Read cisena YOHANI 2 Bible Online

YOHANI 2 - cisena bible

YOHANI 2

¹Pidagwanda nsiku ziwiri, kuluwani ya Kana m'nthemba ya Galilea kukhali phwando yakukazhali, mache Yesu akhali kweneko.

²Yesu pabodzi pene na anyakufunzache akhadachemerwambo kuphwandoko.

³Pidamala vinyu, mache Yesu adalonga kuna iye mbati, “Vinyu aamalira.”

⁴Yesu adatawira mbati, “Mama, lekani chita kundipanga pyakuchita. Ndzidzi wanga hudzati kwana tayu.”

⁵Mache adapanga anyabasa penepo mbati, “Chitani pyonsene pinakupangani iye.”

⁶Ayuda ana mtemo wawo wakusamba towera achene kuteweza mwambo wa Mose na thangwi yeneyi penepo pakhali maphiso makulu-makulu matanthatu akukwanisa kupita nkhali zishanu za madzi.

⁷Yesu adapanga anyabasa ale mbati, “Dzazani maphisowa na madzi.” Iwo adaadzazadi mpakana kutayikira,

⁸tenepo iye adaapanga mbati, “Tungani madzi muende nawo kuna nyakuyang'anira phwandoyi.” Iwo adachitadi tenepo.

⁹Pidalawa iye madzi akhadasanduka vinyu ale, iye hadadziwe tayu kukhadabulukira vinyu ule, mbwenye anyabasa ene basi ndiye adadziwa kukhadabulukira vinyu ule; tenepo iye adachemera nyakukazhali

¹⁰mbalonga kuna iye mbati, “Munthu onsene chakutoma ambapereka vinyu wakudzipa, tenepo anthu angamala khuta, iye ambaapasa vinyu wakukhonda dzipa. Mbwenye imwe mwakoya pyanu vinyu wakudzipa kufikirana chinchino.”

¹¹Yesu adachita chidzindikiro chache chakutomachi ku Kana m'nthemba ya Galilea; kweneko iye adaonesa demelero yache, tenepo anyakufunzache adamkhulupira.

¹²Kubuluka penepo Yesu na mache, abale ache pabodzi na anyakufunzache adenda kuluwani ya Kafaranao mbakhala kweneko nsiku pang'ono.

¹³Ndzidzi wa Phwando ya Paska ukhali chifupi, tenepo Yesu adenda kumzinda wa Yerusalemu.

¹⁴Iye adapita muchintalo cha Nyumba ya Mulungu mbagumana anthu akugulisa ng'ombe, mabira na nkhangaiwa, pontho anyakuchinja kobiri akhala m'pidade mwawo.

¹⁵Natenepo iye adasasanya mthambo mbathamangisira anthu onsene panja pabodzi na nyama zawo zene m'Nyumba ya Mulungu ile, mabira na ng'ombe zene; adagudubula pidade pya anyakuchinja kobiri mbamwaza-mwaza kobiri zawo;

¹⁶mbapanga anyakugulisa nkhangaiwa ale mbati, “Zibuluseni panja! Lekani sandusa Nyumba ya Babanga kukhala msika!”

¹⁷Anyakufunzache adakumbuka Malemba akuti “Mulungu, phinga yanga pa Nyumbanu ikugaka muna ine ninga moto.”

¹⁸Akadamu a Chiyuda adamtawira na kumvunza mbati, “Unakwanisa kutionesa chidzindikiro chanji chakuti iwe una utongi wakuchitira nawo penepi?”

¹⁹Yesu adaatawira mbati, “Gomolani Nyumba ya Mulunguyi, inembo ndinaimanga pontho nsiku zitatu.”

²⁰Iwo adamvunza mbati, “Kadi iwe unakwanisa kumanga pontho Nyumbayi nsiku zitatu zokha basi? Nyumbayi yamala pyaka makumanayi na pitanthatu ikumangwa!”

²¹Mbwenye Nyumba ikhalonga Yesu ikhali manungo ache.

²²Pidalamuswa iye kuimfa, anyakufunzache adakumbuka kuti iye akhadalonga mafala enewa. Tenepo iwo adakhulupira Malemba pontho na pikhadalonga Yesu pile.

²³Pikhali Yesu mu Yerusalemu, pandzidzi wa Phwando ya Paska, anthu azinji adamkhulupira pidaona iwo pidzindikiro pidachita iye.

²⁴Mbwenye Yesu hadaanyindire tayu, thangwi iye adaadziwa onsenewo.

²⁵Nee kuti munthu achite kumpanga pya iwo tayu, thangwi iye ene adadziwa manyerezero awo.