Read cisena YOHANI 1 Bible Online

YOHANI 1 - cisena bible

YOHANI 1

¹Dziko yapansi mbidzati lengwa mbodzi wakuchemerwa Mafala akhalipo kale. Mafalayo akhali na Mulungu, pontho iyeyo akhali Mulungu ene.

²Iye akhali na Mulungu pakutomaletu.

³Kudzera muna iye Mulungu adalenga pinthu pyonsene. Iye mbadakhonda khalapo, nee chinthu na chibodzi chene mbachidalengwa tayu.

⁴Iye ndi mwenechiro moyo,[1] tenepo moyowo udadzesa cheza kuna anthu.

⁵Chezacho chimbamwinikira mumdima, mbwenye mdima wachimwana kuthimisa chezacho.

⁶Mulungu adatuma munthu unango nyamphangwa, dzinache Yohani.

⁷Iye adadza dzachitira umboni kuna anthu pya chezacho, towera anthu onsene ave mphangwa mbakhulupira.

⁸Yohaniyo hakhali cheza tayu, mbwenye adadza kwene dzachitira umboni pya chezacho.

⁹Cheza chadi-chadi chimbamwinikira anthu onsene chile chikhadza padziko yapansi.

¹⁰Mafalayo akhali padziko yapansi pano. Podi kwene kuti Mulungu adalenga dziko yapansi kudzera muna iyeyo, anthu a pansi pano hadamdzindikire tayu.

¹¹Iye adadza kuna dzinzache ene, mbwenye anthu a dzinzache adakhonda kumtambira.

¹²Kwache onsene adamtambira mbamkhulupira ale, iye adaapasa utongi kusanduka ana a Mulungu.

¹³Iwo adasanduka ana a Mulungu nee pakuchita kubalwa sasawa ninga mumbabalirwa ana thangwi ya kupifuna kwa munthu tayu, mbwenye adabalwa na Mulungu.

¹⁴Mafalayo adasanduka munthu mbakhazikika pakati pathu wakukoma mtima pikulu pontho wakuonadi monsene mwene. Tidaona demelero yache, demelero ile yakuthemera Mwana mbodzi yekha wa Baba.

¹⁵Yohani adachitira umboni pya iye mbalalika mbati, “Munthu akhalonga ine ngweneyu, pikhalonga ine kuti, ‘Iye akudza m'nduli mwanga, mbwenye iye ngwamkulu kupiringana ine, thangwi iye akhalipo kale ine mbandidzati balwa.’ ”

¹⁶Na kukoma kwache mtima kukulu, iye adatitsanzayisa tonsene pakutipasa mtsanzayiso mwakutsagana.

¹⁷Mulungu adapereka mwambo kudzera muna Mose, mbwenye adapereka kukoma mtima, pontho pyakuonadi kudzera muna Yesu Khristu.

¹⁸Chipo nee mbodzi aona Mulungu tayu, mbwenye Mwana mbodzi yekha, ule ndi Mulungu, pontho wapamtima wa Baba, achitisa kuti iye adziwike.

¹⁹Wenewu ngumboni wa Yohani Nyakubatiza kuna akadamu a Chiyuda a mu Yerusalemu, pidatuma iwo a nyansembe na Alevi kuna Yohani, kamvunza mbati, “Iwe ndiwe ani?”

²⁰Iye hadakhonde tawira tayu, mbwenye adaatawira mwakuveka mbati, “Ine si ine tayu.”

²¹Iwo adamvunza mbati, “Ndiwe ani, mphapo? Ayi ndiwe Elia?” Yohani adatawira mbati, “Tayu, si ine Elia tayu.” Iwo adamvunza pontho mbati, “Ayi ndiwe Mprofeti?” Yohani adatawira mbati, “Tayu.”

²²Iwo adalonga mbati, “Mphapo, ngatipangetu, ndiwe ani? Tinafuna tikapange adatituma ale. Iwe umbapilonga kuti ndiwe ani?”

²³Yohani adaatawira pakulonga mafala adalembwa m'bukhu ya mprofeti Yesaya kuti, “Ndine fala ya munthu unango akukhuwa m'thando yatchetcha ule kuti, ‘Ndendemezani njira towera Mbuya afambemo!’ ”

²⁴Amuna akhadatumwa na Afarisi ale,

²⁵adavunza Yohani mbati, “Ngakhala si iwe Khristu, penu Elia, penu Mprofeti tayu, mphapo umbabatiziranji?”

²⁶Yohani adatawira mbati, “Ine ndimbabatiza na madzi, mbwenye pakati panu pana unango anakhonda imwe dzindikira.

²⁷Iye akudza m'nduli mwanga, kwache ine sidatheme na kusudzula kwene nkhwaira zache tayu.”

