Read cisena YOHANI 5 Bible Online

YOHANI 5 - cisena bible

YOHANI 5

¹Kubuluka penepo Yesu adenda kuphwando inango ya Ayuda mu Yerusalemu.

²Chifupi na Msuwo wa Mabira mu Yerusalemumo mukhali thawale[7] yakuzungulirwa na makhonde mashanu; mu Chiheberi imbadziwika na dzina yakuti Betezada.[8]

³Mwinji ukulu wa atenda ukhagona m'makhondemo, maboli-boli, anyakulamala na anyamfutete.[9]

⁴

⁵Munthu unango ule akhadamala pyaka makumatatu na pisere kudwala, akhali penepo.

⁶Yesu adamuona akugona penepo, pontho adadziwa kuti munthuyo adadwala ndzidzi ukulu ene. Tenepo iye adamvunza mbati, “Ayi iwe unafuna kuwanga?”

⁷Mtenda ule adatawira mbati, “Mbuya, pano nkhabe unango wakundigwesera m'thawalemu tayu, ndzidzi onsene unavundulwa madzi. Ndingati ndigweremo, unango agweramo kale.”

⁸Yesu adalonga kuna iye mbati, “Lamuka, thukula bonde yako, ufambe!”

⁹Kabodzi kene mtenda ule adawangiratu; iye adathukula bonde yache mbatoma kufamba. Nsiku ikhachitika penepi ikhali Nsiku Yakupuma,

¹⁰tenepo akadamu a Chiyuda adapanga munthu adawangiswa ule mbati, “Lero ndi Nsiku Yakupuma, tenepo nkhudawira mwambo wathu kuti iwepo uthukule bonde yako.”

¹¹Iye adatawira mbati, “Munthu adandiwangisa ule adandipanga kuti ndithukule bonde yanga ndifambe.”

¹²Iwo adamvunza mbati, “Munthu wache adakupanga kuti uchite penepi mbani?”

¹³Mbwenye munthu akhadawangiswa ule, hakhamdziwa kuti Yesu akhali ani tayu, thangwi Yesu akhadapyanga pyache, podi penepo pakhali mwinji ukulu.

¹⁴Tenepo Yesu adagumana munthu akhadawangisa iye ule m'Nyumba ya Mulungu mbampanga mbati, “Yang'ana, iwe wawanga chinchino; tenepo leka kudawa gopesera pyakuipa kupiringana penepi pinakugwera.”

¹⁵Tenepo munthu ule adenda mbakapanga akadamu a Chiyuda kuti munthu akhadamuwangisa ule akhali Yesu.

¹⁶Natenepo iwo adatoma kuboneresa Yesu, thangwi iye akhachita pinthu penepi pa Nsiku Yakupuma.

¹⁷Yesu adaatawira mbati, “Babanga ndzidzi onsene ambaphata basa, tenepo ine ndathema kuchitambo chibodzi-bodzi.”

¹⁸Mafala enewa adachitisa akadamu a Chiyuda onsene kuti anyanyise kufuna pyakupha Yesu, nee na thangwi yakuti aswa mwambo wa Nsiku Yakupuma yokha tayu, mbwenye iye akhalonga pontho kuti Mulungu ndi babache, natenepo iye akhadapiikha sasawa na Mulungu.

¹⁹Yesu adaatawira mbati, “Ndikukupangani pyakuonadi kuti Mwana nkhabe chita pinthu payekha ene. Iye ambachita pyonthopyo pimbaona iye Babache kuchita. Pimbachita Baba, Mwanambo ambachita pyonthopyo.

²⁰Baba ambamfuna Mwana mbamuonesa pyonsene pimbachita iye ene. Iye anamuonesa pinthu pikulu pene kupiringana penepi pyakuti iye apiphate, tenepo monsene munadodoma napyo.

²¹Ninga mumbalamusira Baba anthu akufa mbaapasa moyo, montho-monthomo Mwana ambapasa moyo kuna ale ambafuna iye kuapasa.

²²Baba nkhabe tonga mseru munthu na mbodzi ene tayu, mbwenye iye adapereka utongi onsene kuna Mwanache kutonga mseru,

²³towera anthu onsene alemedze Mwana sasawambo ninga mumbalemedzera iwo Baba. Munthu anakhonda lemedza Mwanayo nkhabe lemedza Baba adamtuma ule.

