Read cisena DEUTERONOMO 5 Bible Online

DEUTERONOMO 5 - cisena bible

DEUTERONOMO 5

¹Mose adachemera pabodzi Aisraele onsene mbalonga kuna iwo mbati, “Aisraele anzanga ngaveserani mwambo wa Mulungu unakupasani ine lerowu. Ufunzeni pontho onesesani kuti mukuuvera.

²Paphiri ya Sinai MBUYA Mulungu adasasanya chiverano,

³nee na makolo anu okha tayu mbwenye na ife tonsene tina moyo lerofe.

⁴Paphiripo MBUYA adalonga kuna imwe maso na maso kubulukira m'moto.

⁵Ine ndidaimira pakati pa imwe na MBUYA ndzidzi wenewo kukupangani pikhalonga iye, thangwi imwe mukhachita mantha na moto, pontho nee mbamudenda paphiripo tayu. “MBUYA adalonga mbati,

⁶‘Ine ndine MBUYA Mulungu wako, ule adakubulusa m'dziko ya Iguputo, kukhali iwe paubitchu kule.

⁷“‘Leka pembedza milungu inango, mbwenye ine ene basi.

⁸“‘Leka kupisasanyira wekha ene mfanikizo wa chinthu chonsene cha kudzulu penu wa padziko yapansi penu m'madzi penu pansi pa mataka.

⁹Leka lambira mifanikizo penu kuipembedza, thangwi ine ndine MBUYA Mulungu wako pontho ndine wantchanje. Ine ndimbatchunyusa anthu ambandizonda ale pontho pidzukulu pyawo mpakana mfendu wachitatu na chinayi.

¹⁰Mbwenye ndimbaonesa kuafuna kwanga kokhonda mala kuna pikwi-pikwi pya mifendu[6] ya anthu ambandifuna mbavera mwambo wanga ale.

¹¹“‘Leka thula dzinanga papezi, thangwi ine, MBUYA Mulungu wako, ndinatchunyusa munthu onsene anaphatisa basa dzinanga papezi.

¹²“‘Koya Nsiku Yakupuma, kuichitisa kukhala yakupambulika ninga mwakutongera ine, MBUYA Mulungu wako.

¹³Pana nsiku zitanthatu zinakwanisa iwe kuphata mabasako,

¹⁴mbwenye nsiku yachinomwe ndi Nsiku Yakupuma yakupambulika kuna ine. Pansiku yeneyo nkhabe munthu na mbodzi ene athema kuphata basa tayu, nee iwe penu anako, nee mabitchu ako, penu pifuyo pyako, penu mlendo ali m'dziko mwakomo tayu. Mabitchu ako athemambo kupuma ninga mumbachitira iwe.

¹⁵Kumbuka kuti iwe ukhalimbo bitchu m'dziko ya Iguputo, pontho ine MBUYA Mulungu wako ndidakupulumusa na mphamvu zanga zikulu. Ndi thangwi yache ndidakutonga kuti ukoye Nsiku Yakupuma.

¹⁶“‘Lemedza babako na mako, ninga mumbakutongera ine MBUYA Mulungu wako, towera pyonsene pikufambire mwadidi pontho kuti ukhale na moyo wakulapha m'dziko inafuna kukupasa ineyi.

¹⁷“‘Leka chita upandu.

¹⁸“‘Leka chita uputa.

¹⁹“‘Leka kuba.

²⁰“‘Leka pambizira mwanzako.

²¹“‘Leka sirira mkazi wa mwanzako, leka sirira nyumbache, leka sirira mbuto yache, mabitchu ache, ng'ombe zache, mabulu ache penu chinthu chonsene cha mwanzako.’

²²“Enewa ndi matongero adapereka MBUYA kuna imwe monsene ndzidzi udagumanyikana imwe paphiri pale. Pidalonga iye na fala yamphamvu kubulukira m'moto pontho m'makole akuswipa, iye adapereka matongero enewa nee anango tayu. Kubuluka penepo iye adalemba papyakulemberapo pyamiyala piwiri mbapipereka kuna ine pano.

²³“Pidakalangira moto paphiri yonsene, imwe mbamuva fala kubulukira mumdima, akadamu na akulu-akulu a dzinzanu adadza kuna ine

²⁴mbalonga mbati, ‘MBUYA Mulungu wathu ationesa ukulu na demelero yache pidamva ife akulonga kubulukira m'moto! Lero tapiona tekha kuti mphyakukwanisika kuna munthu kuthimiza kukhala na moyo, podi kwene kuti Mulungu alonga kuna iye.

²⁵Apo chinafuna kufera ife ninji? Moto wakugoswa ule unativunga. Ife tinati tife tingava pontho MBUYA Mulungu wathu akulonga kuna ife.

²⁶Ayi munthu unango adakhalapo na moyo pidava iye Mulungu wa moyo akulonga kubulukira m'moto?

²⁷Mose, bwerera ukave pyonsene pyalonga MBUYA Mulungu wathu. Ungamala ubwere udzatipange pidalonga iye kuna iwe. Ifembo tinapivesera mbatidzapivera.’

²⁸“Pidava MBUYA penepi, adalonga kuna ine mbati, ‘Ine ndava pyalonga anthuwa; iwo alonga pyakuona.

²⁹Sha! Mbapidakhala pyadidi iwo mbadapifuna ndzidzi onsene kundilemedza na kuvera matongero anga onsene, towera pinthu pyawo pyonsene piafambire mwadidi, iwo na pidzukulu pyawo pene kwenda na kwenda.

³⁰Ndoko kaapange kuti abwerere kumakumbi kwawo.

³¹Mbwenye, iwe Mose, salira kuno na ine, tenepo ndinakupasa mwambo na matongero anga onsene. Pifunzise kuna anthu, towera iwo apivere m'dziko inafuna kuapasa ineyi.’

³²“Imwe Aisraele onesesani kuti mukuchita pyonsene pyakutongani MBUYA Mulungu wanu. Lekani khonda vera mwambo wache na ubodzi ene.

³³Verani Mwambo onsene wa MBUYA Mulungu wanu, towera pyonsene pikufambireni mwadidi pontho kuti muthimize kukhala m'dziko inafuna kakwata imwe kukhala yanu ene ile.