenye anango a imwe ale akhali akukhulupirika kuna MBUYA Mulungu wanu ana moyo na lero.

⁵“Yang'anani, ine ndakufunzisani matongero onsene ninga montho mudandipangirambo MBUYA Mulungu wanga kuti ndipichite. Avereni matongerowo m'dziko ina imwe chifupi kuikwata na kukhalamoyi.

⁶Verani mwambowu mwakukhulupirika, tenepo penepi pinaonesa anthu a madzinza anango kuti imwe muna nzeru pyakwanga. Iwo angava pya matongero onsenewa, analonga mbati, ‘Dzinza ikuluyi njanzeru, pontho yakuvesa pinthu pyakwanga!’

⁷“Nkhabe dzinza inango, podi ikule pyayo tani, ina mulungu ule ali chifupi pyakwanga ndzidzi unamfuna iwo ninga MBUYA Mulungu wathu kuna ife. Iye ambatitawira ndzidzi onsene unamchemera ife kuti atiphedzewo.

⁸Nkhabe dzinza inango tayu, podi ikule pyayo tani, ina mwambo wakulungama pyakwanga ninga mwambo wakupasani ine lerowu.

⁹Khalani m'maso! Onesesani ndzidzi onsene unakhala imwe na moyo kuti muleke duwalira pinthu pyaona imwe na maso anu. Pangani ananu na pidzukulu pyanu

¹⁰pya nsiku idaimira imwe pamaso pa MBUYA Mulungu wanu paphiri ya Sinai,[4] pidalonga iye kuna ine mbati, ‘Gumanyisa anthu. Ine ndinafuna ave pinafuna ine kulonga, towera adziwe kundivera ndzidzi onsene unakhala iwo na moyo pontho kuti iwo afunzisembo anawo kuchita chibodzi-bodzi.’

¹¹“Pangani ananu pya mule mudendera imwe kaimira m'tchinde mwa phiri idagudumirwa na moto wakuyerima, pontho na mdima wakugoswa wa makole akuswipa akufika mpakana kuthambo.

¹²Apangeni mudalongera MBUYA kuna imwe kubulukira m'moto mule, pontho na mule mudamvera imwe akulonga, kwache mbamukhonda kumuona na pang'ono pene tayu.

¹³Iye adakupangani pinthu pyathema imwe kuchita kuti mukoye chiverano chidasasanya iye na imwe. Imwe mwathema kuvera Matongero Khumi, adalemba iye pamiyala miwiri ile.

¹⁴MBUYA adandipanga kuti ndikufunziseni matongero athema imwe kuavera m'dziko ina imwe chifupi kuikwata, pontho na kukhalamoyi.

¹⁵“Pidalonga MBUYA kuna imwe m'moto paphiri ya Sinai, imwe nee mudamuona na pang'ono pene tayu. Na thangwi ya kukufunirani udidi, onesesani

¹⁶kuti nee mukudawa tayu pakupisasanyira mwekha ene mfanikizo wa mtundu onsene, penu mamuna penu mkazi,

¹⁷nyama penu mbalame,

¹⁸pyakukambadza penu nsomba.

¹⁹Lekani yeswa pakupembedza na kutumikira pinthu pinaona imwe kuthambopi, penu dzuwa, mwezi na nyenyezi. MBUYA Mulungu wanu apereka penepi kuna madzinza anango onsene kuti apipembedze.

²⁰Mbwenye imwe ndimwe anthu adaombola iye kudziko ya Iguputo, dzenje yakuyerima moto ile. Iye adakubulusani mbakuchitisani kukhala anthu ache ninga muna imwe leromu.

²¹Na thangwi ya imwe MBUYA Mulungu wanu adandizhangalira mbadumbira kuti ine sinawambuka mkulo wa Yorodani tayu kupita m'dziko ya mataka akubalisa pinthu inakupasani iyeyi.

²²Ine ndinati ndife m'dziko muno mbandikhonda kuwambuka mkulo, mbwenye imwe muli chifupi kuwambuka mkulo kakwata dziko ya mataka akubalisa pinthu.

²³Onesesani kuti muleke duwalira chiverano chidasasanya MBUYA Mulungu wanu na imwe. Verani matongero ache nee kupisasanyira mwekha ene mifanikizo ya mtundu onsene tayu kuti muipembedze,

²⁴thangwi MBUYA Mulungu wanu akhala ninga malulume a moto; iye ngwantchanje.

²⁵“Podi kwene kuti imwe mwakhala ndzidzi ukulu ene, pontho kuti muna ana na pidzukulu, lekani kudawa pakupisasanyira mfanikizo wa mtundu onsene kuti muupembedze. Penepi mphyakuipa pamaso pa MBUYA, tenepo pinamchitisa kuzhangali.

²⁶Kudzulu na dziko yapansi ndi mboni yanga wakupokanyisana namwe lero kuti ngakhala imwe munakhonda kundivera chinchino pano munamala vungika. Imwe nkhabe dzakhala na moyo wakulapha tayu m'dziko ili kumtunda unango wa mkulo wa Yorodani, pontho ina imwe chifupi kuikwata. Imwe munavungwa monsene mwene.

²⁷MBUYA anakubalalisani pakati pa madzinza anango, kule kunafuna dzasalira na moyo anthu akuchepa a imwe.

