Read cisena YOHANI 13 Bible Online

YOHANI 13 - cisena bible

YOHANI 13

¹Padasala kwene nsiku ibodzi kuti nsiku ya Phwando ya Paska ikwane. Yesu adadziwa kuti ndzidzi ukhadakwana wakuti aende kuna Baba kubuluka pansi pano. Iye akhadaafuna pikulu anthu ache a pansi pano, pontho adaafuna kufikirana pansiku yakumalisiraletu ya moyo wache pansi pano.

²Na mawulo Yesu na anyakufunzache akhadya, tenepo Satana akhadachitisa kale kuti Yudasi mwana Simoni Iskarioti anyerezere pyakupereka Yesu kuna anyamalwache.[24]

³Yesu adapidziwa kuti Baba akhadampasa mphamvu monsene mwene; pontho adapidziwa kuti akhadabulukira kuna Mulungu, tenepo akhabwerera kuna Mulungu.

⁴Iye adalamuka pakhadyera iwo pale mbakunundula nguwo yache yakunja mbamanga mcheka m'chuno mwache.

⁵Kubuluka penepo adatsanyulira madzi m'phande mbatoma kutsuka manyalo a anyakufunzache mbaapukuta na mcheka ukhadamanga iye m'chuno ule.

⁶Iye adafika pana Simoni Peturo, ule adalonga kuna Yesu mbati, “Mbuya, kani munafuna kutsuka manyalo anga?”

⁷Yesu adatawira mbati, “Iwe nkhabe vesa chinchino pinthu pinachita inepi tayu, mbwenye unapivesa mphole m'tsogolo muno.”

⁸Peturo adalonga mbati, “Nee munatsukave manyalo anga tayu!” Yesu adamtawira mbati, “Ndingakhonda kukuchenesa, nee unati ukhaleve nyakufunzangabi.”

⁹Simoni Peturo adatawira mbati, “Mbuya, lekani tsuka kokha manyalo, mbwenye sambisani manja na msolo wanga ene!”

¹⁰Yesu adalonga mbati, “Munthu angasamba ambachena monsene mwene, iye nkhabe funika pontho kusamba kachiwiri kache tayu, mbwenye kutsuka kwene manyalo ache basi.[25] Monsenene ndimwe akuchena, kupambula munthu mbodzi.”

¹¹Yesu adadziwa kale munthu wakufuna dzampereka kuna anyamalwache; ndi thangwi yache adalonga mbati, “Monsenene ndimwe akuchena, kupambula munthu mbodzi.”

¹²Pidamala Yesu kutsuka manyalo awo, adavala pontho nguwo yache yakunja mbakakhala pambuto pache pale. Tenepo iye adavunza mbati, “Ayi imwe mwavesa pinthu pyakuchitirani ine chinchinopi?

¹³Imwe mumbandichemera ‘Mfunzisi’ pontho ‘Mbuya,’ mphyadidi kuchita tenepo thangwi ndine ene pano.

¹⁴Ine, Mfunzisi pontho Mbuyanu, ndamala kwene tsuka manyalo anu chinchino pano. Mphapo imwembo mwathema kutsukana manyalo unango na mwanzache.

¹⁵Ine ndakupangizani, towera imwe muchitembo ninga montho mwapichitira ine kuna imwe.

¹⁶Ndikukupangani pyakuonadi: nkhabe bitchu anapiringana mbuyache tayu, pontho nkhabe nyakutumwa anapiringana adamtuma ule tayu.

¹⁷Podi imwe mwadziwa penepi chinchino, pichiteni, tenepo munakhala akutsanzaya!

¹⁸“Ine nee ndikulonga monsenene tayu; ine ndimbadziwa anthu asankhula ine ale. Mbwenye pikwane-kwane pidalonga Malemba pile kuti, ‘Munthu anadya na ine pabodzi mkate anati andisandukire.’

¹⁹Ndakupanganiletu ipyo pidzati chitika, towera pingachitika, mukhulupire kuti, ‘Ndine ene pano.’

