Read cisena YOHANI 9 Bible Online

YOHANI 9 - cisena bible

YOHANI 9

¹Pikhafamba Yesu, adaona munthu wakubalwa na uboli-boli.

²Anyakufunzache adamvunza mbati, “Mfunzisi, penepa adadawa mbani kuti munthuyu abalwe boli-boli? Adadawa ndiye ene, penu makolo ache?”

³Yesu adatawira mbati, “Uboli-boli wachewu si kuti ndiye adadawa penu makolo ache tayu. Penepi pyachitika towera Mulungu aonese mphamvu zache pakumuwangisa.

⁴Kunja mbakuli masikati tathema kuphata basa ya nyakundituma; mosiku ukudza wakuti nkhabe munthu anakwanisave phata basa tayu.

⁵Ndzidzi una ine pansi pano, ndine cheza cha anthu onsene a padziko yapansi pano.”

⁶Pidamala Yesu kulonga penepi, adaphula mata pansi mbakhophola matope amatache mbamyedera nawo maso a boli-boli ule

⁷mbalonga mbati, “Ndoko kasambe nkhope pathawale ya Siloamu” (Siloamu nkhulonga kuti “Kutumwa.”) Munthu ule adenda kasamba nkhope, tenepo adabwerera kwawo akuona.

⁸Atsanthembache na anthu akhadamuona akupemphesa mwenemo mbali boli-boli ale, adavunza mbati, “Ayi munthu ule akhakhala pansi mbapemphesa si weneyu tayu?”

⁹Anango adalonga mbati, “Ande, ndiye ene.” Mbwenye anango adalonga mbati, “Nkhabe, si iye tayu; alila landana naye kwene.” Tenepo munthu ule adalonga yekha ene mbati, “Ndine pano.”

¹⁰Iwo adamvunza mbati, “Apo pyachitika tani kuti ukwanise kuona?”

¹¹Iye adatawira mbati, “Munthu unango dzinache Yesu, adakhophola matope pansi mbamyedera nawo maso anga mbandipanga kuti ndikasambe nkhope kuthawale ya Siloamu. Ine ndidendadi, sindzidzi ine nkhusamba nkhope, ndidakwanisa kuona.”

¹²Iwo adamvunza mbati, “Iye ali kupi?” Iye adatawira mbati, “Sinadziwako tayu.”

¹³Tenepo iwo adenda na munthu akhali boli-boli ule kuna Afarisi.

¹⁴Nsiku idakhophola Yesu matope kuwangisa nawo munthu ule ikhali Nsiku Yakupuma.

¹⁵Afarisi ale adamvunzambo munthu ule kuti pidachitika tani kuti iye akwanise kuona. Iye adaapanga mbati, “Iye adamyedera matope m'maso mwanga. Ndidasamba nkhope, tenepo ndikukwanisa kuona.”

¹⁶Afarisi anango adalonga mbati, “Munthu achita penepiyi hangakhale wakubulukira kuna Mulungu tayu, thangwi iye nkhabe teweza mwambo wa Nsiku Yakupuma.” Mbwenye anango adalonga mbati, “Pinakwanisika tani kuti munthu wakudawa achite pidzindikiro ninga penepi?” Tenepo iwo adagawikana.

¹⁷Tenepo Afarisi ale adavunza pontho munthu ule mbati, “Iwe ukulonga kuti iye adachitisa kuti ukwanise kuona, apo unatipanga tani pya munthu weneyu?” Munthu ule adatawira mbati, “Munthuyu ndi mprofeti.”

¹⁸Akadamu a Chiyuda ale hadakhulupire tayu kuti munthu ule akhali boli-boli, pontho kuti chinchino akhakwanisa kuona, kufikirana iwo adachemeresa makolo ache

¹⁹mbaavunza mbati, “Kadi ushu ndi mwananu? Imwe mukulonga kuti adabalwa okhonda ona, apo pyachitika tani kuti iye chinchino akukwanisa kuona?”

²⁰Makolo ache adatawira mbati, “Ande, tikupidziwa kuti weneyu ndi mwanathu, pontho kuti adabalwadi okhonda ona.

