Read cisena YOHANI 11 Bible Online

YOHANI 11 - cisena bible

YOHANI 11

¹Munthu unango dzinache Lazaro, wa kuluwani ya Betania akhadwala. Betania kukhali kwawo kwa Maria na mbaleache Marita.

²Maria weneyu ngule adakhuthulira mafuta akununkhira pamanyalo a Mbuya Yesu mbaapukuta na tsisi yache. Lazaro, akhadwala ule, akhali nkhoswe yache.

³Anyamainga adatumira Yesu mphangwa kuti: “Mbuya, shamwalianu wapamtima kuno akudwala.”

⁴Pidapiva Yesu, adalonga mbati, “Kudwala kweneku nkhwakuti anafa nako tayu; penepi pyachitika towera Mulungu alemedzwe, pontho kuti Mwana Munthu atambire demelero.”

⁵Yesu adaafuna Marita, na mbaleache Maria, pontho na Lazaro.

⁶Kwache pidatambira iye mphangwa zakuti Lazaro akhadwala, iye adakhala pyache kukhali iyeko nsiku zinango ziwiri.

⁷Tenepo iye adalonga kuna anyakufunzache mbati, “Tendeni tibwerere ku Yudea.”

⁸Anyakufunzache ale adatawira mbati, “Mfunzisi, si kale ene tayu pikhafuna kukuphani Ayuda na miyala; apo chinchino munafuna kubwererako pontho basi?”

⁹Yesu adatawira mbati, “Nsiku ina maora khumi na mawiri acheza, si tenepo tayu? Munthu anafamba na masikatiyo hambagwegweduka tayu, thangwi ambaona na cheza cha dziko yapansi pano.

¹⁰Mbwenye angafamba na mosiku ambagwegweduka, thangwi nkhabe cheza.”

¹¹Yesu adalonga penepi mbathimiza pontho kulonga mbati, “Shamwaliathu Lazaro ali m'chitulo, mbwenye ndinati ndiende kamulamusa.”

¹²Anyakufunza ale adalonga mbati, “Mbuya, ngakhala iye alila kwene gona, anawanga.”

¹³Iwo akhanyerezera kuti Yesu akhalonga pya chitulo chadi-chadi, mbwenye iye akhalonga kuti Lazaro akhadafa.

¹⁴Tenepo Yesu adaapanga mwakuveka mbati, “Lazaro afa,

¹⁵mbwenye na thangwi ya imwe ndakomerwa kuti ine kukhali nkhabeko, towera mukhulupire. Tendeni kuna iyeko.”

¹⁶Penepo Tomasi (wakuchemerwa Mwana Mphasa) adalonga kuna anyakufunza anzache mbati, “Tonsene tendeni kuti tikafere pabodzi pene na Mfunzisi wathuyi.”

¹⁷Pidafika Yesu kweneko, adagumana kuti Lazaro akhadaikhwa kale m'masiye, pontho akhadagonamo nsiku zinayi.

¹⁸Betania akhali chifupi na Yerusalemu, nsinzo wache ukhali mathanyo pikwi pitatu kubulukira ku Yerusalemu,

¹⁹tenepo Ayuda azinji akhadabwera dzaombera Marita na Maria, thangwi ya kufa kwa nkhoswe yawo.

²⁰Pidapiva Marita kuti Yesu akhadza, adabuluka panja kagumanikana naye, mbwenye Maria adasalira m'nyumba mule.

²¹Marita adalonga kuna Yesu mbati, “Mbuya, mbamudakhala kuno, nkhoswe yanga nee mbadafabi!

²²Mbwenye ndikupidziwa kuti chinchino ene pano Mulungu anakupasani chonsene chinampempha imwecho.”

²³Yesu adampanga mbati, “Nkhoswe yako anati alamuke kuimfa.”

²⁴Marita adatawira mbati, “Ndikupidziwa kuti iye anati alamuke kuimfa pansiku yakumalisa inafuna dzalamusa Mulungu anthu akufa.”

²⁵Yesu adampanga mbati, “Ine ndine nyakulamusa kuimfa, pontho nyakupereka moyo. Munthu anakhulupira ineyo, anakhala na moyo, podi kwene kuti afe,

²⁶pontho munthu onsene ana moyo mbandikhulupira hanafave tayu. Ayi iwe umbakhulupira penepi?”

²⁷Iye adatawira mbati, “Ande, Mbuya, ndimbakhulupira kuti imwe ndimwe Khristu, Mwana Mulungu, adathema kudza pansi pano ule.”

²⁸Pidamala Marita kulonga penepi, adabwerera mbakachemerera mbaleache Maria pakhundu mbampanga mbati, “Mfunzisi ali kuno, pontho akukuchemera.”

²⁹Pidapiva Maria, adenda mwakuchimbiza kagumanikana naye.

³⁰Yesu hakhadadzati fika m'mudzi mule tayu, mbwenye akhali pyache pambuto pakhadagumanikana iye na Marita pale.

³¹Ayuda, ale akhali m'nyumba pabodzi na Maria kumuombera, pidamuona iwo kulamuka kwenda panja mwakuchimbiza, adamtewera. Iwo akhanyerezera kuti iye akhaenda kasintili nkhoswe yache kumasiye.

