Read cisena YOHANI 16 Bible Online

YOHANI 16 - cisena bible

YOHANI 16

¹“Ndakupangani pyonsenepi, towera muleke dzataya chikhulupiro chanu.

²Imwe munakhondeswa kapembedza nawo m'nyumba zakupemphereramo, pontho ndzidzi unafika wakuti anthu anafuna kukuphaniwo ananyerezera kuti iwo akutumikira Mulungu na pinachita iwopyo.

³Anthu anachita penepi thangwi iwo hambadziwa nee Baba penu ine tayu.

⁴Mbwenye ndakupangani penepi, towera ndzidzi ungafika unafuna iwo kuchita penepi, mukumbuke kuti ndidakucheuzani. “Sidakupangeni penepi ndzidzi wakutoma ule tayu, thangwi ndikhali pabodzi pene namwe.

⁵Mbwenye chinchino, ndikwenda kuna adandituma ule, kwache pakati panupa nkhabe na mbodzi ene andivunza kunaenda ine tayu.

⁶Mitimanu yaphatwa na nsisi pyakwanga thangwi ya pinthu pyakupangani inepi.

⁷Mbwenye ndikukupangani pyakuonadi kuti mphyadidi kuna imwe kuti ine ndiende, thangwi ndingakhonda kwenda, Nyakuphedzera nee anabwera tayu. Mbwenye ndingaenda, ndinati ndimtumize kuna imwe.

⁸Tenepo iye angabwera anatsikimizira anthu a pansi pano kuti kunyerezera kwawo pa pyakudawa, chilungamo, pontho na kutonga mseru kunafuna dzachita Mulungu nkhwakudawika.

⁹Kunyerezera kwawo pa pyakudawa nkhwakudawika, thangwi iwo hambandikhulupira tayu;

¹⁰kunyerezera kwawo pa chilungamo nkhwakudawika, thangwi ine ndikwenda kuna Baba, tenepo imwe nee munandionave tayu;

¹¹kunyerezera kwawo pa pyakutonga mseru kunafuna chita Mulungu nkhwakudawika, thangwi Satana, mfumu wakuipa wa dziko yapansi pano, akonwa pyache kale.

¹²“Ndina pizinji pyakuti ndikupangeni, kwache chinchino nee munakwanisa kupivesa tayu.

¹³Mbwenye Mzimu Wakuchena, ambatchululira pyakuonadi pya Mulungu ule, angafika, anakuchitisani kuti mudziwe pyakuonadi pyonsene. Iye hanalonga na utongi wache ene tayu, mbwenye analonga pimbampanga Baba, tenepo anakupangani pinthu pinafuna kudza.

¹⁴Iye anandipasa demelero, thangwi iye anakwata pinalonga ine mbapilongambo kuna imwe.

¹⁵Pinthu pyonsene pya Baba mphyanga; ndi thangwi yache ndidalonga kuti Mzimu Wakuchena anakwata pinalonga ine mbapilongambo kuna imwepo.

¹⁶“Pasala kwene ndzidzi pang'ono basi wakuti imwe muleke dzandionave, mbwenye pangagwanda pontho ndzidzi pang'ono munati mundione.”

¹⁷Anango a anyakufunzache penepo adavunzana okha ene mbati, “Akulonganji pinalonga iye kuti, ‘Pasala kwene ndzidzi pang'ono basi wakuti imwe muleke dzandionave, mbwenye pangagwanda pontho ndzidzi pang'ono munati mundione,’ pontho na pyalonga iye kuti, ‘Thangwi ndikwenda kuna Babanga.’

¹⁸Mafala akuti, ‘pasala ndzidzi pang'ono’ akulonga kuti tani? Ife nkhabe vesa pinalonga iyepi!”

¹⁹Yesu adapidziwa kale kuti iwo adafuna kumvunza, tenepo iye adalonga mbati, “Ine ndidalonga kuti, ‘Pasala kwene ndzidzi pang'ono basi wakuti imwe muleke dzandionave, mbwenye pangagwanda pontho ndzidzi pang'ono munati mundione.’ Kadi pinavunzana imwe mphenepi?

²⁰Ndikukupangani pyakuonadi kuti imwe munalira na kusintili, mbwenye anthu a padziko yapansi anakomerwa; imwe munatsukwala, mbwenye kutsukwala kwanuko kunasanduka kukomerwa.

²¹Mkazi angafuna kubala ambasanyika pyakwanga thangwi ndzidzi wa nyatwa wafika, mbwenye sindzidzi mwana nkhubalwa, ambaduwalira nyatwa zache zile, thangwi ambakomerwa kuti mwana aona kunja.

²²Ipyombo pili sasawa kuna imwepo, chinchino imwe mukutsukwala, mbwenye ine ndinakuonani pontho, tenepo mitimanu inakomerwa pyakwanga, kukomerwa kwakuti nee mbodzi anakwanisa dzakumalisa tayu.

²³“Nsiku yeneyo ingafika, imwe nkhabe dzandipemphave pinthu tayu. Ndikukupangani pyakuonadi kuti Baba anakupasani pyonsene pinampempha imwe na dzinanga.[31]

²⁴Kufikirana chinchino pano imwe nee mwapempha chinthu na chibodzi chene na dzinanga tayu; pemphani, tenepo munati mupitambire towera mukomerwe monsene mwene.

²⁵“Ndakupangani penepi mwakuphiphirisa. Ndzidzi unafika wakuti sinalonga mwakuphiphirisa tayu, kwache ndinati ndilonge namwe pya Baba mwakuveka.

²⁶Nsikuyo ingafika, munati mumpemphe na dzinanga. Penepa ndikulonga kuti nkhabe funika kuti ine ndikupemphereni kuna Baba tayu,

²⁷thangwi Baba ene mwenechiro ambakufunani. Iye ambakufunani thangwi imwe mumbafunambo ine, pontho mwakhulupira kuti ndidabulukira kuna Mulungu.

²⁸Ine ndidabulukira kuna Baba mbandidza pansi pano; tenepo chinchino ndikubuluka pansi pano kubwerera kuna Baba.”

²⁹Anyakufunzache adalonga kuna iye mbati, “Chinchino mukupilonga mwakuveka okhonda phiphirisa.

³⁰Chinchino tapidziwa kuti imwe mumbadziwa pinthu pyonsene; nkhabeve funika munthu kuti akuvunzeni tayu. Penepi pikutichitisa kuti tikhulupire kuti imwe mudabulukira kuna Mulungu.”

³¹Yesu adatawira mbati, “Ayi chinchino mwakhulupiradi?

³²Ndzidzi ukudza, pontho wakwana kale, wakuti monsenene munamwazikana, kuthawira m'misa mwanu mbamundisiya ndekha. Mbwenye sinasaliratu ndekha tayu, thangwi Baba ambakhala nane.

³³Ndakupangani penepi towera mukhale na mtendere pakuphatanizana kwanu na ine. Dziko yapansi pano inakuonesani nyatwa, kwache wangisani, thangwi ine ndaikunda!”