Read cisena YOHANI 8 Bible Online

YOHANI 8 - cisena bible

YOHANI 8

²Mangwana mwache m'makalakwecha Yesu adenda pontho ku Nyumba ya Mulungu. Anthu onsene adagumanyikana mbamzungulira, tenepo iye adakhala pansi mbatoma kuafunzisa.

³Afunzisi a mwambo na Afarisi adadza na mkazi akhadaphatwa na uputa ule, mbamuimirisa pamaso pa anthu onsene.

⁴Iwo adalonga kuna Yesu mbati, “Mfunzisi, mkaziyu aphatwa na uputa.

⁵Mwambo wa Mose umbatonga kuti mkazi ninga weneyu athema kuphiwa na miyala. Apo imwe munalonga tani?”

⁶Iwo adalonga penepi kufuna kumtapa Yesu m'kanwa, towera ampambizire napyo. Mbwenye Yesu adakotama mbalemba pansi na chala chache.

⁷Mukhathimiza iwo kumvunza, Yesu adayenuka mbalonga kuna iwo mbati, “Ngakhala pakati panupa pana munthu ule chipo hadadawe tayu, weneyo athema ndiye kutoma kuponyera mkaziyu miyala.”

⁸Tenepo iye adakotama pontho mbalemba pyache pansi.

⁹Pidava iwo penepi, mbodzi na mbodzi adatoma kubulukapo; adatoma kubulukapo mbakulu ene. Yesu adasala yekha na mkaziyo aimira penepo.

¹⁰Yesu adayenuka mbalonga kuna mkazi ule mbati, “Anthu ale amala kwenda kupi? Mphapo, nkhabe mbodzi asala funa kulonga kuti wathema kuphiwa?”

¹¹Iye adatawira mbati, “Nkhabepo, Mfunzisi.” Yesu adalonga mbati, “Ine sinalongambo tayu kuti iwe wathema kuphiwa. Ndoko pyako, kwache leka kadawa pontho.”][15]

¹²Yesu adalonga pontho kuna Afarisi ale mbati, “Ine ndine cheza cha dziko yapansi. Munthu ananditewerayo anakhala na cheza cha moyo, tenepo iye nkhabeve dzafamba mumdima tayu.”

¹³Afarisi ale adalonga kuna iye mbati, “Chinchino iwe ukupichitira wekha ene umboni, pinalonga iwepi si pyamaso tayu.”

¹⁴Yesu adatawira mbati, “Nkhabe! Podi kwene kuti ndimbapichitira ndekha umboni, pinalonga inepi mphyakuonadi, thangwi ndikudziwa kudabulukira ine, pontho na kunaenda ine kwene. Mbwenye imwe nkhabe dziwa kudabulukira ine na kunaenda ine kwene tayu.

¹⁵Imwe mumbatonga mseru pakuteweza manyerezero a anthu; mbwenye ine nkhabe tonga munthu na mbodzi ene tayu.

¹⁶Mbwenye mbandidafuna kutonga, kutonga kwangako mbakudakhala na chilungamo, thangwi ine nee ndili ndekha tayu, Baba adandituma ule ali pabodzi na ine.

¹⁷Pyalembwa m'mwambo mwanu kuti ngakhala umboni uwiri waphatizana, ndiye kuti pinalonga iwopyo mphyakuonadi.

¹⁸Ine ndimbapichitira ndekha ene umboni, pontho Babanga adandituma ule ambandichitirambo umboni.”

¹⁹Iwo adamvunza mbati, “Babako ali kupi?” Yesu adatawira mbati, “Imwe nkhabe dziwa ine penu Babanga. Imwe mbamudadziwa ine, mbamudadziwambo na Babanga ene.”

²⁰Yesu adalonga pyonsenepi pikhafunzisa iye m'Nyumba ya Mulungu, m'subi mule mukhali pyakuikhiramo kobiri. Mbwenye nee mbodzi adammanga tayu, thangwi ndzidzi wache hukhadadzati fika tayu.