³²Maria adafika kukhali Yesu kule, tenepo sindzidzi nkhuona Yesu, adagwa pamanyalo pa Yesu mbalonga mbati, “Mbuya mbamudakhala kwene kuno, nkhoswe yanga nee mbadafa tayu!”

³³Yesu adaona kusintili kwache kule mbaona pontho kusintili kukhachita Ayuda akhali na Maria ale; pidamsanya mtima mbazhangali napyo.

³⁴Tenepo iye adavunza mbati, “Kwamuikha imwe nkhupi?” Iwo adatawira mbati, “Mbuya, tendeni mukaoneko.”

³⁵Yesu adalira.

³⁶Ayuda ale adalonga mbati, “Yang'anani kumfuna pikulu kukhachita iye!”

³⁷Mbwenye anango a iwo adalonga mbati, “Iye adawangisa boli-boli, apo mbadachitapo pinthu tayu kuti Lazaro aleke kufa?”

³⁸Na kusanyika pontho mumtima, Yesu adenda kumasiye. Masiyewo akhali a dzimba akufungwa na mwala pamsuwo pache.

³⁹Yesu adaapanga mbati, “Bulusanipo mwalawo!” Marita nyamaingache nyakwenda ule adatawira mbati, “Mbuya, pano pananunkha pyakwanga thangwi iye adaikhwa nsiku zinayi zagwandazo!”

⁴⁰Yesu adalonga kuna iye mbati, “Kadi ine sidakupangeni tayu kuti mbamudakhulupira, imwe mbamudaona demelero ya Mulungu?”

⁴¹Iwo adabulusapo mwala ule. Yesu adayang'ana kudzulu mbalonga mbati, “Baba, ndinapereka takhuta kuna imwe thangwi imwe mumbandiva pimbalonga ine.

⁴²Ndimbapidziwa kuti imwe mumbava pimbalonga ine ndzidzi onsene, mbwenye ndikulonga penepi thangwi ya anthu ali panowa, towera akhulupire kuti ndimwe mudandituma.”

⁴³Pikhadamala iye kulonga penepi, adachemera mwakugaluza fala mbati, “Lazaro, buluka mwenemo!”

⁴⁴Iye adabulukadi, uku manja na manyalo ache pyakukutizwa na nguwo zakumasiye, pontho na nguwo kunkhope kwache. Yesu adaapanga mbati, “Mkununduleni, pontho mulekeni aende pyache.”

⁴⁵Ayuda azinji akhadabwera dzaombera Maria ale, adaona pinthu pidachita Yesu pile, tenepo iwo adamkhulupira.

⁴⁶Mbwenye anango a iwo adenda kapanga Afarisi pinthu pikhadachita Yesu pile.

⁴⁷Afarisi na anyansembe akulu adachemeresa mgumano wa Thando ya miseru ya Chiyuda. Iwo adalonga mbati, “Penepa tichitenji? Yang'anani pidzindikiro pinachita munthuyu!

⁴⁸Tingamsiya kwene kuti iye athimize kuchita pinachita iyepi, anthu onsene anati amkhulupire, pontho akadamu a Chiroma anati abwere dzavunga Nyumbathu ya Mulungu, pontho na mtundu wathu ene!”

⁴⁹Mbodzi wa iwo dzinache Kayafa, Nyansembe Wamkulu m'chaka chenecho adalonga mbati, “Imwe nkhabe dziwa chinthu na chibodzi chene tayu!

⁵⁰Kadi imwe nkhabe dzindikira kuti mphyadidi kuti munthu mbodzi afere anthu onsene kusiyana nakuti mtundu onsene uvungike?”

⁵¹Iye hadalonge penepi na nzeru zache zene tayu. Podi iye akhali Nyansembe Wamkulu m'chaka chenecho, iye akhalongeratu ninga mprofeti kuti Yesu anafera mtundu wa Chiyuda,

⁵²si kufera Ayuda okha tayu, mbwenye kugumanya anthu onsene a Mulungu adamwazikana ale, kuti akhale abodzi.

⁵³Kubulukira nsiku yeneyo kwenda m'tsogolo, akadamu a Chiyuda akhasaka-saka njira zakuphera Yesu.

⁵⁴Natenepo Yesu hakhafamba pakwecha mu Yudea tayu, mbwenye adabulukamo mbaenda pyache kumbuto ya chifupi na thando yatchetcha, kuluwani ya Eferemu, kudakhala iye pabodzi na anyakufunzache kule.

⁵⁵Ndzidzi wa Phwando ya Paska ukhali chifupi, tenepo anthu azinji adenda ku Yerusalemu kubulukira kumidzi kachita mtemo wa kupichenesa wakuthema nawo kupembedza Mulungu, Phwandoyo mbidzati fika.

⁵⁶Iwo akhasaka-saka Yesu, tenepo pidagumanyikana iwo m'Nyumba ya Mulungu, adavunzana mbati, “Apo, penepa mukunyerezera tani? Iyeyu anabwera ku Phwando kuno penu tayu?”

⁵⁷Anyansembe akulu na Afarisi akhadapereka utongi kuna anthu kuti ngakhala munthu adadziwako kukhali Yesu, athema kapilonga kuna iwo, towera iwo ammange.