Read cisena YOHANI 21 Bible Online

YOHANI 21 - cisena bible

YOHANI 21

¹Kubuluka penepo Yesu adaonekera pontho kuna anyakufunzache kunyanza ya Tiberia. Penepi pidachitika tenepa.

²Simoni Peturo, Tomasi (wakuchemerwa Mwana mphasa), Natanaele wa ku Kana m'nthemba ya Galilea, ana a Zebedeo, na anyakufunza anango awiri akhali pabodzi onsene.

³Simoni Peturo adalonga kuna anzache ale mbati, “Ndikwenda kapha nsomba.” Iwo adalonga mbati, “Tinaenda nawembo.” Tenepo iwo adapakira m'mwadiya mbaenda. Mbwenye mosiku onsenewo hadaphe chinthu na chibodzi chene tayu.

⁴Pikhachena kunja, Yesu adaimira pamtunda, mbwenye anyakufunza ale hadadziwe kuti munthu ule akhali Yesu tayu.

⁵Tenepo iye adaavunza mbati, “Ayi aphalemwe, hamudaphe pinthu tayu?” Iwo adatawira mbati, “Nkhabe chinthu na chibodzi chene tayu.”

⁶Iye adalonga kuna iwo mbati, “Gweserani kokotanu kukhundu yamadyo ya mwadiya, munati muphe nsomba.” Tenepo iwo adagwesera kokotawo mbachimwana kuikweyera m'mwadiya, thangwi akhadamanga nsomba zizinji zene.

⁷Nyakufunza wapamtima pa Yesu adalonga kuna Peturo mbati, “Ndi Mbuya!” Pidava Peturo kuti akhali Mbuya, adavala mkhanjo wache thangwi akhadaudula. Penepo pene adanumphira m'nyanza mule.

⁸Anyakufunza anango ale adadza na mwadiya pamtunda uku akukweya kokotawo yakudzala na nsomba, podi iwo akhali chifupi na pamtunda mathanyo dzana ibodzi.

⁹Pidafika iwo pamtunda pale adaona nsomba pamoto wamakala, pontho na mikate.

¹⁰Tenepo Yesu adalonga kuna iwo mbati, “Idzani kuno na nsomba pang'ono zapha imwe chinchino panozo!”

¹¹Simoni Peturo adapakira m'mwadiya mule mbakweyera kumtunda kokota ile yakudzala na nsomba zikulu-zikulu zakukwana dzana na makumashanu na zitatu. Podi kwene kuti nsomba zikhadainjipa, kwache kokota ile hidang'ambika tayu.

¹²Yesu adalonga kuna iwo mbati, “Idzani mudye.” Nee nyakufunza na mbodzi ene adawanga mtima kumvunza tayu kuti “Ndimwe ani?” Thangwi adapidziwa kuti iye akhali Mbuya.

¹³Yesu adaafendedzera mbakwata mkate mbaapasa. Adachita chibodzi-bodzi kuna nsomba zile.

¹⁴Keneka kakhali kachitatu Yesu kuonekera kuna anyakufunzache pidalamuka iye kuimfa.

¹⁵Pikhadamala iwo kudya, Yesu adalonga kuna Peturo mbati, “Simoni, mwana Yohani, ayi iwe umbandifunadi kupiringana anangowa?” Iye adatawira mbati, “Ande, Mbuya, imwe mukupidziwa kuti ndimbakufunani.” Yesu adalonga kuna iye mbati, “Dyesa anabirangawa.”

¹⁶Yesu adalonga pontho kachiwiri kache kuna iye mbati, “Simoni, mwana Yohani, ayi iwe umbandifunadi?” Iye adatawira mbati, “Ande, Mbuya, imwe ene mukupidziwa kuti ndimbakufunani.” Yesu adalonga kuna iye mbati, “Yang'anira mwadidi mabirangawa.”

¹⁷Yesu adalonga pontho kachitatu kache kuna iye mbati, “Simoni, mwana Yohani, ayi iwe umbandifunadi?” Peturo adatsukwala thangwi Yesu adamvunza kachitatu kuti, “Ayi iwe umbandifunadi?” Tenepo iye adalonga kuna Yesu mbati, “Mbuya, imwe mumbapidziwa pyonsene, imwe mumbapidziwa kuti ndimbakufunani.” Yesu adalonga kuna iye mbati, “Dyesa mabirangawa.

¹⁸Ndikukupanga pyakuonadi kuti pikhali iwe mphale, ukhasasanyika mbuenda pyako kukhafuna iwe, mbwenye ungakalamba, unafuthula mikono yako, tenepo unango anakumanga mbaenda nawe kunakhonda iwe funa.”

¹⁹Yesu adalonga penepi kuti adziwise Peturo kufa kukhafuna iye dzachita kudzesa demelero kuna Mulungu. Tenepo Yesu adalonga kuna iye mbati, “Nditewere!”

²⁰Peturo adazungunuka mbaona nyakufunza unango wapamtima pa Yesu ule m'nduli mwache, akhadatsamira Yesu pikhadya iwo pa Phwando ule, mbavunza mbati, “Mbuya, mbani anafuna dzakuperekani kuna anyamalwanu?”

²¹Pidaona Peturo nyakufunzayo adavunza Yesu mbati, “Mbuya, apo ushumbo?”

²²Yesu adatawira mbati, “Ngakhala ine ndinapifuna kuti iye akhale na moyo kufikirana ine ndidze pontho, iwembo uli napyonji? Nditewere!”

²³Tenepo mbiri idaveka pakati pa anyakutewera a Yesu onsene kuti nyakufunza ule hanafa tayu. Yesu hakhalonga kuti iye hanafa tayu, mbwenye adalonga mbati, “Ngakhala ine ndinapifuna kuti iye akhale na moyo kufikirana ine ndidze pontho, iwembo uli napyonji?”

²⁴Iye ndi nyakufunza adachitira umboni pya pinthu penepi, pontho nyakupilemba ule. Tenepo timbapidziwa kuti pidalonga iye pile mphyakuonadi.

²⁵Chinchino pinthu pinango pikhadachita Yesu pilipo pizinji pene mwakuti pyonsene mbapidalembwa, ndikunyerezera kuti dziko yonsene yapansi nee mbapadakhala mbuto yakukwana tayu kukoya mabukhu onsene adafuna kulembwa ale.