Read cisena YOHANI 6 Bible Online

YOHANI 6 - cisena bible

YOHANI 6

¹Kubuluka penepo Yesu adawambuka nyanza ya Galilea (penu Tiberia dzinache inango).

²Mwinji ukulu udamtewera, thangwi akhadaona pidzindikiro pyache pyakuwangisa napyo atenda.

³Yesu adakwira paphiri mbakakhala pansi pabodzi na anyakufunzache.

⁴Ndzidzi wa Phwando ya Paska ukhali chifupi.

⁵Yesu adayang'ana-yang'ana mbaona mwinji ukulu ukudza kuna iye, tenepo iye adavunza Filipi mbati, “Nkhupi kunakwanisa ife kagula pyakudya kudyesa anthu onsenewa?”

⁶Iye adalonga tenepo kufuna kuyesa Filipi; mbwenye Yesu adadziwiratu chakuti achite.

⁷Filipi adatawira mbati, “Kuti anthu onsenewa abweze kwene mata, panafunika kobiri ninga zakupagalwi anyakuphata basa madzana mawiri pansiku ibodzi[10] zakugulira pyakudya.”

⁸Mbodzi wa anyakufunzache, dzinache Andrea, mbaleache Simoni Peturo, adalonga mbati,

⁹“Mphale unango pano ana mikate mishanu ya ufa wa barele na nsomba ziwiri. Kwache pinakwana tayu kudyesa anthu onsenewa.”

¹⁰Yesu adaapanga mbati, “Akhazikeni anthu pansi.” Mbutoyo ikhali yamaudzu pyakwanga. Tenepo anthu onsene ale adakhala pansi; kulengesa amunakulu okha akhali pikwi pishanu.

¹¹Yesu adakwata mikate ile mbapereka takhuta kuna Mulungu mbaigawaniza anthu adakhala pansi ale. Iye adachita chibodzi-bodzi kuna nsomba zile, tenepo anthu onsene adadya ninga mudafunira iwo.

¹²Pidamala khuta iwo onsene, Yesu adalonga kuna anyakufunzache mbati, “Gumanyani pyakusalirapi; tileke kupivunga.”

¹³Tenepo iwo adagumanya pyakusalirapyo mbadzaza pitundu khumi na piwiri na pa mikate mishanu ya barele ikhadadya anthu ale.

¹⁴Pidaona anthu chidzindikiro chidachita Yesuchi, iwo adalonga mbati, “Uyu ndi Mprofetidi adalongwa kuti anabwera padziko yapansi pano ule!”

¹⁵Yesu adapidziwa kuti iwo akhali chifupi dzamphata towera ampitise ufumu mwakumkhakhamiza, natenepo iye adabulukapo mbaenda pontho pyache paphiri kwa yekha ene.

¹⁶Pikhadoka kunja, anyakufunza a Yesu adatchithira kunyanza,

¹⁷mbapakira mwadiya kuwambuka nyanza kwenda ku Kafaranao. Mdima udagwa, Yesu hakhadadzati fika kuna iwo tayu.

¹⁸Tenepo chonzi chikulu chidagundika mbachivundula madziwo.

¹⁹Anyakufunzawo akhadenda kale pamadzi nsinzo mathanyo pikwi pishanu penu pitanthatu, pidaona iwo Yesu akufamba pamadzi, kudza chifupi na mwadiyawo, iwo adagoswera.

²⁰Yesu adaapanga mbati, “Lekani goswerwa, ndine pano!”

²¹Tenepo iwo adapifuna kuti Yesu apakire m'mwadiya. Kabodzi kene mwadiya udafika pamtunda pambuto pakhaenda iwo pale.

²²Mangwana mwache mwinji ukhadakhala kumtunda unango ya nyanza ule, udadzindikira kuti penepo pakhali mwadiya ubodzi ene basi. Iwo adapidziwa kuti Yesu hakhadenda pabodzi na anyakufunzache tayu, mbwenye kuti anyakufunzache akhadenda pyawo.

²³Miyadiya inango ikhadabulukira ku Tiberia ile, idatchama pagombe chifupi na mbuto ikhadadya mwinji mikate pidapereka Mbuya takhuta.

²⁴Pidaona mwinji kuti Yesu pabodzi na anyakufunzache hakhali penepo tayu, iwo adapakira m'miyadiyamo mbaenda ku Kafaranao kasaka Yesu.

