Read cisena YOHANI 7 Bible Online

YOHANI 7 - cisena bible

YOHANI 7

¹Kubuluka penepo Yesu adafamba mu Galilea; iye hadafune pyakufamba mu Yudea tayu, thangwi akadamu a Chiyuda akhafuna pyakumpha.

²Ndzidzi wa Phwando ya Misasa ya Ayuda ukhali chifupi,

³natenepo abale ache Yesu adalonga kuna iye mbati, “Bulukani kuno mbamuende ku Yudea, towera anyakukutewerani akaonembo pinthu pinachita imwepi.

⁴Munthu angafuna kuti aveke nkhabe bisa pimbachita iye tayu. Podi imwe mukuchita pinthu penepi pipangizeni mwekha ene kuna anthu onsene a padziko yapansi.”

⁵Podi na abale ache ene hadamkhulupire tayu.

⁶Yesu adalonga kuna iwo mbati, “Ndzidzi wanga wakuthema hudzati fika tayu, mbwenye ndzidzi onsene ngwakuthema kuna imwe.

⁷Anthu a padziko yapansi pano nkhabe kwanisa kukuzondani, mbwenye ambazonda ine pano, thangwi ndimbaapanga kuti makhaliro awo ngakudawika.

⁸Imwe ndokoni ku phwandoko. Ine nkhabe kwendako tayu,[12] thangwi ndzidzi wanga wakuthema hudzati fika tayu.”

⁹Pidamala iye longa penepi, adasalira pyache mu Galilea.

¹⁰Pikhadamala kwenda abale ache ku Phwando ya Misasa kule, iyembo adenda konthoko m'nduli mwawo. Iye hadende pakwecha tayu, mbwenye mwakubisika.

¹¹Akadamu a Chiyuda akhamsaka-saka pa phwandopo mbavunza mbati, “Iye ali kupi?”

¹²M'mwinjimo mukhalongwa chiwere-were pikulu pya Yesu; anthu anango akhalonga mbati, “Iye ndi munthu wadidi.” Anangombo akhalonga mbati, “Waa! Nkhabe, iye ambanyengeza anthu.”

¹³Mbwenye nkhabe mbodzi adalonga pya iye pakwecha tayu, thangwi iwo akhagopa akadamu a Chiyuda ale.

¹⁴Phwando ile ikhali kati na kati pidenda Yesu ku Nyumba ya Mulungu mbatoma kufunzisa.

¹⁵Akadamu a Chiyuda ale adadodoma pyakwanga mbalonga mbati, “Pyakwanisika tani kuti munthu weneyu adziwe pyonsenepi, podi iye hadafunze tayu?”

¹⁶Yesu adatawira mbati, “Pimbafunzisa inepi, si pyanga pyene tayu, mbwenye pimbabuluka kuna Mulungu nyakundituma ule.

¹⁷Munthu ule anafuna kuchita pinafuna Mulungu, anadziwa ngakhala pinafunzisa inepi mphyakubuluka kuna Mulungu penu mphyanga pyene.

¹⁸Munthu ule ambalonga na utongi wache ene ambayesa kupisakira demelero, mbwenye ule ambafuna demelero ya ule adamtuma ngwakulonga pyakuonadi, pontho muna iye nkhabe pinthu pyakunama.

¹⁹Mose adakupasani mwambo, si tenepo tayu? Mbwenye nkhabe mbodzi pakati panu ambavera mwambowo. Apo mwatani mukuyesa-yesa kuti mundiphe?”

²⁰Mwinji ule udatawira kuti, “Iwe una mzimu wakuipa. Mbani akuyesa-yesa kuti akuphe?”

²¹Yesu adatawira mbati, “Ine ndidachita chakudodomesa chibodzi, tenepo imwe monsene mudadodoma.

²²Mose adakutongani kuti mugwande ananu achimuna nsonga yachimuna (podi kwene kuti penepi adatoma napyo si Mose tayu, mbwenye makolo anu), tenepo imwe mumbagwanda basi ananu pa Nsiku Yakupuma.

²³Ngakhala mwana ambagwandwa nsonga yachimuna pa Nsiku Yakupuma, towera mwambo wa Mose uleke kuswiwa, apo mwatani mwandizhangalira thangwi ndawangisa munthu monsene mwene pa Nsiku Yakupuma?

²⁴Lekani tonga mseru pakuyang'ana nkhope, mbwenye tongani mwakulungama.”

²⁵Anthu anango a mu Yerusalemu adalonga mbati, “Ayi anayesa-yesa akadamu a Chiyuda kuti amphe ule, si weneyu tayu?

²⁶Yang'anani! Iye akulonga pakwecha, apo iwo nkhabe longa chinthu na chibodzi chene kuna iye tayu. Kani penepa ndiye kuti iwo apidziwadi kuti weneyu ndi Khristu?