²⁸Kweneko munatumikira milungu yakusasanywa na manja a anthu, milungu yamiti na yamiyala, ile nkhabe kwanisa kuona penu kuva, kudya penu kununkhiza tayu.

²⁹Kweneko munasaka-saka MBUYA Mulungu wanu, tenepo ngakhala imwe munamsaka-saka na mtimanu onsene, munamgumana.

³⁰Ndzidzi unaona imwe nyatwa, pontho pinthu pyonsenepi pingakuchitikirani, penepo pakumalisira pache imwe munati muzungunukire kuna MBUYA mbamumvera.

³¹Iye ndi Mulungu wa nsisi. Iye nkhabe dzakukhondani penu kukuvungani tayu, pontho iye nkhabe dzaduwalira chiverano chidasasanya iye mwenechiro na makolo anu chile tayu.

³²“Chinchino vunza-vunzani pya kale, ndzidzi ule mudzati balwa, m'nduliletu ndzidzi udalenga Mulungu munthu padziko yapansi ule. Vunzani pya dziko yonsene yapansi. Ayi chipo chinthu chikulu ninga chenechi chidatoma chachitikapo? Ayi chipo munthu adatoma kuva pinthu ninga penepi?

³³Ayi anthu anango adakhalapo na moyo pidava iwo Mulungu akulonga kuna iwo kubulukira m'moto ninga mwachitira imwemu?

³⁴Ayi pana mulungu unango ule adawanga mtima kwenda kakwata anthu kubulukira kuna dzinza inango mbaachitisa kukhala anthu ache, ninga pidakuchitirani MBUYA Mulungu wanu m'dziko ya Iguputo? Pamaso panu iye adaphatisa basa mphamvu zache zikulu; iye adagwisa miliri na nkhondo, adachita pidzindikiro na pyakudodomesa, mbachitisa pinthu pyakugoswa kuchitika.

³⁵MBUYA akuonesani penepi, kutsikimizira kuti iye ene basi ndi Mulungu, pontho kuti nkhabeve unango tayu.

³⁶Iye adakutawirisani kuva falache kubulukira kudzulu towera akufunziseni; pontho padziko yapansi pano adakutawirisani kuona moto ukulu mbalonga kuna imwe kubulukira m'motomo.

³⁷Na thangwi yakuti iye adaafuna makolo anu, iye adakusankhulani, tenepo na mphamvu zache zikulu iye adakubulusani m'dziko ya Iguputo.

³⁸Pikhaenda imwe, iye adathamangisa madzinza akulu-akulu, pontho amphamvu kupiringana imwepo, towera akudzeseni mwenemo mbakupasani dziko yawoyo, dziko ile njanu na lero.

³⁹Tenepo lero kumbukani mbamuleka kuduwalira: MBUYA ndi Mulungu kudzulu na padziko yapansi ene. Nkhabeve unango tayu.

⁴⁰Verani mwambo onsene wakupasani ine lerowu, tenepo pyonsene pinakufambirani mwadidi imwe na pidzukulu pyanu pene. Imwe munathimiza kukhala na moyo m'dziko inakupasani MBUYA Mulungu wanu kukhala yanu ene kwenda na kwendayi.”

⁴¹Tenepo Mose adapambula mizinda mitatu kumabulukiro dzuwa a mkulo wa Yorodani,

⁴²kule mbakudakwanisa munthu kuthawirako kuti akakhale pakupata ngakhala adapha munthu unango mwasusudewu, munthu wakuti si nyamalwache tayu. Iye mbadakwanisa kuthawira ku ubodzi mwa mizinda yeneyi mbakhonda phiwa.

⁴³Kudzinza ya Rubeni kukhali mzinda wa Bezeri m'thando yatchetcha ya pamapiri, kudzinza ya Gadi kukhali mzinda wa Ramoti m'nthemba ya Gileadi; pontho kudzinza ya Manase kukhali mzinda wa Golani m'nthemba ya Bashani.

⁴⁴Ufu ndi mwambo wa Mose udapasa iye Aisraele, pontho na pifunziso pene.

⁴⁵Ndzidzi wenewu ngule udabuluka iwo m'dziko ya Iguputo mbakhala paphedi kumabulukiro dzuwa a mkulo wa Yorodani, kuyang'anisana na luwani ya Beti-Peori pikhaapasa iye mwambo wenewu. Yeneyo ikhali nthemba ya Mfumu Sihoni wa Aamori, akhadatonga kuluwani ya Heshiboni ule. Mose na Aisraele adamkunda ndzidzi udabuluka iwo m'dziko ya Iguputo ule.

⁴⁶

⁴⁷Iwo adakwata dziko yache na dziko ya Mfumu Ogi wa ku Bashani, mfumu unango wa Aamori akhakhala kumabulukiro dzuwa a mkulo wa Yorodani ule.

⁴⁸Dziko yeneyi idafumuka mpakana kuphiri ya Sirioni,[5] yeneyi ndi, phiri ya Herimoni, kubulukira kuluwani ya Aroeri pankhomole ya mkulo wa Arinoni.

⁴⁹Iyo idathimiza pontho nthemba yonsene yakumabulukiro dzuwa a mkulo wa Yorodani kwenderatu ku Nyanza Yakufa, pontho kumabulukiro dzuwa a Nyanza Yakufa m'tchinde mwa phiri ya Pisiga.