Read cisena DEUTERONOMO 8 Bible Online

DEUTERONOMO 8 - cisena bible

DEUTERONOMO 8

¹“Verani mwakukhulupirika matongero onsene akupasani ine lerowa, towera mukhale na moyo, pontho muinjipe mbamukwata dziko idadumbira MBUYA kuna makolo anu ile.

²Kumbukani mule mudakutsogolerani MBUYA Mulungu wanu paulendo wakulaphawu wakugwanda na m'thando yatchetcha pyaka makumanayi pyagwandapyo, kutumiza pinthu pyakunensa kukuyesani, towera iye adziwe pya mumtima mwanu ngakhala imwe munavera matongero ache penu tayu.

³Iye adakuchitisani kukhala na njala mbakupasani mana kuti mudye, pyakudya pile pyakuti imwe na makolo anu ene chipo nee mudzati mwapidya tayu. Iye adachita tenepo kukuonesani kuti munthu nkhabe khala na moyo na mkate okha tayu, mbwenye na mafala onsene analonga MBUYA.

⁴Ndzidzi wa pyaka makumanayiwu nguwo zanu nee zidasakale penu manyalo anu kubzimba tayu.

⁵Kumbukani kuti MBUYA Mulungu wanu ambakulangani ninga montho mumbachitira baba kulanga anache.

⁶Tenepo chitani ninga mudakutongerani MBUYA kukhala mwakuteweza matongero ache mbamumgopa.

⁷MBUYA Mulungu wanu akukudzesani m'dziko ya mataka akubalisa pinthu, dziko ya mikulo na mphuno za madzi, migelo ya madzi akufamba pansi pa mataka akutumbukira m'maphedi na m'pitunda ile;

⁸dziko ile imbabala tirigu na barele, mfesa, makuyu, ntheme, nsapo zaolivi na uchi.

⁹Kweneko imwe nkhabe dzakhalave na njala penu dzasowa pinthu tayu. M'miyalache muna simbi pontho m'mapiri mwache munakwanisa kukumbamo nkuwa.

¹⁰Imwe munakhala na pyonsene pinafuna imwe kuti mudye, tenepo munapereka takhuta kuna MBUYA Mulungu wanu thangwi ya dziko ya mataka akubalisa pinthu yakupasani iyeyi.

¹¹“Onesesani kuti mukhonde duwalira MBUYA Mulungu wanu; lekani chimwana kuvera mwambo wache na ubodzi ene unakupasani ine lerowu.

¹²Mungakhala na pyonsene pinafuna imwe kudya na kumanga nyumba zanu zadidi kukhalamo,

¹³pontho ng'ombe na mabiranu, siliva na golidi wanu na pinthu pyonsene pina imwe pingathimizirika,

¹⁴onesesani kuti muleke sanduka akutumbama mbamuduwalira MBUYA Mulungu wanu, adakupulumusani kudziko ya Iguputo ule kukhali imwe mabitchu.

¹⁵Iye adakutsogolerani m'thando ikulu yatchetcha pontho yakugoswa, mule mukhali nyoka za ukali na akong'a. M'dziko yeneyi yakuuma pontho yakusowa madzi, iye adachitisa madzi kukuka kubulukira m'mwala kuti imwe mumwe.

¹⁶M'thandomo iye adakupasani mana kuti mudye, pyakudya pyakuti nee makolo anu adapidya tayu. Iye adatumiza pinthu pyakunensa pana imwe kukuyesani, towera pakumalisira pache akutsanzayiseni na pinthu pyadidi.

¹⁷Tenepo lekani nyerezera kuti mwapichita mwekha ene kukhala akufuma na mphamvu pontho nzeru zanu.

¹⁸Kumbukani kuti ndi MBUYA Mulungu wanu ambakupasani mphamvu zakuti mufume ule. Iye ambachita penepi thangwi iye athimiza kukhala wakukhulupirika na lero kuna chiverano chidachita iye na makolo anu chile.

¹⁹Lekani duwalira MBUYA Mulungu wanu na pang'ono pene penu kuzungunukira kuna milungu inango mbamuipembedza. Ngakhala munachita tenepo, lero ndikukucheuzani kuti imwe munati muvungwe.

²⁰Ngakhala imwe munakhonda kuvera MBUYA, penepo munati muvungwe ninga madzinza anafuna iye dzavunga pinaenda imwe m'tsogolo ale.