Read cisena YOHANI 15 Bible Online

YOHANI 15 - cisena bible

YOHANI 15

¹“Ine ndine mtawi wamfesa chadi-chadi, pontho Babanga ndi nyakulima.

²Iye ambagwanda nthambi zonsene zokhonda bala nsapo muna ine, pontho iye ambasadzulira nthambi zonsene zakubala, towera mutiwo uchene, pontho kuti nthambi zibale nsapo zizinji.

³Imwe mwacheneswa kale na chifunziso chidakupasani ine chile.

⁴Khalani muna ine, inembo ndinakhala muna imwe. Nthambi pa yokha ene nkhabe bala nsapo ingakhonda khala pamuti, sasawambo na imwe nkhabe bala nsapo mungakhonda khala muna ine.

⁵“Ine ndine mtawi wamfesa, imwe ndimwe nthambi zache. Munthu anakhala muna ine, inembo muna iye, anabala nsapo zizinji; thangwi kusowa ine, imwe nkhabe kwanisa chita pinthu tayu.

⁶Munthu anakhonda khala muna ineyo ambakhala ninga nthambi yakutayiwa mbiuma; nthambi ninga zenezi zimbagumanywa mbiziponywa pamoto mbizipiswa.

⁷Mungakhala muna ine, pontho mafalanga angakhala muna imwe, mupemphe chonsene chinafuna imwecho, tenepo munachipaswa.

⁸Demelero ya Babanga ikuoneswa na kubala kwanu nsapo zizinji, pontho pakukhala anyakufunzanga.

⁹Ine ndimbakufunani ninga montho mumbandifunira Baba. Khalani mu kukufunani kwanga.

¹⁰Mungavera matongero angawa, imwe munakhala mu kukufunani kwanga ninga montho mudavera ine matongero a Babanga mbandikhala mu kundifuna kwache.

¹¹“Ine ndakupangani penepi kuti kukomerwa kwanga kukhale namwe, pontho kuti kukomerwa kwanu kukhale kwakumalisikiratu.

¹²Matongero anga mbawa: Funanani unango na mwanzache, ninga montho mumbakufunirani ine.

¹³Nkhabe munthu kumfuna mwanzache kupiringana penepa pakuti munthu ataye moyo wache thangwi ya ashamwali ache.

¹⁴Imwe ndimwe ashamwali anga mungachita pinakupangani ine.

¹⁵Ine nkhabe kukuchemeranive pontho anyabasanga tayu, thangwi nyabasa nkhabe dziwa chinachita mbuyache. Mbwenye ndinakuchemerani ashamwali anga, thangwi ndakudziwisani pyonsene pyava ine kubulukira kuna Babanga.

¹⁶Si imwe mudandisankhula tayu, mbwenye ndine ndidakusankhulani mbandikupambulani kuti mukabale nsapo zizinji, nsapo zile zinakwanisa kupirira. Tenepo Baba anakupasani chinthu chonsene chinampempha imwe na dzinanga.

¹⁷Tenepo ndinakupasani matongero awa; funanani unango na mwanzache.

¹⁸“Ngakhala anthu a padziko yapansi ambakuzondani, kumbukani kuti adatoma kuzonda ine.

¹⁹Imwe mbamudakhala abodzi na anthu a padziko yapansi, iwo mbadakufunani thangwi ndimwe anzawo. Mbwenye ambakuzondani thangwi ndakusankhulani pakati pa anthu a padziko yapansi, tenepo si imweve anzawo tayu.

²⁰Kumbukani pidakupangani ine pile kuti, ‘Nkhabe bitchu anapiringana mbuyache tayu.’ Ngakhala iwo adandiboneresa, anati aboneresembo imwepo; ngakhala iwo adavera chifunziso changa, anati averembo chifunziso chanu.

²¹Iwo anakuchitirani pinthu pyonsenepi thangwi ndimwe anga; thangwi iwo nkhabe dziwa adandituma ule.

²²Ine mbandidakhonda kudza mbandilonga kuna iwo, iwo nee mbadakhala akudawa tayu. Mbwenye chinchino iwo nkhabe chakuti alonge.

²³Munthu ambandizondayo, azonda pontho Babanga.

²⁴Mbandidakhonda chita pinthu pakati pawo pyakuti chipo nee mbodzi apichita tayu, iwo nee mbadakhala akudawabi; mbwenye chinchino iwo aona pinthu pyachita ine, kwache akutizonda, ine na Babanga ene.

²⁵Penepi pidachitika towera pikwane-kwane pidalembwa m'mwambo mwawo kuti, ‘Iwo adandizonda okhonda na thangwi ene.’

²⁶“Nyakuphedzera anabwera, Mzimu Wakuchena, nyakutchululira pyakuonadi pya Mulungu, pontho nyakubulukira kuna Baba ule. Ndinamtuma kubulukira kuna Baba, tenepo iye anandichitira umboni.

²⁷Imwembo munandichitira umboni, thangwi imwe mwakhala na ine pabodzi kutomera pakutoma.