²¹Yesu adalonga pontho mbati, “Ine ndinati ndiende, tenepo imwe munandisaka-saka, pontho munati mufe akudawa. Imwe nkhabe kwanisa kwenda kunaenda ineku tayu.”

²²Tenepo akadamu a Chiyuda adalonga mbati, “Iye alonga kuti ife nkhabe kwanisa kwenda kunaenda iye. Ayi penepi pikulonga kuti iye anapipha yekha ene?”

²³Yesu adatawira mbati, “Imwe ndimwe anthu a padziko yapansi pano, mbwenye ine ndidabulukira kudzulu. Imwe ndimwe anthu a padziko yapansi pano, mbwenye ine si ine wa pansi pano tayu.

²⁴Ndi thangwi yache ndidakupangani kuti imwe munafa akudawa. Imwe mungakhonda khulupira kuti, ‘Ine Ndine ene,’ munati mufe akudawa.”

²⁵Iwo adamvunza mbati, “Iwe ndiwe ani?” Yesu adatawira mbati, “Ndi montho mudakupangani ine pakutoma pale.[16]

²⁶Ine ndina pizinji pyakuti ndilonge pya imwe, pinthu pyakukwanisa kukutongani napyo mseru. Nyakundituma ule ngwakuonadi, tenepo ine ndimbapanga anthu a padziko yapansi pyava ine kubulukira kuna iye pile.”

²⁷Iwo hadavese tayu kuti Yesu akhaapanga pya Baba Mulungu.

²⁸Natenepo iye adalonga kuna iwo mbati, “Mungakwiza m'dzulu Mwana Munthu penepo munapidziwa kuti Ine Ndine ene, pontho kuti ine nkhabe chita pinthu pya ndekha tayu, mbwenye ndimbalonga pile pimbandipanga Babanga kuti ndipilonge.

²⁹Nyakundituma ali pabodzi na ine. Iye hadandisiye ndekha tayu, thangwi ndzidzi onsene ndimbachita pinthu pyakumkomera.”

³⁰Anthu azinji adava Yesu kulonga mafala enewa ale, adamkhulupira.

³¹Yesu adalonga kuna Ayuda adamkhulupira ale mbati, “Ngakhala imwe munavera chifunziso changachi, ndimwe anyakufunzangadi;

³²imwe munati mudziwe pyakuonadi, pontho pyakuonadipi pinakuchitisani kukhala mtumbe.”

³³Iwo adatawira mbati, “Ife ndife pidzukulu pya Abrahamu, tenepo chipo tidzati khala mabitchu a munthu na mbodzi ene tayu. Penepambo ukufuna kulonganji pinalonga iwe kuti, ‘munakhala mtumbe.’ ”

³⁴Yesu adalonga kuna iwo mbati, “Ndikukupangani pyakuonadi kuti munthu anachita pyakudawikayo ndi bitchu wa pyakudawapyo.

³⁵Bitchu hambakhala m'banja ndzidzi onsene tayu, mbwenye mwana wa m'banja ambakhala m'banja ndzidzi onsene.

³⁶Ngakhala Mwana anakuchitisani kukhala mtumbe, imwe munakhala mtumbe chadi-chadi.

³⁷Ndikupidziwa kuti ndimwe pidzukulu pya Abrahamu, kwache imwe mukuyesa-yesa kuti mundiphe, thangwi mukukhonda chifunziso changa.

³⁸Ine ndimbalonga pinthu pyaona ine kuna Babanga, mbwenye imwe mumbachita pinthu pimbakupangani babanu.”

³⁹Iwo adatawira mbati, “Ife babathu ndi Abrahamu.” Yesu adatawira mbati, “Mbamudakhala ndimwedi ana a Abrahamu, mbamudachitambo[17] ninga pikhachita iye.

⁴⁰Pyonsene pyachita ine nkhukukupangani pyakuonadi pidandipanga Mulungu, kwache imwe mukuyesa-yesa kuti mundiphe. Abrahamu hadachite pinthu ninga penepi tayu!

⁴¹Imwe mukuchita pimbachita babanu.” Iwo adatawira mbati, “Ife si ife ana a uputa tayu. Mulungu ndiye Babathu ene basi, tenepo ife ndife anachedi.”

