Read cisena YOHANI 18 Bible Online

YOHANI 18 - cisena bible

YOHANI 18

¹Pidamala Yesu kupemphera, iye na anyakufunzache adabuluka mbawambukira kumtunda unango wa mkulo wa Kidroni. Kweneko kukhali munda, tenepo Yesu na anyakufunzache adapita m'mundamo.

²Yudasi, nyakupereka Yesu kuna anyamalwache ule, akhaidziwa mbutoyo thangwi kazinji kene Yesu akhadagumanyikana na anyakufunzache kweneko.

³Tenepo Yudasi ule adenda kumundako pabodzi na gulu ya anyankhondo a Chiroma pabodzi na anango mwa anyakulondali Nyumba ya Mulungu akutumwa na anyansembe akulu pontho na Afarisi. Iwo adathukula pida, nyale na nsakali.

⁴Yesu adadziwiratu pyonsene pikhafuna kumchitikira, tenepo adenda patsogolo mbaavunza mbati, “Anafuna imwe mbani?”

⁵Iwo adatawira mbati, “Yesu wa ku Nazareti.” Tenepo Yesu adatawira mbati, “Ndine ene pano.” Yudasi, nyakupereka Yesu ule, adaimira ponthopo pabodzi nawo.

⁶Pidalonga Yesu kuna iwo mbati, “Ndine ene pano,” iwo adafundukira m'nduli mbagwa pansi.

⁷Yesu adaavunza pontho mbati, “Anafuna imwe mbani?” Iwo adatawira mbati, “Yesu wa ku Nazareti.”

⁸Yesu adalonga mbati, “Ndakupangani kale kuti ndine pano. Apo ngakhala munafuna ine, alekeni anangowa aende pyawo.”

⁹Iye adalonga penepi kuti pikwane-kwane pikhadalonga iye pile kuti, “Baba, ine sidataye na mbodzi ene pa anthu adandipasa imwe ale tayu.”

¹⁰Simoni Peturo ule akhali na talasada, adaicholola mbakhamwadza nayo bitchu wa Nyansembe Wamkulu mbagwandiratu khutu yache yakumadyo. Dzinache bitchu weneyu ikhali Malikosi.

¹¹Yesu adapanga Peturo mbati, “Feka talasada m'mbuto mwache! Kani ukunyerezera kuti ndinamwa tayu khomitcho ya nyatwa yandipasa Babayi?”

¹²Gulu ya anyankhondo a Chiroma pabodzi na mkadamu wawo, pontho na anyakulondali a ku Nyumba ya Mulungu ale, adaphata Yesu mbammanga.

¹³Chakutoma adenda naye kuna Anasi, thangwi iye akhali tebzalache Kayafa, ule akhali Nyansembe Wamkulu chaka chenecho.

¹⁴Kayafayo ngule akhadapanga akadamu a Chiyuda kuti mphyadidi kuti munthu mbodzi afere anthu onsene.

¹⁵Simoni Peturo pabodzi pene na nyakufunza unango ule, adatewera Yesu. Nyakufunza unangoyo akhadziwika mwadidi mwene kuna Nyansembe Wamkulu, tenepo adapita na Yesu pabodzi m'thando ya nyumba ya Nyansembe Wamkulu,

¹⁶mwenemo Peturo adaimira panja pamsuwo. Tenepo nyakufunza unangoyo adabwerera panja mbalonga na mtsikana akhayang'anira pamsuwo pale, tenepo adapitisa Peturo m'thando mule.

¹⁷Mtsikana akhali pamsuwo ule adalonga kuna Peturo mbati, “Kadi iwe si iwe mbodzi wa anyakufunza a munthu weneyu tayu?” Peturo adatawira mbati, “Nkhabe si ine tayu.”

¹⁸Kunja kukhatonthola, tenepo anyabasa na anyakulondali a ku Nyumba ya Mulungu akhadaphatisa moto wamakala, mbaimira kuotha. Tenepo Peturo adaimirambo pabodzi na iwo mbaotha moto.

¹⁹Nyansembe Wamkulu adavunza Yesu pya anyakufunzache na pya chifunziso chache.

²⁰Yesu adatawira mbati, “Ine ndikhalonga pakwecha kuna anthu onsene. Ndzidzi onsene ndikhafunzisa m'nyumba zakupemphereramo, pontho na m'Nyumba ya Mulungu, mukhagumanyikana Ayuda onsene pabodzi mule. Nee ndidalonga chinthu na chibodzi chene chibiso-biso tayu.