²⁵Pidamgumana iwo kumtunda unango ya nyanza, iwo adalonga mbati, “Mfunzisi, mwafika lini kuno?”

²⁶Yesu adaatawira mbati, “Ndikukupangani pyakuonadi kuti imwe mukundisaka thangwi mudadya mikate mbamukhuta ninga mudafunira imwe, nee na thangwi yakuti imwe mwavesa pidzindikiro pyachita inepibi.

²⁷Lekani phata basa kuti mukhale na phoso ile inakwanisa kuvungika; mbwenye phatani basa kuti mukhale na phoso yokhonda vungika, yakupasa moyo okhonda mala. Phoso yeneyi njile inafuna dzakupasani Mwana Munthu, thangwi Baba Mulungu aikha chidzindikiro chache pana iye chakuonesa kuti iye akomerwa naye.”

²⁸Tenepo iwo adamvunza mbati, “Tinachita tani mphapo, towera tiphate mabasa anafuna Mulungu?”

²⁹Yesu adatawira mbati, “Basa inafuna Mulungu kuti imwe muphate njakuti mukhulupire adatuma iye ule.”

³⁰Iwo adatawira mbati, “Ntchanji chidzindikiro chinafuna imwe kuchita towera ife tione mbatikukhulupirani? Munachitanji?

³¹Makolo athu adadya mana m'thando yatchetcha, ninga munalongera Malemba kuti, ‘Iye adaapasa mikate yakubulukira kudzulu kuti adye.’ ”

³²Yesu adaapanga mbati, “Ndikukupangani pyakuonadi kuti udakupasani Mose hukhali mkate wakubulukira kudzulu tayu,[11] mbwenye Babanga ndiye ambakupasani mkate chadi-chadi kubulukira kudzulu.

³³Mkate umbapereka Mulungu ngule adatchitha kudzulu mbapasa moyo anthu a padziko yapansi.”

³⁴Iwo adalonga mbati, “Mbuya, tipasenimbo mkate wenewu ndzidzi onsene.”

³⁵Yesu adaapanga mbati, “Ine ndine mkate wakupasa moyo. Nyakudza kuna ineyo hanavave njala tayu. Munthu anandikhulupirayo hanakhalave na nyota tayu.

³⁶Mbwenye ndidakupangani kuti imwe mwandiona, kwache nee munandikhulupira tayu.

³⁷Onsene ambandipasa Babanga ale anati adze kuna ine, inembo nkhabe dzakhonda ale anadza kuna ine tayu,

³⁸thangwi ine handidatchitha kudzulu kudzachita kwene pinafuna ine tayu, mbwenye pinafuna nyakundituma ule.

³⁹Tenepo pinafuna nyakundituma ule, mphyakuti ndileke kutayapo na mbodzi ene pakati pa anthu onsene andipasa iye ale, mbwenye kuti pansiku yakumalisa onsenewo ndidzaalamuse kuimfa.

⁴⁰Thangwi pinafuna Babanga mphyakuti onsene anyakuona Mwanayo mbamkhulupira, akhale na moyo okhonda mala, tenepo ine ndinaalamusa kuimfa pansiku yakumalisa.”

⁴¹Penepo anthu adatoma kudungunya pya Yesu, thangwi iye adalonga mbati, “Ine ndine mkate udatchitha kudzulu ule.”

⁴²Tenepo iwo adalonga mbati, “Weneyu ndi Yesu, mwana Yosefe! Babache na mache timbaadziwa, apo akulonga tani kuti adatchitha kudzulu?”

⁴³Yesu adatawira mbati, “Lekani kudungunya pakati panu.

⁴⁴Nkhabe munthu anakwanisa kudza kuna ine ngakhala Baba, nyakundituma ule, hanamdzesa kuna ine tayu; tenepo ine ndinamulamusa kuimfa pansiku yakumalisa.

⁴⁵Maprofeti adalemba kuti, ‘Anthu onsene anafunziswa na Mulungu.’ Munthu ule ambava pimbalonga Baba mbafunza kubulukira kuna iye, weneyo ambadza kuna ine.

⁴⁶Nkhabe munthu na mbodzi ene aona Baba tayu; mbwenye nyakubulukira kuna Mulungu ule, ngweneyo ene aona Baba.

⁴⁷Ndikukupangani pyakuonadi kuti munthu anakhulupirayo ana moyo okhonda mala.

⁴⁸Ine ndine mkate wakupasa moyo.

