Read cisena YOHANI 12 Bible Online

YOHANI 12 - cisena bible

YOHANI 12

¹Pidasala nsiku zitanthatu kuti nsiku ya Phwando ya Paska ikwane, Yesu adenda ku Betania kumsuwo kwa Lazaro, akhadalamusa iye kuimfa ule.

²Iwo adasasanyira Yesu phwando, Marita mbakhala nyakuafiliviri; Lazaro akhali mbodzi wa anthu akhadya pabodzi na Yesu ale.

³Tenepo Maria adakwata mtete wakudzala na mafuta[22] a naridi chadi-chadi akudula pyakwanga na akununkhira mbadzoza nawo manyalo a Yesu, mbaapukuta na tsisi yache. Kununkhira kwa mafuta ale kudakalangira m'nyumba monsene mule.

⁴Nyakufunza mbodzi wa Yesu, dzinache Yudasi Iskarioti, nyakufuna dzapereka Yesu kuna anyamalwache ule, adalonga mbati,

⁵“Ayi mafutawa mbadaguliswa, mbatidaphata nawo kobiri ninga zakupagalwi anyakuphata basa madzana matatu pansiku ibodzi[23] kuphedzera nazo anthu akutcherenga tayu?”

⁶Iye adalonga penepi, nee kuti iye akhatsalakana anthu akutcherenga tayu, mbwenye na thangwi yakuti akhali mbava. Iye akhali nyakukoya kobiri, tenepo iye akhakwata kobiri za kuthumba mbaziphatisa basache.

⁷Mbwenye Yesu adalonga mbati, “Mlekeni pyache! Pansiku yakuikhwa kwanga m'masiye iye anakumbuka pyachita iyepi.

⁸Anthu akutcherenga munakhala nawo ndzidzi onsene, mbwenye ine nkhabe dzakhala namwe ndzidzi onsene tayu.”

⁹Ayuda azinji adapiva kuti Yesu akhali ku Betania, natenepo iwo adenda kweneko, nee kuti adendera Yesu yekha tayu, mbwenye pontho kaona Lazaro, akhadalamuswa kuimfa na Yesu ule.

¹⁰Natenepo anyansembe akulu adasasanya njira zakupherambo Lazaro.

¹¹Na thangwi ya pidachitika kuna Lazaro, Ayuda azinji akhaakhonda mbakhulupira Yesu.

¹²Mangwana mwache mwinji ukulu ukhadadza ku Phwando ya Paska ule, udava kuti Yesu akhadza ku Yerusalemu.

¹³Tenepo iwo adakwata matsamvu a michindu mbaenda kagumanikana naye, uku akukhuwa mbati, “Mulungu mbalemedzwe! Mulungu mbatsanzayise nyakudza na dzina ya Mbuya! Mulungu mbatsanzayise Mfumu wa Israele!”

¹⁴Yesu adagumana bulu mbampakira sasawa ninga mudalongera Malemba kuti,

¹⁵“Leka chita mantha, iwe mzinda wa Zioni! Yang'ana, mfumu wako akudza pamsana pa mwanabulu.”

¹⁶Ndzidzi wenewu anyakufunzache hadapivese tayu; mbwenye pikhadalamuswa Yesu kuimfa na kutambira demelero, iwo adakumbuka kuti Malemba akhalonga pya iyeyu, pontho kuti iwo akhadamchitira penepi.

¹⁷Anthu akhali pabodzi na Yesu pandzidzi udalamusa iye Lazaro kuimfa pakumchemera kumasiye ale, akhathimiza kulonga pinthu pikhadachitika pile.

¹⁸Ndi thangwi yache mwinji ule udakagumanikana naye, thangwi iwo adava kuti Yesu akhadachita chidzindikiro chenechi.

¹⁹Afarisi ale adalonga kuna unango na mwanzache mbati, “Mwaonatu, penepa nkhabepo chathu tayu! Yang'anani anthu a padziko yonsene yapansi akumtewera.”

²⁰Agriki anango akhali nawo pakati pa anthu akhadenda kapembedza ku Yerusalemu ndzidzi wa Phwandoyo ale.

²¹Iwo adenda kuna Filipi, ule kwawo kukhali kuluwani ya Betesaida m'nthemba ya Galilea mbakalonga mbati, “Mbuya, ife tinafunambo tione Yesu.”

²²Filipi adenda kapanga Andrea, tenepo uwiriawo adenda kuna Yesu kampanga.

²³Yesu adatawira mbati, “Chinchino ora yakwana yakuti Mwana Munthu atambire demelero ikulu.

²⁴Ndikukupangani pyakuonadi kuti mbewu ya mapira imbakhala ibodzi yonthoyo basi ngakhala inakhonda kugwa pansi m'mataka mbifa. Mbwenye iyo ingafa imbabala mapira anango azinji ene.

²⁵Munthu anafuna moyo wacheyo anati autaye; munthu anazonda moyo wache pansi pano anati aukoye kuti akhale na moyo okhonda mala.

