Read cisena YOHANI 3 Bible Online

YOHANI 3 - cisena bible

YOHANI 3

¹Pakhali mkadamu wa Chiyuda dzinache Nikodemu, wa m'gulu ya Afarisi.

²Nsiku inango iye adenda na mosiku kuna Yesu mbakalonga mbati, “Rabi, timbapidziwa kuti imwe ndimwe mfunzisi wakutumwa na Mulungu. Nee munthu pyache anakwanisa kuchita pidzindikiro ninga pinachita imwepi ngakhala Mulungu hali naye tayu.”

³Yesu adamtawira mbati, “Ndikukupanga pyakuonadi kuti nkhabe munthu anakwanisa kupita mu Ufumu wa Mulungu,[2] iye angakhonda balwa pontho.”[3]

⁴Nikodemu adavunza mbati, “Pinakwanisika tani kuti munthu wamkulu kale abalwe pontho? Nkhabe kwanisika tayu kuti iye apite m'mimba mwa mache mbabalwa kachiwiri kache.”

⁵Yesu adatawira mbati, “Ndikukupanga pyakuonadi kuti munthu angakhonda balwa mwa madzi pontho mwa Mzimu Wakuchena, nkhabe kwanisa kupita mu Ufumu wa Mulungu tayu.

⁶Munthu ambabalwa kumanungo na makolo ache, mbwenye ambabalwa muuzimu na Mzimu Wakuchena.

⁷Leka dodoma na pyakupanga inepi kuti, ‘Monsenene mubalwe pontho.’[4]

⁸Mphepo imbaenda kunafuna iyo, iwe umbava kutitima kumbachita iyo, mbwenye iwe humbadziwa kumbabulukira na kunaenda iyo tayu. Pyakhala ninga tenepa kuna munthu onsene wakubalwa mwa Mzimu Wakuchena.”

⁹Nikodemu adavunza mbati, “Penepimbo pinakwanisika tani?”

¹⁰Yesu adatawira mbati, “Iwe ndiwe mfunzisi wakuveka mu Israele, apo iwe nkhabe vesa pinthu penepi tayu?

¹¹Ndikukupanga pyakuonadi kuti ife timbalonga pimbadziwa ife, mbatichitira umboni pyaona ife, mbwenye nkhabe mbodzi pakati panu anafuna kutawira mphangwa zathuzi tayu.

¹²Ngakhala imwe nkhabe khulupira tayu pinakupangani ine pinthu pya dziko yapansi pano, apo munakhulupira tani ndingakupangani pinthu pya kudzulu?

¹³Nkhabe mbodzi adenda kudzulu kupambula Mwana Munthu ene basi, ule adatchitha pansi pano kubulukira kudzulu.

¹⁴“Ninga mudaikhira Mose nyoka yakusasanywa na mkuwa pamuti mbaikwiza m'dzulu m'thando yatchetcha mule, Mwana Munthu anakwizwambo sasawa,

¹⁵towera munthu anamkhulupirayo akhale na moyo okhonda mala.

¹⁶Mulungu adaafuna pikulu anthu a padziko yapansi pano, natenepo adapereka Mwanache mbodzi yekha ene basi, towera onsene anakhulupira Mwanayo aleke vungwa, mbwenye akhale na moyo okhonda mala.

¹⁷Thangwi Mulungu hadatume Mwanache padziko yapansi kuti atonge anthu mseru tayu, mbwenye dzaapulumusa.

¹⁸“Munthu anakhulupira Mwanayu nkhabe dzakonwa tayu; mbwenye munthu anakhonda kumkhulupira, weneyo akonwa pyache kale, thangwi iye hadakhulupire Mwana mbodzi yekha wa Mulungu tayu.

¹⁹Mseru wache ngwenewu wakuti cheza chadza padziko yapansi, mbwenye anthu akufuna pyawo mdima, kuleka cheza, thangwi ya makhaliro awo akuipa.

²⁰Munthu wakuchita pyakuipa ambazonda cheza, tenepo iye hambadza kuna cheza tayu, thangwi iye nkhabe funa tayu kuti pyache pimbachita iyepyo pionekere pakwecha.

²¹Mbwenye nyakuchita pyakuonadi ambadza kuna cheza towera cheza chionese pakwecha kuti iye adavera Mulungu na pidachita iyepyo.”

²²Kubuluka penepo Yesu na anyakufunzache adenda kunthemba ya Yudea, kule kudakhala iye nawo ndzidzi ene mbabatiza.

²³Yohani Nyakubatiza akhabatiza ku Anoni chifupi na Salimu, thangwi pambuto penepo pakhali madzi azinji. Anthu akhaenda kuna iye, iyembo akhaabatiza.

²⁴Penepi pidachitika mwenemo Yohani mbadzati ikhwa m'perezo.

²⁵Anango mwa anyakufunza a Yohani adatoma kupokanyisana na Myuda unango[5] pamtemo wakusamba thangwi ya kupembedza Mulungu.

²⁶Tenepo iwo adenda kuna Yohani mbakalonga mbati, “Mfunzisi, ayi mukumkumbuka munthu akhali na imwe ule kumabulukiro dzuwa a mkulo wa Yorodani, munthu akhalonga imwe ule? Chinchino iye akubatizambo, tenepo anthu onsene akwenda kuna iye!”

²⁷Yohani adatawira mbati, “Nkhabe munthu anakwanisa tambira pinthu ngakhala Mulungu hadapipereke kuna iye tayu.

²⁸Imwe ene ndimwe mboni zanga zakuti ine ndidalonga kuti ine si ine Khristu tayu, mbwenye ndatumwa kwene patsogolo pache.

²⁹Nyakusemba ndiye mwenechiro mkazi. Mbwenye shamwaliache nyakusemba, ule ambaimira chifupi naye kumvesera, ambakomerwa pikulu angava fala ya nyakusembayo. Ntchibodzi-bodzimbo, ine ndakomerwa pyakwanga pene.

³⁰Iye athema kukhala wamkulu, inembo ndathema kukhala wakuchepa.”

³¹“Nyakubulukira kudzulu ali padzulu papinthu pyonsene. Nyapansi pano ngwapansi pano, pontho pinthu pimbalonga iye mphyapansi pano, mbwenye nyakubulukira kudzulu ngwamkulu kupiringana pinthu pyonsene.

³²Iye ambalonga pyaona na pyava iye, mbwenye nkhabe mbodzi ambatambira mphangwa zache.

³³Mbwenye munthu anatambira mphangwa zachezi penepo atsikimizira kuti Mulungu ngwakuonadi.

³⁴Ule ambatumwa na Mulungu ambalonga mafala a Mulungu, thangwi Mulungu ambampasa Mzimu wache Wakuchena mwakukhonda umirwa.

³⁵Baba ambamfuna Mwanache, tenepo iye aikha pinthu pyonsene m'manja mwache.

³⁶Munthu anakhulupira Mwanayu ana moyo okhonda mala; mbwenye munthu anakhonda vera Mwanayu, nkhabe dzakhala na moyo wenewo tayu, mbwenye anathimiza kutchunyuswa na Mulungu.”