Read cisena YOHANI 20 Bible Online

YOHANI 20 - cisena bible

YOHANI 20

¹Bzobzo pa Dimingu kunja mbakudzati chena, Maria wa ku Magadala adenda kumasiye kule mbagumana mwala wabuluswapo pamsuwo wa masiye ale.

²Iye adenda na kuthamanga kuna Simoni Peturo na kuna nyakufunza unango wapamtima pa Yesu ule mbaapanga mbati, “Mtembo wa Mbuya wabuluswamo m'masiye, penu waenda kaikhwa kupi penu!”

³Tenepo Peturo na nyakufunza unango ule adenda kumasiye kule.

⁴Onsene uwiriawo adathamanga pabodzi pene, mbwenye nyakufunza unango ule adathamanga pyakwanga kupiringana Peturo mbatoma kufika ndiye kumasiye kule.

⁵Iye adakotama mbaona nguwo zakuchena zikhadakukutizirwa mtembo wa Yesu zili apo, mbwenye iye hadapite m'bwalo mule tayu.

⁶Peturo akhali m'nduli mwache ule adafikambo penepo mbapitiratu m'masiye mule. Iye adaona kwene nguwo zakuchena zile basi zili tule,

⁷pontho nguwo ikhadakukutizirwa msolo wa Yesu. Iyo hikhali pabodzi na nguwo zakuchena zile tayu, mbwenye ikhali mulu pa yokha.

⁸Tenepo nyakufunza unango akhadatoma kufika penepo ule, adapitambo mwenemo. Iye adaona mbakhulupira.

⁹Iwo hadavese tayu basi pidalonga Malemba pile kuti Yesu athema kulamuka kuimfa.

¹⁰Tenepo anyakufunza ale adabwerera kwawo.

¹¹Maria adaimira kunja kwa masiye ale kulira. Pikhalira iye, adakotama mbasuzumira m'masiye mule,

¹²tenepo adaona angelo awiri avala nguwo zakuchena, akhala pambuto pakhadaikhwa mtembo wa Yesu, mbodzi kumisolo, unangomboyo kumiyendo.

¹³Iwo adamvunza mbati, “Mkaziwe, unaliranji?” Maria adatawira mbati, “Mbuyanga akwatwamo, penu aenda kaikhwa kupi penu!”

¹⁴Tenepo iye adazungunuka mbaona Yesu aimira penepo; mbwenye iye hadapidziwe tayu kuti iye akhali Yesu.

¹⁵Yesu adamvunza mbati, “Mkaziwe, watani unalira? Anasaka iwe mbani?” Mkazi ule akhanyerezera kuti iye akhali nyakulima wa munda ule, natenepo adalonga kuna iye mbati, “Mbuya ngakhala ndimwe mwamkwata, ndipangeni kwamuikha imwe, tenepo ine ndinati ndiende kamkwata.”

¹⁶Yesu adalonga kuna iye mbati, “Maria!” Maria ule adazungunuka mbamuyang'ana mbalonga mbati, “Raboni!” (Kweneku nkhulonga kuti “Mfunzisi” m'chilongero cha Chiyuda.)

¹⁷Yesu adampanga mbati, “Leka kundikhuya, thangwi ndidzati kwira kudzulu kuna Baba tayu. Mbwenye ndoko kuna abale anga ukaapange kuti ndikukwira kudzulu kuna Babanga, ule ndi Baba wa imwe monsene, Mulungu wanga, ule pontho ndi Mulungu wanu.”

¹⁸Tenepo Maria wa ku Magadala adenda mbakapanga anyakufunza ale kuti iye akhadaona Mbuya, pontho adaapanga pyonsene pikhadampanga Mbuya pile.

¹⁹Ndzidzi ukhali mawulo pa Dimingupo, tenepo anyakufunza adagumanyikana pabodzi m'subi yakufungwa mwadidi, thangwi akhagopa akadamu a Chiyuda. Tenepo Yesu adadza mbaimira pakati pawo mbalonga mbati, “Mtendere mbukhale namwe.”

²⁰Pikhadamala iye kulonga penepi adaaonesa manja na mbavu zache. Anyakufunza ale adakomerwa pyakwanga kuona Mbuya.

²¹Yesu adalonga pontho kuna iwo mbati, “Mtendere mbukhale namwe. Ninga mudanditumira Baba, sasawambo ine ndikukutumani.”

²²Tenepo iye adaapepesera muya mbalonga mbati, “Tambirani Mzimu Wakuchenayo.

²³Imwe mungalekerera pyakudawa pya anthu, iwo alekererwadi, mbwenye mungakhonda kualekerera, iwo nkhabe lekererwadi tayu.”

²⁴Mbodzi wa anyakufunza khumi na awiri ale, dzinache Tomasi (wakuchemerwa Mwana mphasa) hakhali pabodzi nawo pidadza Yesu tayu.

²⁵Tenepo anyakufunza anango ale adampanga mbati, “Ife tamuona Mbuya!” Tomasi adalonga mbati, “Kukhulupira kwanga ndingaona madazwi a perego m'manja mwache, pontho ndingaphata madazwiwo na chala changa mbandiphata na manjanga m'mbavu mwache.”

²⁶Pidagwanda dimingu ibodzi, anyakufunzache adagumanyikana pontho m'subi, Tomasi akhali nawo mwenemo. Misuwo idafungwa mwadidi mwene, mbwenye Yesu adadza mbaimira pakati pawo mbalonga mbati, “Mtendere mbukhale namwe.”

²⁷Tenepo iye adalonga kuna Tomasi mbati, “Tomasi, phata na chala chako apa, pontho yang'ana m'manja mwangamu; phata na dzanjako m'mbavu mwangamu. Leka penuka, mbwenye khulupira.”

²⁸Tomasi adatawira mbati, “Mbuyanga, pontho Mulungu wanga!”

²⁹Yesu adalonga kuna iye mbati, “Kani iwe wakhulupira thangwi wandiona? Ngakutsanzaya anthu ale ambakhulupira okhonda kundiona!”

³⁰Yesu adachita pidzindikiro pinango pizinji pamaso pa anyakufunzache pile hapidalembwe m'bukhumu tayu.

³¹Mbwenye penepi pyalembwa kuti imwe mukhulupire[36] kuti Yesu ndi Khristu, Mwana Mulungu, pontho kuti kudzera m'chikhulupiro chanu pana iye, mukhale na moyo chadi-chadi.