⁴⁹Makolo anu adadya mana m'thando yatchetcha, kwache iwo adafa.

⁵⁰Mbwenye mkate wakutchitha kudzuluwu ngwenewo ene wakuti nyakuudyayo hanafa tayu.

⁵¹Ine ndine mkate wakupasa moyo udatchitha kudzulu ule. Munthu angadya mkate wenewu anakhala na moyo okhonda mala. Mkate unafuna ine dzampasa ndi manungo anga, ambapereka ine towera anthu a padziko yapansi akhale na moyo.”

⁵²Penepi pidalamusa mphoka ikulu pakati pa Ayudawo. Iwo adavunza mbati, “Pingakwanisike tani kuti munthu weneyu atipase manungo ache kuti tidye?”

⁵³Yesu adalonga kuna iwo mbati, “Ndikukupangani pyakuonadi kuti ngakhala imwe munakhonda kudya manungo a Mwana Munthu penu kumwa chiropa chache, nee munakhala na moyo chadi-chadi tayu.

⁵⁴Munthu anadya manungo anga na kumwa chiropa changayo ana moyo okhonda mala, tenepo ine ndinamulamusa kuimfa pansiku yakumalisa.

⁵⁵Thangwi manungo anga ntchakudya chadi-chadi, pontho chiropa changa ntchakumwa chadi-chadi.

⁵⁶Munthu anadya manungo anga na kumwa chiropa changa ule, ambakhala muna ine, inembo ndinakhala muna iye.

⁵⁷Baba wamoyo adandituma, tenepo na thangwi ya iye, inembo ndina moyo. Sasawambo munthu anandidyayo ana moyo thangwi ya ine pano.

⁵⁸Wenewu mphapo ndi mkate udatchitha kudzulu ule, si mkate ninga udadya makolo anu ule tayu, ale m'nduli mwache adafa. Munthu anadya mkate wenewu anakhala na moyo kwenda na kwenda.”

⁵⁹Yesu adalonga penepi pikhafunzisa iye m'nyumba yakupemphereramo mu Kafaranao.

⁶⁰Anyakumtewerache azinji adava penepi mbalonga mbati, “Chifunziso chenechi ntchakunensa pyakwanga, mbani anakwanisa kuchiteweza?”

⁶¹Na kukhonda pangwa Yesu adapidziwa kuti iwo akhadungunya penepi, tenepo iye adalonga kuna iwo mbati, “Kani penepi pyakuchitisani kutaya chikhulupiro chanu?

⁶²Mphapo ndi tani mungaona Mwana Munthu akukwira kubwerera kukhali iye kale?

⁶³Mzimu wa Mulungu ndiye ambapasa moyo; mphamvu za anthu nkhabeve basa tayu. Mafala alonga ine kuna imwewa ambakuchitisani kuti mukhale na Mzimu wa Mulungu, ule ambakupasani moyo.

⁶⁴Kwache anango pakati panupa hadakhulupire tayu.” Yesu adadziwiratu kubulukira pakutoma pene anthu anakhonda dzamkhulupira ale, pontho na nyakumpereka kuna anyamalwache ene.

⁶⁵Iye adathimiza kulonga mbati, “Ndi thangwi yache ndidakupangani kuti nkhabe munthu anakwanisa kudza kuna ine, ngakhala Baba hanamtawirisa kuchita tenepo.”

⁶⁶Na thangwi ya penepi anyakumtewerache azinji adabwerera pyawo mbakhonda kumtewera pontho.

⁶⁷Tenepo Yesu adavunza anyakufunza khumi na awiri ale mbati, “Apo imwe munafuna pyakwendambo pyanu?”

⁶⁸Simoni Peturo adamtawira mbati, “Mbuya, nkhwa ani pontho kunafuna ife kwenda? Podi ana mafala akupasa moyo okhonda mala ndimwe ene basi.

⁶⁹Chinchino ife takhulupira pontho tadziwa kuti imwe ndimwe Nyakuchena wakubulukira kuna Mulungu.”

⁷⁰Yesu adatawira mbati, “Ine ndidasankhula khumi na awirimwe, si tenepo tayu? Kwache mbodzi pakati panu ndi Satana!”

⁷¹Iye akhalonga Yudasi, mwana Simoni Iskarioti, thangwi ndiye akhafuna dzampereka kuna anyamalwache, podi kwene kuti iye akhali mbodzi wa anyakufunza khumi na awiri ale.