²¹Mbwenye ife nkhabe kupidziwa kuti pyachitika tani kuti iye akwanise kuona, pontho nkhabe dziwa munthu adamuwangisa. Mvunzeni. Iye ndi mkulu; anakwanisa kulonga yekha ene!”

²²Makolo ache adalonga penepi thangwi akhagopa akadamu a Chiyuda, ale akhadaverana kuti munthu angalonga kuti iye adakhulupira kuti Yesu ndi Khristu, anakhondeswa kupemphera nawo m'nyumba yakupemphereramo.

²³Ndi thangwi yache makolo ache adalonga mbati, “Mvunzeni; iye ndi mkulu!”

²⁴Penepo iwo adachemera pontho kachiwiri munthu adabalwa boli-boli mbalonga kuna iye mbati, “Dumbira pamaso pa Mulungu kuti unalonga pyakuonadi. Tikupidziwa kuti munthu akuwangisayu ngwakudawa.”

²⁵Munthu ule adatawira mbati, “Ine nkhabe kupidziwa ngakhala munthuyu ngwakudawa penu tayu. Mbwenye pinadziwa ine mphyakuti ine ndikhali boli-boli, apo chinchino ndikukwanisa kuona.”

²⁶Iwo adavunza mbati, “Iye adakuchitiranji, pontho adachita tani kuti ukwanise kuona?”

²⁷Iye adatawira mbati, “Ine ndakupangani kale, mbwenye imwe hamudavesera pidakupangani ine pile tayu. Pinafuna imwe kuva ninji pontho? Penu imwe munafunambo mukhale anyakufunzache?”

²⁸Penepo iwo adamlulupisa mbati, “Iwe ndiwe nyakufunza wa munthuyu. Ifetu ndife anyakufunza a Mose

²⁹Timbapidziwa kuti Mulungu adalonga kuna Mose, apo pya weneyu ife nkhabe kupidziwa na kudabulukira iye kwene tayu!”

³⁰Munthu ule adatawira mbati, “Penepitu mphyakudodomesa kuti imwe nkhabe dziwa kunabulukira iye tayu, mbwenye iye adachitisa kuti ndikwanise kuona!

³¹Ife timbapidziwa kuti Mulungu nkhabe kuva kupemphera kwa anthu akudawa tayu; iye ambava kupemphera kwa anthu ambamulemedza, pontho kuchita pimbafuna iye ale.

³²Kubulukira pakutoma padziko yapansi nkhabe mbodzi ava pya munthu wakuchitisa munthu wakubalwa na uboli-boli kuti akwanise kuona.

³³Ngakhala munthuyu hadabulukire kuna Mulungu tayu, iye mbadakwanisa kuchita chinthu na chibodzi chene tayu!”

³⁴Iwo adatawira mbati, “Iwe udabalwa wakudawa, pontho udakula wakudawa, apo lero ukufuna kutifunzisa?” Natenepo adambulusa m'nyumba yakupemphereramo.

³⁵Yesu adava kuti iye akhadabuluswa m'nyumba yakupemphereramo, tenepo pidamgumana iye, adamvunza mbati, “Ayi iwe umbakhulupira Mwana Munthu?”

³⁶Munthu ule adatawira mbati, “Mbuya, ngandipangeni Mwana Munthu weneyu mbani, towera ndimkhulupire!”

³⁷Yesu adampanga mbati, “Iwe wamuona kale, ndiye ene analonga na iwe chinchinoyu.”

³⁸Munthu ule adagodama pamaso pa Yesu mbalonga mbati, “Mbuya, ndimbakhulupira.”

³⁹Yesu adalonga mbati, “Ine ndadza padziko yapansi pano dzagawa pawiri, maboli-boli asanduke akuona, pontho anyakuona asanduke maboli-boli.”

⁴⁰Afarisi anango akhali penepo pabodzi naye ale adamva akulonga penepi mbamvunza mbati, “Kadi iwe ufuna kulonga kuti na ife enembo ndife maboli-boli?”

⁴¹Yesu adaatawira mbati, “Imwe mbamudakhala maboli-boli, nee mbamudakhala akudawa tayu; podi chinchino mukulonga kuti mukukwanisa kuona, ndi thangwi yache ndimwe akudawa basi.”