⁴²Yesu adalonga kuna iwo mbati, “Mulungu mbadakhaladi Babanu, imwe mbamudandifuna, thangwi ine ndidabulukira kuna Mulungu, tenepo chinchino ndili pansi pano. Ine handidadze na utongi wanga ene tayu, mbwenye na utongi wa adandituma ule.

⁴³Mwatani munakhonda vesa pinalonga inepi? Thangwi yache njakuti imwe nkhabe kwanisa kuva mphangwa zangazi tayu.

⁴⁴Imwe ndimwe ana a Satana, tenepo mumbafuna kuteweza pikhumbo pya babanu Satanayo. Kubulukira pakutoma pene iye ambapha anthu, pontho chipo iye nkhabe ikhira kunduli pyakuonadi tayu, thangwi nkhabe pyakuonadi muna iye. Kulonga pyakunama nkhudya kwache, podi iye ngwakunama, pontho iye ndi mwenechiro pyakunama pyonsene.

⁴⁵Ndi thangwi yache ndingakupangani pyakuonadi imwe nkhabe kundikhulupira tayu.

⁴⁶Mbani pakati panupa anakwanisa kuonesa kuti ndachita pyakudawa? Ngakhala pimbalonga inepi mphyakuonadi, apo mumbatani kundikhulupira?

⁴⁷Ana a Mulungu ambava pimbalonga Mulungu. Imwe si imwe ana a Mulungu tayu, tenepo ndi thangwi yache imwe nee munati mumvesere tayu.”

⁴⁸Iwo adavunza Yesu mbati, “Ayi pinalonga ife kuti ndiwe Msamaria, pontho kuti una mzimu wakuipa, si pyakuonadi tayu?”

⁴⁹Yesu adatawira mbati, “Ine nkhabe mzimu wakuipa tayu. Ine ndimbalemedza Babanga, mbwenye imwe nkhabe kundilemedza tayu.

⁵⁰Ine nkhabe funa kupilemedza ndekha tayu, mbwenye alipo anafuna kuti ine ndilemedzwe, weneyu ngule anafuna kudzapitonga.

⁵¹Ndikukupangani pyakuonadi kuti munthu anavera chifunziso changayo, nkhabeve dzafa tayu.”

⁵²Iwo adalonga kuna iye mbati, “Chinchino tapidziwa ndipyodi kuti una mzimu wakuipa! Abrahamu adafa, maprofetimbo adafa, mbwenye ukulonga kuti munthu anavera chifunziso chako nkhabeve dzafa tayu.

⁵³Kadi iwe ukufuna kulonga kuti ndiwe wamkulu kupiringana babathu Abrahamu? Iye adafa, maprofetimbo adafa, apo ukunyerezera kuti ndiwe animbo iwe?”

⁵⁴Yesu adatawira mbati, “Ine mbandidafuna kupilemedza ndekha ene, kupilemedza kwangaku mbakudakhala kwapezi. Nyakundilemedza ndi Babanga, weneyu ngontho ule adalonga imwe kuti ndi Mulungu wanu.

⁵⁵Chipo imwe nkhabe kumdziwa tayu, mbwenye ine ndimbamdziwa. Mbidalonga kuti ndikumdziwa tayu, mbidakhalambo wakunama ninga imwepo. Mbwenye ine ndimbamdziwa, tenepo ndimbavera pimbandipanga iye.

⁵⁶Babanu Abrahamu adakomerwa na ndzidzi ukhafuna iye kuona kudza kwanga; tenepo iye adauonadi mbakomerwa.”

⁵⁷Iwo adalonga kuna iye mbati, “Pyaka pyako hapidadzati fika na makumashanu ene tayu, apo Abrahamu udamuona[18] tani?”

⁵⁸Yesu adalonga kuna iwo mbati, “Ndikukupangani pyakuonadi kuti Abrahamu mbadzati balwa ine ndikhalipo kale!”

⁵⁹Tenepo iwo adalokota miyala kuti amponyere, mbwenye Yesu adaabisalikira mbabuluka m'Nyumba ya Mulungu ile.