²⁴“Ndikukupangani pyakuonadi kuti munthu anava mafalanga mbakhulupira nyakundituma ule, weneyo atambira moyo okhonda mala. Iye nkhabe dzakonwa, mbwenye abuluka kale kuimfa mbapita kumoyo.

²⁵Ndikukupangani pyakuonadi kuti ndzidzi ukudza, pontho wadza kale, wakuti anthu akufa anava fala ya Mwana Mulungu, tenepo anyakuvawo anakhala na moyo.

²⁶Ninga Baba ndi mwenechiro moyo, montho-monthomo iye achitisa kuti Mwanache akhalembo mwenechiro moyo.

²⁷Iye adapasa Mwanache utongi wakutongera nawo mseru, thangwi iye ndi Mwana Munthu.

²⁸Penepi pileke kukudodomesani; ndzidzi ukudza unafuna dzava anthu onsene akufa falache

²⁹mbalamuka kubulukira kumbuto zonsene zina iwo. Ale adachita udidi analamuka mbakhala na moyo, alembo adachita pyakudawika analamuka mbakoneswa.

³⁰“Ine nkhabe kwanisa chita chinthu na chibodzi chene tayu na utongi wanga ene; ine kwanga nkhutonga kwene mseru basi ninga mumbandipangira Mulungu, tenepo ine ndimbatonga na chilungamo, thangwi handimbateweza pyakufuna pyanga tayu, mbwenye pimbafuna nyakundituma ule.

³¹“Ine ndingapichitira ndekha umboni, pinalonga ine nee pinatawirwa ninga pyakuonadi tayu.

³²Mbwenye pana unango ambandichitira umboni, tenepo ndikupidziwa kuti umboni unandichitira iye ngwakuonadi.

³³Imwe mudatuma anyamphangwanu kuna Yohani, tenepo umboni udandichitira iye ukhali wakuonadi.

³⁴Si kuti ine ndikunyindira umboni wa munthu tayu, mbwenye ndikulonga kwene penepi, towera imwe mupulumuke.

³⁵Yohani akhali ninga nyale yakugaka pontho yakuonesa cheza, tenepo imwe mukhafuna kutsanzaya na cheza chachecho pandzidzi wakuchepa.

³⁶Mbwenye ine ene ndili nawo umboni ukulu wakupiringana Yohaniyo. Thangwi basa idandipasa Baba kuti ndimalise, basa inaphata ineyi, ikuonesa kuti Baba ndiye adandituma.

³⁷Baba, nyakundituma ule, ambandichitirambo umboni. Imwe chipo nee mudzati mwava falache penu kuona nkhope yache tayu,

³⁸pontho imwe nkhabe kukoya mphangwa zache mumtima mwanu, thangwi imwe nkhabe khulupira adatuma iye ule tayu.

³⁹Imwe mumbawerenga mwadidi Malemba, thangwi mumbanyerezera kuti munagumana moyo okhonda mala m'Malembamo. Malemba ontho-onthowa ambalonga pya ine!

⁴⁰Kwache imwe nkhabe funa kudza kuna ine tayu, towera mukhale na moyo chadi-chadi.

⁴¹“Ine nkhabe funa kusimbwa na anthu tayu.

⁴²Mbwenye ndimbakudziwani kuti imwe nkhabe funa Mulungu tayu mumtima mwanumo.

⁴³Ine ndadza na utongi wa Babanga, kwache imwe hamudanditambira tayu; pichitike kuti munthu unango adze na utongi wache ene, imwe munamtambira.

⁴⁴Imwe mumbafuna kusimbwa na anthu, mbwenye imwe nkhabe yesa kufuna kusimbwa na ule mbodzi ene ndi Mulungu tayu, apo imwe munakwanisa tani kundikhulupira?

⁴⁵Lekani nyerezera kuti ine ndinakupokanyani pamaso pa Babanga. Nyakukupokanyani ndi Mose, munthu akhanyindira imwe ule.

⁴⁶Ngakhala imwe mudakhulupiradi Mose, mbamudakhulupirambo ine, thangwi iye adalemba pya ine.

⁴⁷Podi imwe nkhabe khulupira tayu pidalemba iye, apo pinakwanisika tani kuti mukhulupire pinalonga inepi.”