Read cisena YOHANI 4 Bible Online

YOHANI 4 - cisena bible

YOHANI 4

¹Afarisi adapiva kuti Yesu akhagumana pontho akhabatiza anyakutewera azinji kupiringana Yohani.

²Yesu yekha ene hadabatize munthu na mbodzi ene tayu, mbwenye anyakufunzache ndiye akhabatiza.

³Pidava Yesu pikhalongwa pile, adabuluka ku Yudea kule mbabwerera ku Galilea;

⁴pakubwerera pache adagwanda na m'nthemba ya Samaria.

⁵Tenepo iye adafika muluwani ya ku Samaria yakuchemerwa Sikara, ile ikhali chifupi na munda ukhadapereka Yakobo kuna mwanache Yosefe.

⁶Mwenemo mukhali mchera wa Yakobo, tenepo Yesu, na kutopa na ulendoache, adakhala pansi pa mcherapo. Ukhali ndzidzi wa masikati.

⁷Pidadza mkazi wa mu Samariamo dzatunga madzi, Yesu adalonga kuna iye mbati, “Pasenimbo madzi ndimwe.”

⁸Anyakufunzache akhadaenda kuluwani kagula pyakudya.

⁹Mkazi ule adatawira mbati, “Imwe ndimwe Myuda, ine ndine Msamaria, apo pinakwanisika tani kuti imwe mundipemphe madzi akumwa?” Ayuda nkhabe phatisa basa makhomitcho penu pitomba pibodzi pile pyaphatisa basa Asamaria tayu.[6]

¹⁰Yesu adatawira mbati, “Iwe mbudadziwa chimbapereka Mulungu, pontho mbudamdziwa anakupempha madzi akumwayu, iwembo mbudampempha, tenepo iye mbadakupasa madzi akupasa moyo.”

¹¹Mkazi ule adalonga mbati, “Mbuya, imwe nkhabe chakutungira, pontho mcherawu ngwakuzwika pyakwanga. Apo madzi akupasa moyo munaakwata kupi?

¹²Mcherawu tidasiyirwa na kholo wathu Yakobo. Iye na anache pabodzi na mikumbi ya pifuyo pyache akhamwa pano. Ayi imwe mukulonga kuti ndimwe mkulu kupiringana Yakoboyo?”

¹³Yesu adatawira mbati, “Munthu anamwa madzi enewa anava pontho nyota,

¹⁴mbwenye nyakumwa madzi anafuna ine kumpasa hanavave pontho nyota tayu. Madzi anafuna ine kumpasa anakhala muna iye ninga mphuno ya madzi amoyo mbimpasa moyo okhonda mala.”

¹⁵Mkazi ule adalonga mbati, “Mbuya, ngandipasenimbo madziwo, towera ine ndileke dzavave nyota penu kudza pontho pano dzatunga madzi.”

¹⁶Yesu adampanga mbati, “Ndoko kachemere mamunako udze naye kuno.”

¹⁷Iye adatawira mbati, “Ine nkhabe mamuna.” Yesu adatawira mbati, “Walonga pyadidi, pyalonga iwe kuti iwe nkhabe mamuna.

¹⁸Iwe wasembwa na amuna ashanu, pontho mamuna ana iwe chinchino si wako ene tayu. Iwe walonga pyakuonadi.”

¹⁹Mkazi ule adalonga mbati, “Mbuya, ndaona kuti ndimwe mprofeti.

²⁰Makolo anga akhapembedza Mulungu paphiriyi, mbwenye imwe Ayuda mumbalonga kuti Yerusalemu ndi mbuto yakuthema kupembedza Mulungu.”

²¹Yesu adalonga kuna iye mbati, “Mkaziwe khulupira pinalonga inepi kuti ndzidzi unafika wakuti anthu anapembedza Baba Mulungu nee paphiriyi penu mu Yerusalemu tayu.

²²Imwe Asamaria nkhabe dziwa anapembedza imwe tayu, mbwenye ife Ayuda timbadziwa ambapembedza ife, thangwi chipulumuso chikubulukira kuna Ayuda.

²³Mbwenye ndzidzi ukudza, pontho wakwana kale, wakuti anthu akupembedza mwakuonadi anapembedza Baba na mphamvu za Mzimu Wakuchena pontho mwakumdziwa chadi-chadi. Baba ambafuna anthu ninga enewa kuti ampembedze.

²⁴Mulungu ndi Mzimu, tenepo anyakupembedzache athema kumpembedza na mphamvu za Mzimu wache Wakuchena pontho mwakumdziwa chadi-chadi.”

²⁵Mkazi ule adalonga kuna iye mbati, “Ndikupidziwa kuti Mesia (nyakuchemerwa Khristu ule) anati abwere, tenepo iye angabwera anatipanga pyonsene.”

²⁶Yesu adampanga mbati, “Analonga na iweyu ndiye ene.”

