Read cisena DEUTERONOMO 7 Bible Online

DEUTERONOMO 7 - cisena bible

DEUTERONOMO 7

¹“MBUYA Mulungu wanu anakudzesani m'dziko inafuna imwe dzakwata kukhala yanu ene ile mbathamangisa madzinza mazinji. Ndzidzi unaenda imwe m'tsogolo, iye anathamangisa madzinza akulu-akulu manomwe pontho amphamvu kupiringana imwepo: Ahiti, Agirigashi, Aamori, Akanani, Aperizi, Ahivi na Ayebusi.

²MBUYA Mulungu wanu angaikha anthu enewa m'manja mwanu mbamuakunda, imwe mwathema kuapha onsene. Lekani phatizana nawo penu kuavera nsisi na pang'ono pene.

³Lekani semberana nawo, pontho lekani tawirisa ananu achimuna kusemba anawo na mbodzi ene, penu ana achikazi kusembwa na anawo,

⁴thangwi iwo anachitisa ananu kubauka kubuluka kuna ine MBUYA kupembedza milungu inango. Ngakhala penepi pinachitika, MBUYA anakuzhangalirani mbakuvungani kabodzi kene.

⁵Tenepo gomolani maguwawo, swani piguwa pyawo pyakupambulika, gwanda-gwandani adzimunthu awo a milungu Ashera, pontho pisani mifanikizo imbapembedza iwo.

⁶Chitani penepi thangwi imwe ndimwe ache a MBUYA Mulungu wanu. Kubulukira kuna anthu onsene a pansi pano iye adakusankhulani imwe kukhala anthu ache akupambulika.

⁷“MBUYA hadakufuneni mbakusankhulani thangwi imwe mukhali akuinjipa kupiringana madzinza anangowa tayu; imwe mukhali dzinza ing'onoletu padziko yapansi.

⁸Mbwenye MBUYA adakufunani mbafuna kukoya kudumbira kudachita iye kuna makolo anu. Ndi thangwi yache iye adakupulumusani na mphamvu zache zikulu mbakusudzulani paubitchu wa mfumu wa ku Iguputo.

⁹Kumbukani kuti MBUYA Mulungu wanu ndi Mulungu yekha ene basi, pontho iye ngwakukhulupirika. Iye anakoya chiverano mbaonesa kuafuna kwache kokhonda mala mifendu pikwi ya anthu ale ambamfuna mbavera matongero ache,

¹⁰mbwenye iye nkhabe dzadembuka kutchunyusa anthu ambamzonda ale tayu.

¹¹Tenepo chinchino verani pyonsene pyafunziswa imwe pile; verani matongero onsene akupasani ine lerowa.

¹²“Ngakhala imwe munavesera matongero enewa mbamuavera mwakukhulupirika, penepo MBUYA Mulungu wanu anathimiza kukoya chiverano chache na imwe mbakuonesani kukufunani kwache kokhonda mala ninga mudachitira iye kuna makolo anu.

¹³Iye anakufunani mbakutsanzayisani mwakuti munainjipa mbamukhala na ana azinji; iye anatsanzayisa mindanu mbidzabala mapira, vinyu, pontho na mafuta aolivi; iye anakutsanzayisani pakukupasani pifuyo pizinji. Iye anakupasani mtsanzayiso onsenewu m'dziko idadumbira iye kuna makolo anu ile.

¹⁴Nkhabe anthu anango anatsanzayiswa pikulu ninga imwe tayu. Nkhabe mbodzi wa imwe anasowa ana tayu, pontho nkhabe chifuyo chanu na chibodzi chene chinasowa ana tayu.

¹⁵MBUYA anakutchinjirizani kuna utenda, pontho iye nkhabe dzagwisa pana imwe utenda wakupha udaona imwe m'dziko ya Iguputo ule tayu, m'mbuto mwache iye anaugwisa pana anyamalwanu.

¹⁶Vungani dzinza yonsene inaikha MBUYA m'manja mwanu, pontho lekani kuavera nsisi. Lekani pembedza milungu yawo, thangwi penepyo pinakhala msampha kuna imwe.

¹⁷“Lekani kulonga mwekha ene kuti, ‘Madzinza enewa ngamphamvu kupiringana ife pano mwakuti ife nkhabe kwanisa kuathamangisa tayu.’

¹⁸Lekani chita nawo mantha; kumbukani pinthu pidachita MBUYA Mulungu wanu kuna mfumu wa ku Iguputo na anthu ache onsene.

¹⁹Na maso anu imwe mudaona miliri yakugoswa, pyakudodomesa na pidzindikiro, pontho mphamvu zikulu zidakupulumusani na MBUYA Mulungu wanu zile. Ninga montho mudachitira iye kuvunga Aiguputo, iye anachita chibodzi-bodzi kuvunga anthu onsene anagopa imwe chinchinowa.

²⁰Iye pontho anaachitisa kukhala pampani-pani[7] mbavunga onsene akuthawa kuti akabisale ale.

²¹Tenepo lekani chita nawo mantha anthu enewa. MBUYA Mulungu wanu ali namwe; iye ndi Mulungu wamkulu, pontho ule athema kugopiwa.

²²MBUYA Mulungu wanu anathamangisa madzinza enewa patsogolo panu pang'ono na pang'ono. Imwe nkhabe dzatawiriswa kuavunga kabodzi kene tayu gopesera nyama zam'tsanga zinainjipa kukuzungulirani.

²³MBUYA anaikha anyamalwanu m'manja mwanu mbaachitisa kukhala pampani-pani kufikirana amale vungwa.

²⁴Iye anaikha mafumu awo m'manja mwanu. Imwe munaapha, tenepo anaduwalika. Nkhabe na mbodzi ene anafuna kwanisa kuthimbana namwe tayu; imwe munavunga munthu onsene.

²⁵Pisani mifanikizo imbapembedza iwo. Lekani sirira siliva penu golidi pina iwopyo, pontho lekani kupikwata. Ngakhala imwe munachita tenepo, ipyo pinakhala msampha kuna imwe, thangwi MBUYA ambazonda kupembedza milungu inango.

²⁶Lekani pitisa na ubodzi ene wa mifanikizo yeneyi m'nyumba mwanu, gopesera dzedze ina iwoyo inagwera pana imwepo. Imwe mwathema kukhonda pontho kuizonda mifanikizo yeneyi, thangwi iyo njakutembererwa na MBUYA.