²⁰Ndikukupangani pyakuonadi kuti munthu ambatambira anatuma ine ule, atambirambo na ine ene; pontho munthu ananditambirayo atambirambo na adandituma ene ule.”

²¹Pidamala Yesu kulonga penepi, adasanyika pikulu mumtima mwache mbalonga pakwecha mbati, “Ndikukupangani pyakuonadi kuti mbodzi pakati panupa anati andipereke kuna anyamalwanga.”

²²Anyakufunza ale adayang'anizana mbamalwa nzeru, tenepo hadadziwe tayu kuti iye akhalonga ani.

²³Nyakufunza unango mbodzi wapamtima pa Yesu, adakhala chifupi na Yesuyo.

²⁴Tenepo Simoni Peturo adamkodola nyakufunza ule mbampanga mbati, “Avunze, analonga iwoyo mbani.”

²⁵Tenepo nyakufunza ule adapendamira kuna Yesu mbavunza mbati, “Mbuya, mbani analonga imwe?”

²⁶Yesu adatawira mbati, “Ndinafonda tchuwa ya mkate m'palato mbaindipasa munthu, munthu anapasa ine tchuwayo ngweneyo ene.” Tenepo pidafonda iye tchuwa, adaipereka kuna Yudasi, mwana Simoni Iskarioti.

²⁷Sindzidzi pidatambira Yudasi tchuwa ile, Satana adapita mumtima mwache. Tenepo Yesu adalonga kuna iye mbati, “Chimbiza, ndoko kachite pinafuna iwe kuchitapyo!”

²⁸Nee mbodzi pakhadya iwopo adavesa kuti thangwi ninji Yesu akhadalonga penepi kuna iye.

²⁹Podi Yudasi akhali nyakukoya kobiri za kuthumba, anyakufunza anango akhanyerezera kuti Yesu akhadampanga kagula pyakufunikira pa phwandopo, penu kapereka pinthu kuna anthu akutcherenga.

³⁰Yudasi adatambira tchuwa ile mbaenda pyache kabodzi kene. Wenewo ukhali mosiku.

³¹Pikhadenda Yudasi, Yesu adalonga mbati, “Chinchino demelero ya Mwana Munthu ikuoneswa, pontho demelero ya Mulungu ikuoneswa kudzera muna Mwanayo.

³²Ngakhala demelero ya Mulungu ikuoneswa kudzera muna iyeyo, Mulungu anaonesambo demelero ya Mwana Munthu muna iye ene mwenechiro, tenepo iye anapichita kabodzi kene.

³³Ananga, nee ndinakhala namwe ndzidzi ukulu ene tayu. Imwe munandisaka-saka, kwache chinchino ndikukupangani pidapanga ine akadamu a Chiyuda kuti, ‘Imwe nkhabe kwanisa kwenda kunaenda ine tayu.’

³⁴Tenepo chinchino ndinakupasani matongero achinchino akuti funanani unango na mwanzache. Ninga mudakufunirani ine, imwe mwathema kufunana unango na mwanzache.

³⁵Ngakhala munafunana unango na mwanzache, penepo anthu onsene anapidziwa kuti ndimwe anyakufunzanga.”

³⁶Simoni Peturo adavunza mbati, “Mbuya, kunaenda imwe nkhupi?” Yesu adatawira mbati, “Imwe nkhabe kwanisa chinchino kunditewera kunaenda ine tayu, mbwenye munanditewera m'tsogolo muno.”

³⁷Peturo adatawira mbati, “Mbuya, ndinakhonda kwanisa tani kukutewerani chinchino? Ine ndasasanyika na kufa kwene, thangwi ya imwe!”

³⁸Yesu adatawira mbati, “Ayi iwe wasasanyikadi kufa thangwi ya ine? Ndikukupanga pyakuonadi kuti dzongwe mbadzati lira unati ulonge katatu kuti hunandidziwa tayu.”