Read cisena YOHANI 19 Bible Online

YOHANI 19 - cisena bible

YOHANI 19

¹Tenepo Pilato adatonga kuti Yesu akwapulwe.

²Anyankhondo adasasanya chipewu chachifumu cha minga mbachiikha mumsolo mwache, pontho adamvazika mkhanjo wamsuzi wanyemba.

³Iwo adenda kuna iye mbodzi na mbodzi mbalonga mbati, “Dondowe, Mfumu wa Ayuda!” Tenepo adamgasa mbama.

⁴Pilato adenda pontho panja mbalonga kuna Ayuda ale mbati, “Yang'anani, ndinambulusa panja pano kuti mupidziwe kuti ine sidamgumane na mseru tayu.”

⁵Natenepo Yesu adabuluka panja, mwenemo avala chipewu chachifumu cha minga na mkhanjo wamsuzi wanyemba. Pilato adalonga mbati, “Yang'anani! Munthu ule ngushu!”

⁶Pidamuona a nyansembe akulu na anyakulondali a ku Nyumba ya Mulungu adakhuwa mbati, “Mkhomereni pamtanda! Mkhomereni pamtanda!” Pilato adalonga mbati, “Apo ndokoni naye mwekha ene kamkhomera. Ine sidamgumane na mseru tayu.”

⁷Ayuda ale adatawira mbati, “Kuteweza mwambo wathu iye athema kufa, thangwi iye akhalonga kuti ndi Mwana Mulungu.”

⁸Pidava Pilato penepi, adachita mantha pyakwanga pene,

⁹mbapita pontho m'nyumba mule mbavunza Yesu mbati, “Kwanu nkhupi?” Mbwenye Yesu hadatawire tayu.

¹⁰Pilato adalonga kuna iye mbati, “Kadi iwe hunanditawira tayu? Kumbuka kuti ine ndina utongi wakukusudzula na kukukhomera kwene pamtanda.”

¹¹Yesu adatawira mbati, “Imwe muna utongi pana ine thangwi Mulungu ndiye adakupasani utongiwo. Tenepo munthu adandipereka kuna imwe ule adawa pikulu pene.”

¹²Pidava Pilato penepi, adayesa kusaka njira yakuti amsudzule nayo. Mbwenye Ayuda ale adakhuwa mbati, “Mungamsudzula kwene, imwe nee si imweve shamwaliache Mfumu wa Roma tayu! Munthu anapiikha yekha kukhala mfumu, weneyo akupandukira Mfumu wa Roma!”

¹³Pidava Pilato mafala enewa, adabuluka na Yesu panja mbakhala pampando wache wakutongera miseru pambuto yakuchemerwa, “Thando yakumangwa na miyala.” (Pa Chiyuda ndi “Gabata.”)

¹⁴Ndzidzi ukhali chifupi masikati a nsiku ikhasasanyikira Ayuda pya pa Nsiku Yakupuma ya Paska, ikhali mangwana mwache ile. Pilato adalonga kuna Ayuda ale mbati, “Uyutu mfumu wanu.”

¹⁵Iwo adatawira mbati, “Mpheni! Mpheni! Mkhomereni pamtanda!” Pilato ule adaavunza mbati, “Munafuna ndikhomere pamtanda mfumu wanuyi?” Anyansembe akulu adatawira mbati, “Mfumu anadziwa ife ndi Mfumu wa Roma ene basi!”

¹⁶Tenepo Pilato adapereka Yesu m'manja mwawo kuti iye akhomerwe pamtanda. Tenepo anyankhondo adamkwata Yesu.

¹⁷Iye adathukula mtandache mbaenda nawo kumbuto yakuchemerwa “Chibade cha Msolo.” (Pa Chiyuda ndi “Gologota.”)

¹⁸Kweneko adamkhomera pamtanda. Adakhomera pontho pamtanda anthu awiri, mbodzi kumadyo, unangombo kumabzere, Yesu pakati.

¹⁹Pilato adalemba chidziwiso mbachikhomera padzulu pamtanda wa Yesu chakuti, “Yesu wa ku Nazareti, Mfumu wa Ayuda.”

²⁰Anthu azinji adawerengapo, thangwi pambuto padakhomerwa Yesu pamtanda pakhali chifupi na mzinda wa Yerusalemu. Chidziwiso chidalembwa na chilongero cha Chiyuda, Chiroma na Chigriki.

²¹Anyansembe akulu adalonga kuna Pilato mbati, “Lekani lemba kuti, ‘Mfumu wa Ayuda,’ mbwenye mulembe kuti, ‘Munthuyu akhalonga kuti, Ine ndine Mfumu wa Ayuda.’ ”

²²Pilato adatawira mbati, “Pyalemba inepi pilekeni pikhale tenepo.”