²⁷Kwache tonsenefe tikudziwako kudabulukira munthuyu; Khristu angabwera, nkhabe munthu anamdziwa kunabulukira iye tayu.”

²⁸Pikhafunzisa Yesu m'Nyumba ya Mulungu, adalonga mwakugaluza fala mbati, “Kadi imwe mumbandidziwadi, pontho imwe mumbadziwako kudabulukira ine? Ine sidadza na utongi wanga ene tayu. Nyakundituma ule ngwakuonadi. Imwe nee mukumdziwa tayu,

²⁹mbwenye ine ndimbamdziwa, thangwi ndidabulukira kuna iye, pontho adandituma ndiye.”

³⁰Tenepo iwo adapiyesa kumphata, mbwenye nkhabe munthu na mbodzi ene adamkhuya, thangwi ndzidzi wache hukhadadzati fika tayu.

³¹Mbwenye anthu azinji m'mwinjimo adamkhulupira mbalonga mbati, “Ayi Khristu angabwera, anachita pidzindikiro pizinji kupiringana pyachita munthu weneyu?”

³²Afarisi adava chiwere-were chikhalonga mwinji ule pya Yesu, natenepo iwo pabodzi na a nyansembe akulu adatuma anyakulondali kamanga Yesu.

³³Yesu adalonga mbati, “Ndinati ndikhale namwe ndzidzi pang'ono mbandidzati kwenda kuna adandituma ule.

³⁴Imwe munandisaka-saka, kwache nee munandigumana tayu, thangwi imwe nkhabe kwanisa kwenda kunafuna ine kakhala.”

³⁵Akadamu a Chiyuda adalonga okha ene mbati, “Nkhupi kunafuna iye kwenda kwakuti ife tinachimwana kumgumana? Ayi kunafuna iye kwenda nkhu mizinda ya Agriki, kule kunakhala anthu athu anango mbakafunzisa Agrikiwo?

³⁶Iye akulonga kuti ife tinamsaka-saka, kwache nee tinamgumana tayu, pontho kuti ife nee tinakwanisa kwenda kunafuna kakhala iyeko tayu. Penepa anafuna kulonganji?”

³⁷Pansiku ikululetu yakumalisa ya Phwando Yesu adaimira mbalonga mwakugaluza fala mbati, “Munthu anava nyota mbadze kuna ine dzamwa.

³⁸Ninga munalongera Malemba kuti, ‘Munthu anakhulupira ineyo mikulo ya madzi akupasa moyo inakuka mumtima mwache.’ ”[13]

³⁹Penepo Yesu akhalonga pya Mzimu Wakuchena ule anafuna dzatambira anyakumkhulupira ale. Pandzidzi wenewo Mzimu Wakuchena hakhadadzati perekwa tayu, thangwi Yesu hakhadadzati tambira demelero tayu.

⁴⁰Anthu anango m'mwinjimo adamva Yesu akulonga penepi, natenepo iwo adalonga mbati, “Munthuyu ndi Mprofetidi!”

⁴¹Anangombo adalonga mbati, “Iye ndi Khristu!” Mbwenye anango adalonga mbati, “Khristu hanabulukira ku Galilea tayu!

⁴²Malemba akulonga kuti Khristu anakhala chidzukulu cha Davite, pontho anabalwa muluwani ya Betelehemu, luwani ikhakhala Davite ile.”

⁴³Tenepo pakhali magawikano pakati pa anthu m'mwinjimo, thangwi ya Yesu.

⁴⁴Anango akhafuna kumphata, mbwenye nee mbodzi adamkhuya tayu.

⁴⁵Pidabwerera anyakulondali ale, anyansembe akulu na Afarisi adaavunza mbati, “Mwatani mwakhonda kudza naye?”

⁴⁶Anyakulondali ale adatawira mbati, “Chipo nee munthu na mbodzi ene adzati longa ninga munthu weneyu tayu.”

⁴⁷Afarisi adaavunza mbati, “Kani imwembo akunyengezani?

⁴⁸Mbani mbodzi pakati pa Afarisi penu akadamu a Chiyuda adava imwe kuti adamkhulupira? Nkhabe!

⁴⁹Mwinjiwo nkhabe dziwa mwambo wa Mose tayu, natenepo iwo atembererwa na Mulungu!”

⁵⁰Mbodzi wa Afarisi penepo akhali Nikodemu, ule kale akhadenda kaonana na Yesu. Iye adalonga kuna anango ale mbati,

⁵¹“Ayi mwambo wathu umbatitawirisa kulonga kuti munthu akonwa tidzati kumva yekha ene kulonga penu kudziwa chachita iye?”

⁵²Iwo adatawira mbati, “Kani iwembo ndiwe wa ku Galilea? Kawerenge mwadidi Malemba unakagumana kuti nkhabe mprofeti ambabulukira[14] ku Galilea.” [

⁵³Penepo anthu ale adabwerera m'misa mwawo.