²¹Apo mwatani munandivunza? Vunzani anthu adandivawo. Ndimomwene kuti iwo akudziwa pinthu pidalonga ine kuna iwo.”

²²Pidalonga Yesu penepi, mbodzi wa anyakulondali penepo adamgasa mbama mbalonga mbati, “Kadi iwe ungalonge tenepa kuna Nyansembe Wamkuluyu?”

²³Yesu adatawira mbati, “Ngakhala ine ndalonga pyakuipa, pilongetu mphapo kuna anthu onsene ali panowa. Mbwenye ngakhala ndalonga pyakuonadi, apo wandimenyeranji?”

²⁴Tenepo Anasi adamtumiza wakumangwa kuna Kayafa, Nyansembe Wamkulu.

²⁵Peturo akhaimira basi penepo kuotha moto. Tenepo anango ale adalonga kuna iye mbati, “Ayi iwe si iwe mbodzi wa anyakufunza a munthu weneyu tayu?” Mbwenye Peturo adatuna mbati, “Nkhabe si ine tayu.”

²⁶Mbodzi wa anyabasa a Nyansembe Wamkulu, mbaleache ule akhadagwandwa khutu na Peturo adalonga mbati, “Kadi sidakuone na iye m'munda mule tayu?”

²⁷Peturo adatuna pontho mbati, “Nkhabe!” Penepo pene dzongwe adalira.

²⁸Bzobzo na machibese akadamu a Chiyuda adakwata Yesu kubuluka naye kunyumba ya Kayafa mbaenda naye kunyumba ya mkulu wa boma. Iwo ene hadapite m'nyumba mule kuti akhonde swipa, thangwi akhateweza mtemo wawo wakupichenesa towera akwanise kudya nawo Phwando ya Paska.

²⁹Natenepo Pilato adabuluka panja kuna iwo mbaavunza mbati, “Munthuyu adawanji kuti mumsumire kuna ine?”

³⁰Iwo adatawira mbati, “Ife nee mbatidadza naye kuna imwe tayu, iye mbadakhonda khala na mseru.”

³¹Pilato adalonga kuna iwo mbati, “Apo mkwateni muende naye kamtonga kuteweza mwambo wanu.” Iwo adatawira mbati, “Ife nkhabe tawiriswa kupha munthu tayu.”

³²Penepi pidachitika towera mafala adalonga Yesu akwane-kwane, mafala akulonga pya kufa kukhafuna iye dzachita.

³³Pilato adabwerera m'nyumba mule mbachemeresa Yesu mbamvunza mbati, “Ayi iwe ndiwe Mfumu wa Ayuda?”

³⁴Yesu adatawira mbati, “Kadi pinandivunza imwepi mukupinyerezera ndimwe, penu anthu anango akupangani pya ine?”

³⁵Pilato adatawira mbati, “Kani ukunyerezera kuti ine ndine Myuda? Akupereka kuna ine ndi anthu a dzinzako na anyansembe akulu. Wasosanji?”

³⁶Yesu adalonga mbati, “Ufumu wanga si wa padziko yapansi pano tayu. Ufumu wanga mbudakhala wa padziko yapansi pano, anyakunditewera mbadachita kale nkhondo kuti ndileke perekwa kuna akadamu a Chiyuda. Nkhabe! Ufumu wanga si wa padziko yapansi pano tayu!”

³⁷Tenepo Pilato adamvunza mbati, “Apo ndiwe mfumu?” Yesu adatawira mbati, “Mwalonga ndimwe kuti ndine mfumu. Ndidabalwa mbandidza padziko yapansi pano kudzera penepi, kudzalonga pyakuonadi. Munthu wakuikhira kunduli pyakuonadi ambandivera.”

³⁸Pilato adamvunza mbati, “Apo pyakuonadipyo ninji?” Tenepo Pilato adabuluka pontho panja mbalonga mbati, “Ine sidamgumane na mseru tayu.

³⁹Mbwenye pana mtemo wakuti ine ndimbakusudzulirani nyaperezo mbodzi pandzidzi wa Phwando ya Paska. Ayi munafuna ndikusudzulireni Mfumu wa Ayudayi?”

⁴⁰Iwo adatawira mwakugaluza fala mbati, “Tayu! Weneyu tayu! Tinafuna Baraba!” Barabayu akhali phanga.