Read cisena YOHANI 10 Bible Online

YOHANI 10 - cisena bible

YOHANI 10

¹Yesu adalonga mbati, “Ndikukupangani pyakuonadi kuti munthu anakhonda pita m'thanga ya mabira na pamsuwo, mbwenye anachita kuphwetha thanga, weneyu ndi mbava pontho phanga.

²Munthu ambapita na pamsuwo wa thanga, weneyu ndi makabuswa wa mabirawo.

³Nyakuonera pathangapo ambamfungulira msuwo, mabira ambava falache iye angaachemera na madzinawo, tenepo iye ambaabulusamo.

⁴Iwo angamala buluka, iye ambapita patsogolo, iwombo ambamtewera m'nduli mwache, thangwi falache ambaidziwa.

⁵Iwo nkhabe dzatewera munthu unango tayu, mbwenye anathawa munthu weneyu, thangwi fala ya munthuyu nkhabe kuidziwa tayu.”

⁶Yesu adaapanga msanganiwu, mbwenye iwo hadavesese pikhalonga iyepyo tayu.

⁷Yesu adalonga pontho mbati, “Ndikukupangani pyakuonadi kuti ine ndine msuwo wa pathanga ya mabira.

⁸Anango onsene adadza ine ndidzati fika ale enewo ndi mbava pontho mapanga. Kwache mabira hadaavere tayu.

⁹Ine ndine msuwo. Munthu angapita na pana ine anapulumuka; iye anapita na kubuluka pyache, pontho anagumunamo mpovu.

¹⁰Mbava ambadzera kwene dzaba, kupha na kuvunga, mbwenye ine ndadza kuti imwe mukhale na moyo chadi-chadi, moyo wakuinjipa.

¹¹“Ine ndine makabuswa wadidi, ule ambasasanyika kufera mabirache.

¹²Mbwenye nyaganyo angaona kwene mbinzi ukudza, ambathawa pyache mbasiya mabirawo, thangwi mabirawo si ache tayu, pontho si makabuswa chadi-chadi tayu. Tenepo mbinziwo umbadza mbuphata mabirawo mbaabalalisa.

¹³Nyaganyo ule ambaathawa, thangwi iye ndi nyaganyo ene basi, tenepo iye hambaatsalakana tayu.

¹⁴Makabuswa wadidi ndine. Ninga mumbandidziwira Baba, pontho ninga mumbamdziwirambo ine Babayo, ntchibodzi-bodzi ine ndimbadziwa mabiranga, iwombo ambandidziwa. Ine ndasasanyika kufera mabirawo.

¹⁶Ndili nawo mabira anango, ale hali a m'thanga mwangamu tayu. Ine ndathema kuti ndiakuse. Iwo anavera falanga, tenepo anakhala[19] pamkumbi ubodzi, makabuswache mbakhala mbodzi.

¹⁷“Babanga ambandifuna, thangwi ine ndasasanyika kupereka moyo wanga, towera ndiutambire pontho.

¹⁸Nkhabe munthu anakwanisa kundipokosera moyo wanga tayu. Ndinaupereka na kufuna kwanga. Ndili nawo utongi wakuutaya, pontho kuubwezera. Penepi ndiye pidanditonga Babanga kupichita.”

¹⁹Na thangwi ya mafala enewa Ayuda ale adagawikana pontho.

²⁰Azinji penepo akhalonga mbati, “Weneyu ana mzimu wakuipa, pontho ana nsala! Mwatani munavesera pinalonga iyepi?”

²¹Mbwenye anango akhalonga mbati, “Munthu wakuphatwa na mzimu wakuipa nkhabe kwanisa kulonga tenepa tayu! Mzimu wakuipa unakwanisa tani kuwangisa maboli-boli?”

²²Mu Yerusalemu mukhali Phwando yakusekera kupambulwa kwa Nyumba ya Mulungu.[20] Wenewo ukhali ndzidzi wa mainja.

²³Tenepo Yesu akhafamba m'khonde inango ya Nyumba ya Mulungu, yakuchemerwa Khonde ya Solomoni.

²⁴Ayuda adagumanyikana mwakumzungulira mbamvunza mbati, “Iwe unaleka lini kutipenukisa? Ngatipange mwakuveka ngakhala ndiwedi Khristu?”

²⁵Yesu adatawira mbati, “Ine ndidakupangani kale, mbwenye imwe nee mumbandikhulupira tayu. Mabasa ambaphata ine na utongi wa Babanga ambandichitira umboni;

²⁶mbwenye imwe nee mumbakhulupira tayu, thangwi si imwe mabiranga tayu.

²⁷Mabiranga ambava falanga; ine ndimbaadziwa, pontho iwo ambanditewera.

²⁸Ine ndimbaapasa moyo okhonda mala, tenepo iwo hanafave tayu. Nkhabe munthu anakwanisa kundipokosera tayu.

²⁹Pinthu pyandipasa Babanga mphikulu pyakwanga[21] kupiringana pinthu pyonsene, tenepo nkhabe munthu anakwanisa kuapokosa m'manja mwa Babanga tayu.

³⁰Baba na ine ndife abodzi.”

³¹Ayuda ale adalokota pontho miyala kuti amponyere.

³²Yesu adalonga kuna iwo mbati, “Ine ndachita udidi uzinji pamaso panu, udandipasa Baba kuti ndiuchite; ntchipi mwa penepi chinafuna imwe kundiphera nacho na miyala?”

³³Iwo adatawira mbati, “Ife nkhabe funa kukupha na miyala thangwi ya udidiwu tayu, mbwenye thangwi ya kushola Mulungu kumbachita iweku! Iwe ndiwe munthu ene pyako, mbwenye ukufuna kupiyesa kukhala Mulungu!”

³⁴Yesu adatawira mbati, “M'mwambo mwanu mwene pyalembwa kuti Mulungu adalonga mbati, ‘Imwe ndimwe milungu.’

³⁵Timbapidziwa na kale ene pimbalonga Malemba mphyakuonadi, pontho pyakukhala na kukhala, tenepo Mulungu adathula anthu enewo kuti ndi milungu, kuna anthu ale adapaswa mphangwa zache.

³⁶Ine pano, Baba adandisankhula mbandituma kudziko yapansi pano. Apo munalonga tani kuti ndikushola, pinalonga ine kuti ndine Mwana Mulungu?

³⁷Lekanitu, mphapo, kundikhulupira, ngakhala pimbachita inepi mphyakukhonda funa Babanga.

³⁸Ngakhala imwe nkhabe funa kundikhulupira tayu, apo khulupirani pyanu mabasa ambaphata inewa. Penepo munapidziwa okhonda penuka kuti Baba ambakhala muna ine, inembo ndimbakhala muna Babayo.”

³⁹Iwo adayesa pontho kumphata, mbwenye iye adapukunyuka m'manja mwawo.

⁴⁰Yesu adawambuka pontho mkulo wa Yorodani kubwerera kumbuto kukhadabatiza Yohani Nyakubatiza kule, mbakhala pyache kweneko.

⁴¹Anthu azinji adadza kuna iye, pontho iwo adalonga mbati, “Yohani hadachite chidzindikiro tayu, mbwenye pyonsene pidalonga iye pya munthu weneyu pikhali pyakuonadi.”

⁴²Penepo anthu azinji adamkhulupira Yesu.