Read cisena YOHANI 14 Bible Online

YOHANI 14 - cisena bible

YOHANI 14

¹Yesu adaapanga mbati, “Mtimanu mbuleke sanyika. Khulupirani[26] Mulungu, khulupirani na ine ene.

²M'nyumba mwa Babanga muna masubi mazinji, tenepo ndikwenda kakusasanyirani mbuto. Mbapidakhonda khala tenepo, nee mbandidakupangani tayu.[27]

³Ndingamala kukusasanyirani mbutoyo ndinati ndidze pontho dzakukwatani kuti mukakhale na ine, pontho kuti imwe mukakhalembo kunakhala ineko.

⁴Kunaenda ineko njirache mukuidziwa kale.”

⁵Tomasi adalonga kuna iye mbati, “Mbuya, podi ife nkhabe dziwako kunaenda imweko, apo tinadziwa tani njirache?”

⁶Yesu adamtawira mbati, “Ine ndine Njira, Pyakuonadi, pontho Moyo chadi-chadi. Nkhabe munthu anakwanisa kafika kuna Baba angakhonda dzera muna ine.”

⁷Iye adalonga kuna iwo mbati, “Mbamudadziwadi ine mbamudadziwambo[28] na Baba ene. Tenepo kutomera chinchino kwenda m'tsogolo mwamdziwa, pontho mwamuona.”

⁸Filipi adalonga kuna iye mbati, “Mbuya, chinafuna ife chene ntchakuti mutipangize Baba basi.”

⁹Yesu adatawira mbati, “Ine ndakhala namwe ndzidzi ukulu ene, apo Filipi, nkhabe kundidziwa tayu? Munthu andionayo aonambo na Baba ene. Ninji mphapo mukulonga kuti, ‘Tioneseni Baba’?

¹⁰Kani iwe, Filipi, na pano nkhabe khulupira kuti ine ndili muna Baba, pontho kuti Babayo ali muna ine?” Yesu adalonga pontho kuna iwo mbati, “Mafala alonga ine kuna imwewa, nee ngakubulukira kuna ine tayu. Baba, ambakhala muna ine ule, ambaphata basache.

¹¹Ndikhulupireni pinalonga ine kuti ine ndili muna Baba, pontho Baba ali muna ine. Mungakhonda kupikhulupira, khulupirani kwene, thangwi ya pinthu pimbachita inepi.

¹²Ndikukupangani pyakuonadi kuti munthu anandikhulupirayo anati achitembo pinachita inepi; ande, iye anati achite pikulu kupiringana pinachita inepi, thangwi ine ndikwenda kuna Baba.

¹³Ndinati ndikuchitireni pyonsene pinandipempha imwe na dzinanga, towera demelero ya Baba ioneswe kudzera muna Mwanayo.

¹⁴Pyonsene pinandipempha[29] imwe na dzinanga ndinati ndipichite.

¹⁵“Ngakhala imwe mumbandifunadi, munati muvere matongero anga.

¹⁶Ndinampempha Baba, tenepo iye anakupasani Nyakuphedzera unango, ule anakhala namwe ndzidzi onsene.

¹⁷Weneyu ndi Mzimu Wakuchena, wakutitchululira pyakuonadi pya Mulungu ule. Anthu a padziko yapansi nkhabe kwanisa kutambira Mzimuyo tayu, thangwi iwo hanakwanisa kumdziwa penu kumuona tayu. Mbwenye imwe mumbamdziwa, thangwi iye ambakhala namwe, pontho iye anakhala muna imwepo.[30]

¹⁸“Ndingaenda, nee munasaliratu mwekha ene tayu; ndinati ndibwere pontho kuna imwe.

¹⁹Kwasala kwene ndzidzi pang'ono pene basi kuti dziko ileke dzandionave, mbwenye imwe munati mundione; podi ine ndina moyo chadi-chadi, imwembo munakhala na moyo wenewo.

²⁰Nsiku yeneyo ingafika, munapidziwa kuti ine ndili muna Baba, pontho kuti imwe muli muna ine, ninga muna inembo muna imwe.

²¹“Munthu ambatawira matongero anga mbaavera, weneyo ambandifuna. Babanga anamfuna munthu onsene ambandifuna ule; inembo ndinamfuna mbandipionesa ndekha ene kuna iye.”

²²Yudasi, weneyu si Yudasi Iskarioti tayu, adalonga mbati, “Mbuya, pinakwanisika tani kuti imwe munapionesa mwekha ene kuna ife, nee kuna anthu a padziko yapansi tayu?”

²³Yesu adamtawira mbati, “Munthu anandifunayo anavera chifunziso changa. Babanga anamfuna, tenepo ine na Babanga tinadza kuna iye mbatikhala naye pabodzi.

²⁴Munthu anakhonda kundifuna weneyo nkhabe vera chifunziso changa tayu. Chifunziso chava imwechi si changa chene tayu, mbwenye chimbabulukira kuna Baba adandituma ule.

²⁵“Ndakupanganiletu penepi ndzidzi una ine namwe pabodzi.

²⁶Nyakuphedzera, Mzimu Wakuchena anafuna dzatumizwa na Baba kudzera muna dzinanga ule, anakufunzisani na kukukumbusani pyonsene pyakupangani ine.

²⁷“Ndinakusiyirani mtendere; unakupasani ine ndi mtendere wanga ene. Ine nkhabe kuupereka ninga mumbaperekera dziko yapansi tayu. Lekani sanyika mumtima mwanu, pontho lekani chita mantha.

²⁸Imwe mudandiva ndikulonga kuti, ‘Ndikwenda, mbwenye ndinati ndibwere pontho kuna imwe.’ Ngakhala imwe mumbandifuna, mbamudakomerwa kuti ine ndikwenda kuna Baba, thangwi iye ngwamkulu kupiringana ine pano.

²⁹Ndakupanganiletu penepi chinchino pidzati chitika, towera pingachitika mukhulupire.

³⁰Ine nkhabe kwanisa kulonga namwe pizinji tayu, thangwi Satana, mfumu wakuipa wa padziko yapansi pano, akudza. Iye nkhabe mphamvu pana ine tayu,

³¹mbwenye anthu a padziko yapansi athema kudziwa kuti ine ndimbamfuna Baba; ndi thangwi yache ndimbachita pyonsene ninga mumbandipangira iye. “Tendeni tibuluke pambuto pano.”