²⁷Pandzidzi wenewo anyakufunza a Yesu adabwerera mbadodoma pyakwanga kuona kuti iye akhalonga na mkazi. Mbwenye nee mbodzi wa iwo adalonga chinthu kuna mkazi tayu kuti, “Unafunanji?” penu kuvunza Yesu kuti, “Pyatani kuti mulonge na mkaziyu?”

²⁸Tenepo mkazi ule adasiya nkhali yache penepo mbabwerera muluwani mbakalonga kuna anthu mbati,

²⁹“Tendeni mukaone munthu ule adandipanga pyonsene pene pikhachita ine. Ayi weneyu si Khristu tayu?”

³⁰Tenepo anthu adabuluka muluwanimo mbaenda kuna Yesu.

³¹Na ndzidzi onthowo anyakufunzache akhampempha mbati, “Mfunzisi kwatani pyakudya mudye!”

³²Mbwenye Yesu adatawira mbati, “Ine ndina pyakudya pyakuti imwe nee munapidziwa tayu!”

³³Tenepo anyakufunzache adatoma kuvunzana okha ene mbati, “Kani padadza unango dzampasa pyakudya?”

³⁴Yesu adaapanga mbati, “Pyakudya pyanga nkhuchita pinafuna adandituma ule, pontho kumalisa basa idandipasa iye kuti ndiphate.

³⁵Imwe anthu mumbalonga kuti, ‘Pasala miyezi minayi kuti ndzidzi wakuvuna ukwane.’ Mbwenye ndikukupangani kuti muyang'ane mwadidi m'mindamu; mbewu zatokota kale kwasala nkhuvuna!

³⁶Nyakuvuna atoma kale kupagalwi, tenepo iye akututa pinthu kwenda napyo kumoyo okhonda mala, towera nyakupibzala na nyakupivuna ene atsanzayire pabodzi.

³⁷Anthu ambalonga pyakuonadi angalonga kuti, ‘Nyakubzala ngunango, nyakuvuna ngunangombo.’

³⁸Ndakutumani kuti mukavune kuminda kudakhonda imwe phatako basa kule, tenepo imwe mwaganyali na basa idaphata anthu anango.”

³⁹Asamaria azinji muluwani mule adakhulupira Yesu thangwi ya umboni udachitira mkazi ule kuti, “Iye adandipanga pyonsene pikhachita ine.”

⁴⁰Tenepo pidadza Asamaria ale kuna Yesu, adampempha kuti akhale nawo kweneko. Natenepo Yesu adakhala kweneko nsiku ziwiri.

⁴¹Anthu azinji ene adakhulupira thangwi ya mafala a Yesu.

⁴²Iwo adalonga kuna mkazi ule mbati, “Chinchino takhulupira, nee na thangwi ya pinthu pyatipanga iwe tayu, mbwenye na thangwi yakuti tapiva tekha ene, pontho tadziwa kuti iye ndiyedi Nyankhombo wa dziko yapansi pano.”

⁴³Pidamala Yesu nsiku ziwiri kweneko, adabuluka mbaenda ku Galilea.

⁴⁴Yesu yekha ene mwenechiro akhadapilonga mbati, “Mprofeti nkhabe lemedzwa m'nthemba ya kwawo tayu.”

⁴⁵Pidafika iye mu Galilea, anthu kweneko adamtambira thangwi iwo akhadenda ku Phwando ya Paska ku Yerusalemu, tenepo iwo adaona pyonsene pikhadachita iye pa phwandopo.

⁴⁶Yesu adabwerera ku Kana mu Galilea, kukhadasandusa iye madzi kukhala vinyu kule. Thubu wa mfumu unango mwanache wamamuna akhadwala ku Kafaranao.

⁴⁷Pidava iye kuti Yesu akhadafika mu Galilea kubulukira ku Yudea, iye adenda mbakampempha kuti aende naye ku Kafaranao kawangisa mwanache thangwi mwanayo akhali chifupi kufa.

⁴⁸Yesu adalonga kuna iye mbati, “Nkhabe na mbodzi ene wa imwe anakhulupirave angakhonda ona pidzindikiro penu pyakudodomesa.”

⁴⁹Thubu ule adatawira mbati, “Mbuya, tendeni mwananga mbadzati kufa.”

⁵⁰Yesu adalonga kuna iye mbati, “Ndoko. Mwanako anakhala mwadidi.” Thubu ule adakhulupira mafala adalonga Yesu ale, tenepo iye adenda.

⁵¹Ali panjira kwenda kwawo adagumanikana na anyabasache, ale adampanga mbati, “Mwananu ali mwadidi!”

⁵²Tenepo iye adaavunza kuti penepyo pidachitika ndzidzi wanji. Anyabasache ale adatawira mbati, “Manungo amleka dzulo paora yakutoma na mawulo.”

⁵³Penepo babache mwana ule adakumbuka kuti ukhali ndzidzi onthowo ukhadampanga Yesu ule kuti, “Mwanako anakhala mwadidi.” Natenepo iye na banjache yonsene adamkhulupira Yesu.

⁵⁴Chenechi chikhali chidzindikiro chachiwiri chidachita Yesu pidadza iye ku Galilea kubulukira ku Yudea.