Read cisena DEUTERONOMO 6 Bible Online

DEUTERONOMO 6 - cisena bible

DEUTERONOMO 6

¹“Enewa ndi matongero onsene adandipanga MBUYA Mulungu wanu kuti ndikufunziseni. Avereni m'dziko inafuna imwe kakwata kukhala yanu ene chinchinoyi.

²Ndzidzi unakhala imwe na moyo, imwe na pidzukulu pyanu mwathema kulemedza MBUYA Mulungu wanu pontho kuvera mwambo wache onsene unakupasani inewu, towera mukhale na moyo wakulapha m'dzikoyo.

³Avesereni, imwe Aisraele mbamuavera! Tenepo pyonsene pinakufambirani mwadidi mbamukhala dzinza yamphamvu, pontho munakhala m'dziko yamphonje, ninga montho mudadumbirira MBUYA, Mulungu wa makolo athu.

⁴“Aisraele, kumbukani ipi! MBUYA ndi Mulungu wathu, iye ndi MBUYA mbodzi ene basi.

⁵Mfune MBUYA Mulungu wako na mtimako onsene, na moyo wako onsene, pontho na mphamvu zako zonsene.

⁶Lekani duwalira na pang'ono pene matongero anakupasani ine lerowa.

⁷Afunziseni kuna ananu. Alongeni ndzidzi una imwe kumusa kwanu, ndzidzi una imwe kutali, ndzidzi unapuma imwe, pontho ndzidzi unaphata imwe basa.

⁸Amangirireni pamkono panu mbamuavala papipumu panu ninga chikumbuso.

⁹Alembeni pamisuwo ya nyumba zanu pontho pamisuwo ya mipandanu.

¹⁰“Ninga mudadumbirira MBUYA Mulungu wanu kuna makolo anu Abrahamu, Isake na Yakobo, iye anakupasani dziko na mizinda mikulu-mikulu idakhonda imwe manga ile.

¹¹Nyumba zinadzala na pinthu pyadidi pidakhonda imwe kupiikhamo, pontho mwenemo munakhala michera idakhonda imwe kumba, pontho mfesa na miti yaolivi pidakhonda imwe bzala pile. MBUYA angakudzesani m'dziko yeneyi mbamugumana pyonsene pinafuna imwe kudya,

¹²onesesani kuti muleke duwalira MBUYA adakupulumusani kudziko ya Iguputo, kukhali imwe mabitchu kule.

¹³Lemedzani MBUYA Mulungu wanu, mpembedzeni iye ene basi, mbamudumbira na dzinache ene basi.

¹⁴Lekani pembedza milungu inango, milungu ya anthu akuzunguliraniwa.

¹⁵Ngakhala munapembedza milungu inango, kuzhangali kwa MBUYA kunadza pana imwe ninga moto mbakukuvungani monsene mwene, thangwi MBUYA Mulungu wanu, ali pakati panu ule, ngwantchanje.

¹⁶“Lekani yesa MBUYA Mulungu wanu ninga mudachitira imwe pa Masa pale.

¹⁷Onesesani kuti mwavera mwambo onsene wakupasani iye ule.

¹⁸Chitani pinthu pyakulungama pontho pyadidi pamaso pa MBUYA, tenepo pinthu pyanu pyonsene pinakufambirani mwadidi. Imwe munakwanisa kukwata dziko ya mataka akubalisa pinthu idadumbira MBUYA kuna makolo anu ile,

¹⁹tenepo imwe munathamangisa anyamalwanu ninga mudadumbira iye.

²⁰“Ndzidzi unadzawo ananu angakuvunzani kuti, ‘Ninji MBUYA Mulungu wathu adatitonga kuti tivere matongero onsenewa?’

²¹Dzaapangeni kuti, ‘Ife tikhali mabitchu a mfumu wa dziko ya Iguputo, tenepo MBUYA adatipulumusa na mphamvu zache zikulu.

²²Na maso athu tidamuona akuchita pyakudodomesa pontho pinthu pyakugoswa kuna anthu a ku Iguputo na kuna mfumu wawo, pontho na kuna mathubu ache onsene.

²³Iye adatisudzula kutibulusa ku Iguputo. Tenepo adatidzesa kuno mbatipasa dziko yeneyi ninga mudadumbira iye kuna makolo athu.

²⁴Natenepo MBUYA Mulungu wathu adatitonga kuti tivere matongero onsenewa pontho kumulemedza. Ngakhala tinachita tenepo, iye ndzidzi onsene anatchinjiriza dzinzathu mbaichitisa kwenda m'tsogolo.

²⁵Ngakhala tinavera mwakukhulupirika pyonsene pyatitonga MBUYA, iye anakomerwa nafe.’