²⁸Pyonsenepi pidachitika kuluwani ya Betania kukhundu ya kumabulukiro dzuwa a mkulo wa Yorodani, kule kukhabatiza Yohani.

²⁹Mangwana mwache Yohani adaona Yesu akudza kuna iye. Natenepo adalonga mbati, “Ngayang'anani, ngweneyu Mwanabira wa Mulungu nyakubulusa pyakudawa pya anthu a padziko yapansi!

³⁰Munthu akhalonga ine ngweneyu, pikhalonga ine kuti, ‘Munthu unango akudza m'nduli mwanga, kwache iye ngwamkulu kupiringana ine, thangwi ine mbandidzati balwa iye akhalipo kale.’

³¹Na ine ene ndikhapidziwa tayu kuti iye mbani, mbwenye ndidadza dzabatiza na madzi, towera anthu a ku Israele amdziwe.”

³²Tenepo Yohani adachitira umboni ufu: “Ndidaona Mzimu Wakuchena akutchitha kudzulu ninga nkhangaiwa mbakhala pana iye.

³³Ine mbandidamdziwa tayu kuti ndiye ene, mbwenye Mulungu, adandituma dzabatiza na madzi ule, adalonga kuna ine mbati, ‘Ungaona Mzimu Wakuchena akutchitha mbakhala pana iye, ngweneyo ene nyakubatiza na Mzimu Wakuchena.’ ”

³⁴Yohani adalonga mbati, “Ine ndapiona, tenepo ndikuchitira umboni kuti iye ndi Mwana Mulungu.”

³⁵Mangwana mwache Yohani na awiri mwa anyakufunzache akhali pontho penepo.

³⁶Pidaona iye Yesu akugwanda na penepo, adalonga mbati, “Ngayang'anani ngweneyu Mwanabira wa Mulungu!”

³⁷Anyakufunza awiri ale adamva akulonga penepi, tenepo iwo adatewera Yesu.

³⁸Yesu adazungunuka mbaaona akumtewera mbavunza mbati, “Munasakanji?” Iwo adamtawira mbati, “Mumbakhala kupi, Rabi?” (Rabi nkhulonga kuti “Mfunzisi.”)

³⁹Yesu adatawira mbati, “Tendeni mukaoneko.” Ndzidzi ukhali ora yachinayi na mawulo. Natenepo iwo adenda naye kaona kukhakhala iye, mbakhala naye kweneko nsiku yonseneyo.

⁴⁰Mbodzi wa awiriwo akhali Andrea, mbaleache Simoni Peturo.

⁴¹Kabodzi kene iye adagumana mbaleache Simoni mbampanga mbati, “Tamgumana Mesia.” Mesia, m'Chiheberi nkhulonga kuti “Khristu.”

⁴²Tenepo iye adenda na Simoniyo kuna Yesu. Yesu adamuyang'ana mbalonga mbati, “Dzinako ndiwe Simoni, mwana Yohani, mbwenye chinchino unachemerwa Kefa.” Dzina yeneyi ndi sasawa na Peturo, kulonga kuti “Mwala.”

⁴³Mangwana mwache Yesu adanyerezera pyakwenda ku Galilea. Iye adagumana Filipi mbalonga kuna iye mbati, “Nditewere!”

⁴⁴Filipi akhali wa ku Betesaida kuluwani kukhakhala Andrea na Peturo kule.

⁴⁵Filipi adagumana Natanaele mbampanga mbati, “Tamgumana adalembwa na Mose m'bukhu ya mwambo ule, pontho pyache pidalembwa na Maprofeti ule. Iye ndi Yesu wa kuluwani ya Nazareti, mwana Yosefe.”

⁴⁶Natanaele adavunza mbati, “Ayi ku Nazareti nkhubulukirambo chinthu chadidi?” Filipi adatawira mbati, “Tende ukapione wekha.”

⁴⁷Pidaona Yesu kuti Natanaele akudza kuna iye, adalonga pya iye mbati, “Uyu ndi Muisraele chadi-chadi; muna iye nkhabe pyakunama.”

⁴⁸Natanaele adamvunza mbati, “Mwandidziwa tani?” Yesu adatawira mbati, “Ndidakuona pikhali iwe pamuti wamkuyu, Filipi mbadzati kukuchemera.”

⁴⁹Natanaele adatawira mbati, “Mfunzisi, imwe ndimwe Mwana Mulungu. Ndimwe Mfumu wa Israele.”

⁵⁰Yesu adalonga mbati, “Kadi iwe ukukhulupira thangwi ndakupanga kuti ndidakuona pamuti wamkuyu? Iwe unati uone pinthu pikulu kupiringana penepi!”

⁵¹Tenepo adalonga kuna iwo mbati, “Ndikukupangani pyakuonadi kuti imwe munaona kudzulu kwafunguka, pontho angelo a Mulungu akukwira na kutchitha na pana Mwana Munthu.”