Read cisena YOHANI 17 Bible Online

YOHANI 17 - cisena bible

YOHANI 17

¹Pidamala Yesu kulonga penepi, adayang'ana kudzulu mbalonga mbati, “Baba, ndzidzi wakwana. Pasani Mwananu demelero towera Mwana akupasenimbo demelero.

²Thangwi imwe mudampasa utongi pana anthu onsene konsene kwene, towera apase moyo okhonda mala kuna onsene adampasa imwe ale.

³Moyo okhonda mala nkhulonga kuti kudziwa imwepo, Mulungu mbodzi yekha wakuonadi, pontho kudziwa Yesu Khristu, adatuma imwe ule.

⁴Ine ndaonesa demelero yanu padziko yapansi pano pakumalisa kuphata basa idandipasa imwe ile.

⁵Baba, chinchino ndipaseni demelero pamaso panu, demelero ikhali na ine pabodzi na imwe dziko mbidzati lengwa ile.

⁶“Ine ndachitisa kuti mudziwike kuna ale adandipasa imwe kubulukira pa anthu a padziko yapansi. Iwo akhali anthu anu, tenepo imwe mudandipasa. Iwo avera mafalanu,

⁷tenepo chinchino adziwa kuti pyonsene pidandipasa imwe pimbabulukira kuna imwepo.

⁸Ine ndidaapasa mphangwa zidandipasa imwe zile, tenepo iwo adazitambira. Iwo apidziwadi kuti ine ndidabulukira kuna imwe, pontho akhulupira kuti mudandituma ndimwe.

⁹“Ine ndikuapempherera anthu adandipasa imwe ale, thangwi iwo nganu. Ine nkhabe pempherera anthu a padziko yapansi tayu.

¹⁰Pyonsene pina inepi mphyanu, pyonsene pina imwembopyo mphyanga, tenepo demelero yanga ikuoneswa kudzera muna iwo.

¹¹Chinchino ine ndikudza kuna imweko, ine sinakhalave pansi pano tayu, mbwenye iwo ali pansi pano basi. Baba Wakuchena, akoyeni mwadidi na mphamvu za dzinanu, dzina idandipasa imwe ile,[32] towera iwo akhale abodzi sasawambo ninga muna ife abodzi.

¹²Ndzidzi ukhali ine nawo, ndidaakoya mwadidi na mphamvu za dzinanu, dzina idandipasa imwe ile.[33] Ndidaayang'anira mwadidi, tenepo nkhabe mbodzi atayikapo, kupambula ule ene adathema kutayika kuti pikwane-kwane pidalonga Malemba.

¹³Tenepo chinchino ndikudza kuna imwe. Ndikulonga tenepa ndzidzi unakhala ine pansi pano kuti mitimawo ikomerwe monsene mwene na kukomerwa kunaapasa ine.

¹⁴Ine ndidaapasa mphangwa zanu, tenepo anthu a padziko yapansi adaazonda, thangwi iwo si abodzi na anthu a padziko yapansi tayu, ninga inembo si ine mbodzi wa anthu a padziko yapansi tayu.

¹⁵Ine nkhabe kukupemphani kuti muabuluse pansi pano tayu, mbwenye muatchinjirize mwadidi gopesera Satana, nyakuipa ule.

¹⁶Iwo si abodzi na anthu a padziko yapansi tayu, ninga inembo si ine mbodzi wa anthu a padziko yapansi tayu.

¹⁷Achitiseni na pyakuonadi kukhala akupambulika kuna imwe; mafalanu ngakuonadi.

¹⁸Ine ndaatuma padziko yapansi pano sasawambo ninga mudanditumira imwe padziko yapansi pano.

¹⁹Tenepo ine ndikupipereka kuna imwe thangwi ya iwo, towera iwombo akhale akupambulika kuna imwe mwakuonadi.

²⁰“Ine nkhabe pempherera iwo okha tayu, mbwenye na ale ene anandikhulupira, thangwi ya mphangwa zinalalika iwo.

²¹Ndikupemphera kuti iwo onsene akhale abodzi. Baba, achitiseni kuti iwo akhale muna ife, sasawambo ninga mule muna imwe muna ine, inembo muna imwe. Iwo akhale abodzi, towera anthu a padziko yapansi akhulupire kuti mudandituma ndimwe.

²²Ine ndidaapasa demelero idandipasa imwe ile, towera iwo akhale abodzi, ninga ife ndife abodzi.

²³Ine muna iwo, imwembo muna ine, towera akhaledi abodzi chadi-chadi kuti anthu a padziko yapansi adziwe kuti mudandituma ndimwe, pontho kuti imwe mumbaafuna ninga mumbandifunira imwe.

²⁴“Baba, mudandipasa anthuwa ndimwe, tenepo pinafuna ine mphyakuti iwo akhale na ine pabodzi kunakakhala ine kule, towera aonembo demelero yanga, demelero idandipasa imwe ile, thangwi imwe mudandifuna dziko mbidzati lengwa.

²⁵Baba wakulungama, anthu a padziko yapansi nkhabe kukudziwani tayu, mbwenye ine ndimbakudziwani, tenepo awa ambapidziwa kuti ndimwe mudandituma.

²⁶Ine ndidachitisa kuti iwo akudziweni; tenepo ndinati ndithimize kuchita chibodzi-bodzi, towera kundifuna kwanu kukhale muna iwo, pontho kuti ine ndikhale muna iwo.”