²⁶Munthu anafuna kunditumikirayo athema kunditewera, towera nyabasanga akhale na ine pabodzi konsene kwene kuna ine. Babanga analemedza onsene ambanditumikira ale.

²⁷“Chinchino mtimanga ukusanyika pikulu. Apo ndinalonga tani? Ndilonge kuti, ‘Baba lekani tawirisa ndzidzi wa nyatwa kuti udze kuna ine?’ Mbwenye penepi ndiye pidadzera ine, towera ndigwande na ndzidzi wa nyatwawu.

²⁸Baba, dzesani demelero kuna dzinanu!” Penepo fala idaveka kubulukira kudzulu kuti, “Ndadzesa kale demelero kuna dzinangayi, pontho ndinati ndipichite pontho.”

²⁹Mwinji udaimira penepowo udava falayi, tenepo anango a iwo adalonga kuti ndi chiphaliwali, anangombo adalonga mbati, “Angelo adalonga kuna iye!”

³⁰Mbwenye Yesu adalonga kuna iwo mbati, “Fala idaveka nee thangwi ya ine tayu, mbwenye thangwi ya imwepo.

³¹Chinchino ndi ndzidzi wakuti anthu a padziko yapansi atongwe mseru; chinchino Satana, mfumu wakuipa wa dziko yapansi pano anaponywa kunja.

³²Ndingakwizwa m'dzulu pansi pano, ndinati ndikweyere anthu onsene kudza kuna ine.”

³³Iye adalonga tenepo towera adziwise mule mukhafuna iye dzafera.

³⁴Mwinji ule udatawira kuti, “Mwambo wathu umbatipanga kuti Khristu anakhala wakukhala na kukhala. Apo ukulonga tani kuti Mwana Munthu athema kukwizwa m'dzulu? Mwana Munthu analongwayu ngupi?”

³⁵Yesu adatawira mbati, “Cheza chinakhala namwe ndzidzi pang'ono. Fambani pandzidzi una imwe na cheza uno, mwenemo mdima mbudzati fika pakati panu, thangwi munthu ambafamba mumdima ule nkhabe dziwa kunaenda iye tayu.

³⁶Ndzidzi una imwe na cheza, khulupirani chezacho, towera mukhale anthu a m'cheza.” Pidamala Yesu kulonga penepi, adabulukapo pyache mbabisala.

³⁷Podi kwene kuti iye akhadachita pidzindikiro pyonsenepi pakati pawo, kwache iwo hadamkhulupire tayu.

³⁸Pidakhaladi tenepo kuti pikwane-kwane pidalongwa na mprofeti Yesaya pile kuti: “Mbuya, mbani adakhulupira mphangwa zidalonga ife? Nkhuna ani kudatchululira Mulungu mphamvu zache?”

³⁹Natenepo iwo hadakwanise kumkhulupira tayu, thangwi mprofeti Yesaya adalonga pontho mbati,

⁴⁰“Mulungu afunga maso na nzeru zawo zene, towera maso awo akhonde kuona, pontho nzeru zawo zikhonde vesa pinthu. Tenepo Mulungu alonga mbati, ‘Iwo adachimwana kuzungunukira kuna ine kuti ine ndiawangise.’ ”

⁴¹Mprofeti Yesaya adalonga penepi thangwi adaona demelero ya Yesu mbalonga pya iyeyo.

⁴²Podi kwene kuti pikhali tenepo, akadamu a Chiyuda azinji adakhulupira Yesu; kwache thangwi ya Afarisi iwo hakhapilonga pakwecha tayu, gopesera kukhondeswa kupemphera nawo m'nyumba yakupemphereramo.

⁴³Iwo akhafuna kuti anthu aasimbe pikulu kupiringana Mulungu.

⁴⁴Yesu adalonga mwakugaluza fala mbati, “Munthu anakhulupira ineyo, akhulupira ine ndekha tayu, mbwenye na nyakundituma ene.

⁴⁵Munthu andionayo, aona pontho nyakundituma.

⁴⁶Ine ndadza padziko yapansi pano ninga cheza, towera munthu anandikhulupirayo aleke khala mumdima.

⁴⁷Munthu angava mphangwa zanga mbakhonda kuzivera, ine sinamtonga mseru tayu. Ine sidadze padziko yapansi dzatonga anthu tayu, mbwenye dzaapulumusa.

⁴⁸Munthu anandikhondayo mbakhonda tambira mphangwa zanga alipo unango anafuna dzamtonga mseru. Mafala alonga inewa ndiye anafuna dzamchitisa kukonwa pansiku yakumalisa!

⁴⁹Thangwi ine sidalonge na utongi wanga ene tayu, mbwenye Baba, adandituma ule, andipanga pyakuti ndipilonge, pontho ndipipange anthu.

⁵⁰Tenepo ndikupidziwa kuti matongero ache ambapasa moyo okhonda mala. Natenepo pyonsene pimbalonga inepi mphile pyandipanga Baba kuti ndipilonge.”