Read cisena DEUTERONOMO 9 Bible Online

DEUTERONOMO 9 - cisena bible

DEUTERONOMO 9

¹“Veserani kuno Aisraele! Lero imwe muli chifupi kuwambuka mkulo wa Yorodani pontho kakwata dziko ya madzinza akulu pontho amphamvu kupiringana imwepo. Mizindawo njikulu yakutchingwa na mpanda wakuphata kuthambo.

²Anthu achewo ngakulapha pontho amphamvu; iwo mphidzukulu pya Aanakimu, anyakujintcha, pontho imwe mwapiva pikulongwa kuti nkhabe na mbodzi ene anakwanisa kuimisana nawo tayu.

³Mbwenye chinchino munati mupione mwekha ene kuti MBUYA Mulungu wanu anati aende patsogolo panu ninga moto wakugaka. Iye anati akunde ndzidzi unaenda imwe, towera imwe muathamangise mbamuakunda kabodzi kene ninga mudadumbira iye.

⁴MBUYA Mulungu wanu angamala kuathamangisa lekani longa mwekha ene kuti iye adakuchitisani kukwata dzikoyi, thangwi iyo idathema kukhala yanu ene. Nkhabe, MBUYA anati athamangise anthu enewa m'mbuto mwanu thangwi iwo mbanthu akudawika.

⁵Si thangwi ndimwe anthu adidi penu akulungama tayu kuti MBUYA akukutawirisani kukwata dziko yawoyo. Iye anati aathamangise thangwi iwo mbanthu akudawika pontho kuti iye anafuna kukoya kudumbira kudachita iye kuna makolo anu, Abrahamu, Isake na Yakobo.

⁶Penepa munakwanisa kupidziwadi kuti MBUYA hakukupasani dziko ya mataka akubalisa pinthu tayu na thangwi yakuti imwe mwathema kuitambira. Nkhabe tayu, imwe ndimwe anthu akuuma mtima.

⁷“Lekani duwalira kuzhangalisa kudachita imwe MBUYA Mulungu wanu m'thando yatchetcha mule. Kutomera pansiku idabuluka imwe m'dziko ya Iguputo kufikirana nsiku idafika imwe kuno, imwe mwampandukira.

⁸Podi na paphiri ya Sinai pene imwe mudamzhangalisa MBUYA, tenepo iye adazhangali pyakwanga mwakuti mbadakwanisa kukuvungani.

⁹Ine ndidakwira paphiri katambira miyala padalembwa chiverano chidasasanya MBUYA na imwe chile. Ine ndidakhala kweneko nsiku makumanayi mosiku na masikati mbandikhonda kudya na kumwa na chinthu chene.

¹⁰Tenepo MBUYA adandipasa pyakulemberapo pyamiyala piwiri pakhadalemba iye ene na manjache pinthu pikhadalonga iye kuna imwe kubulukira m'moto nsiku idagumanyikana imwe paphiri pale.

¹¹Pidamala nsiku makumanayi mosiku na masikati MBUYA adandipasa pyakulemberapo pyamiyala piwiri pakhadalemba iye chiverano pale.

¹²“Tenepo MBUYA adalonga kuna ine mbati, ‘Tchitha kabodzi kene, thangwi anthu ako adatsogolera iwe kubuluka ku Iguputo ale, amala vungika pontho akuchita pyakuipa. Iwo abauka kale kusiya pinthu pidaapanga ine kuti apichite pile, tenepo apisasanyira okha ene mfanikizo wasimbi kuupembedza.’

¹³“MBUYA adalonga pontho kuna ine mbati, ‘Ndadziwa kuuma mtima kwachita anthu enewa.

¹⁴Leka yesa kuakhondesa kuchita pinachita iwopyo. Ndinafuna kuavunga, towera nee na mbodzi ene akumbukweve tayu. Penepo ndinakuchitisa iwe kukhala baba wa dzinza ikulu pontho yamphamvu kupiringana muna iwomu.’

¹⁵“Tenepo ndidazungunuka mbanditchitha paphiri uku ndathukula pyakulemberapo pyamiyala piwiri pakhadalembwa chiverano pale. Malulume a moto akhabulukira paphiri pale.

¹⁶Ine ndidaona kuti mudatoma kale kukhonda vera matongero adakupasani MBUYA Mulungu wanu ale, pontho kuti mudamdawira pakupisasanyira mwekha ene mfanikizo wa mwanamphulu wasimbi kuti muupembedze.

¹⁷Tenepo pamaso panu ndidaponya pansi pyakulemberapo pyamiyala pile mbapisweka m'mapindi-mapindi.

¹⁸Ndidalamba pamaso pa MBUYA nsiku makumanayi mosiku na masikati mbandikhonda kumwa penu kudya na chinthu chene. Ine ndidachita tenepo thangwi imwe mudadawira MBUYA, pontho mudamzhangalisa.

¹⁹Ine ndikhachita mantha na ukali wa MBUYA, thangwi iye adazhangali pyakwanga mwakuti mbadakuvungani; kwache MBUYA adandivesera pontho.

²⁰MBUYA adazhangalira pontho pyakwanga Aroni mwakuti mbadampha, natenepo ndidampempherera Aroni na ndzidzi onthowo.

²¹Ine ndidakwata chinthu chakudawika chidasasanya imwe chile, mwanamphulu wasimbi ule mbandichiponya pamoto. Ndidachinyedza-nyedza, ndidachipeya peya mbandiponya fumbi yache mumkhwawa umbakuka kubulukira m'phiri ule.

²²“Imwe mudazhangalisa pontho MBUYA Mulungu wanu pikhali imwe ku Tabera, Masa na Kibiroti Hataava.

²³Pontho pidakugwinyani iye kubuluka ku Kadeshi Barinea mbakupangani kwenda kakwata dziko ikhakupasani iye ile kukhala yanu ene, imwe mudampandukira mbamukhonda kumnyindira penu kumvera.

²⁴Kutomera ndzidzi udakudziwani ine, imwe mwapandukira MBUYA.

²⁵“Natenepo ndidalamba pansi pamaso pa MBUYA nsiku makumanayi mosiku na masikati, thangwi ndidapidziwa kuti iye akhachita phinga kukuvungani.

²⁶Tenepo ndidapemphera kuti, ‘MBUYA Mulungu, lekani vunga anthu anu, anthu adapulumusa imwe na kuabulusa m'dziko ya Iguputo na mphamvu zanu zikulu ale.

²⁷Kumbukani anyabasanu, Abrahamu, Isake na Yakobo, pontho lekani ikha konta kuuma mtima, kudawika, pontho na pyakudawa pya anthu enewa,

²⁸gopesera anthu a ku Iguputo anati alonge kuti imwe mudachimwana kuaendesa anthu anu kudziko idadumbira imwe kuna iwo ile. Iwo anati alonge kuti imwe mudakwata anthu anu kuti mukaaphe m'thando yatchetcha thangwi imwe mukhaazonda.

²⁹Mbwenye anthu enewa mbale adasankhula imwe kukhala anthu anu, anthu adabulusa imwe m'dziko ya Iguputo na mphamvu zanu zikulu ale.’