²³Pikhadamala anyankhondo kukhomera Yesu pamtanda, iwo adakwata nguwo zache mbazigawa mapindi anayi, towera munthu akwate phindi yache. Iwo adakwata pontho mkhanjo wache wakuchita kulukwa monsene mwene mbukhonda khala na msono.

²⁴Anyankhondo ale adalonga okha ene mbati, “Mbatilekeni kuung'amba, mbwenye tichite ntsango towera tione mbani anafuna kuukwata.” Penepi pidachitika towera pikwane-kwane pidalonga Malemba kuti, “Iwo adagawana nguwo zanga mbachitira ntsango mkhanjo wanga.” Tenepo penepi ndiye pidachitadi anyankhondo ale.

²⁵Mache Yesu, mbaleache mache, Maria mkazi Kaleopa na Maria wa ku Magadala adaimira chifupi na mtanda wa Yesuwo.

²⁶Yesu adaona mache pabodzi na nyakufunzache wapamtima ule aimira penepo, natenepo iye adalonga kuna mache mbati, “Mkaziwe, mwanako ngushu.”

²⁷Tenepo adalongambo kuna nyakufunzache ule mbati, “Mako ngushu.” Kubulukira ndzidzi wenewo nyakufunza ule adamkwata mkazi ule mbakakhala naye kwawo.

²⁸Yesu adapidziwa kuti chinchino pyonsene pikhadakwana-kwana. Tenepo kuti Malemba akwane-kwane iye adalonga mbati, “Ndina nyota.”

²⁹Penepo pakhali chitomba chakudzala na vinyu wakujuja, tenepo chikhwasa-khwasa chidavikwa mwenemo, mbichifekwa kuphesi mbichifikiswa pamulomo wa Yesu.

³⁰Yesu adamwa vinyu ule mbalonga mbati, “Pyakwana-kwana.” Tenepo adazolima pansi mbafa.

³¹Akadamu a Chiyuda adapempha Pilato kuti aatawirise kaswa miyendo ya amuna akhadakhomerwa pamtanda ale mbatchithisa mitembo yawo pamtanda pale. Ikhali nsiku ikhasasanyikira Ayuda pya pa Nsiku Yakupuma, natenepo iwo adapempha penepi, thangwi hakhafuna kuti mitembo ile ikhale pamtanda pale pa Nsiku Yakupuma tayu, podi Nsiku Yakupuma yeneyo ikhali yakuchena pyakwanga.

³²Tenepo anyankhondo adenda kaswa miyendo ya amuna awiri adakhomerwa pamtanda pabodzi na Yesu ale, mbatoma na mbodzi, kubuluka penepo adachita chibodzi-bodzi kuna unangoyo.

³³Mbwenye pidafika iwo pana Yesu, adaona kuti iye akhadafa kale, natenepo iwo hadasweve tayu miyendo yache.

³⁴Mbwenye mbodzi wa anyankhondo ale adalasa mbavu za Yesu na dipa, tenepo kabodzi kene chiropa na madzi pidachucha.

³⁵Ule adaona penepi pikuchitika akupichitira umboni kuti imwembo mukhulupire.[34] Umboni wachewo ngwakuonadi, tenepo akudziwa kuti pinalonga iyepyo mphyakuonadi.

³⁶Penepi pidachitwa kuti pikwane-kwane pidalonga Malemba kuti, “Nee gogodo yache na ibodzi ene inaswiwa tayu.”

³⁷Pana panango m'Malemba palembwa kuti, “Anthu anayang'ana pana adalasa iwo ule.”

³⁸Kubuluka penepo Yosefe wa kuluwani ya Arimatea, adapempha Pilato kuti amtawirise katchithisa mtembo wa Yesu pamtanda. Yosefe akhali nyakutewera wa Yesu, kwache akhapibisa, thangwi akhagopa akadamu a Chiyuda. Pilato adamtawirisa kautchithisa. Tenepo Yosefe adenda mbakautchithisapo.

³⁹Iye adenda pabodzi na Nikodemu, ule akhadenda kuna Yesu na mosiku. Nikodemu adakwata mafuta akununkhira, akuvungazwa na mure, pontho na aloe, akudzala mabuyawo manomwe.[35]

⁴⁰Amuna awiriwa adakwata mtembo wa Yesu mbaukukutiza na nguwo zakuchena pabodzi na mafuta akununkhira ale kuteweza mtemo wa Ayuda wakusasanya mtembo angafuna kuuikha m'masiye.

⁴¹Kumbuto kukhadakhomerwa Yesu kukhali munda. Tenepo m'mundamo mukhali masiye achinchino ale chipo hadaikhwe munthu na mbodzi ene tayu.

⁴²Podi ikhali nsiku ikhasasanyikira Ayuda pya pa Nsiku Yakupuma, pontho kuti masiyewo akhali chifupi, iwo adaikha mtembo wa Yesu m'masiyemo.