Read cisena MABASA 1 Bible Online

MABASA 1 - cisena bible

MABASA 1

¹Kuna Teofilo: M'bukhu mwanga yakutoma ndidakulemberani pinthu pyonsene pile pidaphata Yesu na kupifunzisa kutomera pandzidzi wa basache

²kufikirana nsiku idakwatwa iye kwenda kudzulu. Mbadzati kwatwa, Yesu, na mphamvu za Mzimu Wakuchena, adapanga anyakutumwa akhadasankhula iye ale pyakuti aphate.

³Pidamala nyatwa zache, Yesu adaonekera kuna iwo kazinji kene nsiku makumanayi mbaapangizadi kuti akhali na moyo. Iwo adamuona, tenepo iye adalonga nawo pya Ufumu wa Mulungu.

⁴Pidagumanyikana iwo pabodzi[1] Yesu adaapanga mbati, “Lekani buluka ku Yerusalemu, mbwenye dikhirani mtukwa udakupangani ine, mtukwa udadumbira Babanga kuti anakupasani ule.

⁵Yohani adabatiza na madzi, mbwenye nsiku pang'ono munati mubatizwe na Mzimu Wakuchena.”

⁶Pidagumanyikana anyakutumwa pabodzi na Yesu adamvunza mbati, “Mbuya, pandzidzi uno munabwezera pontho ufumu kuna anthu a ku Israele?”

⁷Yesu adalonga kuna iwo mbati, “Babanga adaikha na utongi wache ene ndzidzi wakuti pinthu pyonsenepi pidzachitike, tenepo imwe nkhabe funika kudziwa tayu.

⁸Mbwenye Mzimu Wakuchena angadza pana imwe, munatambira mphamvu mbamukhala mboni zanga mu Yerusalemu, mu Yudea monsene na mu Samaria na kufikirana madolomero a dziko yapansi.”

⁹Pidamala iye kulonga mafala enewa, adakwatwa kwenda kudzulu iwo mbali kumuyang'ana, tenepo adabisika na makole.

¹⁰Anyakutumwa mbali kuyang'anisisa kudzulu tenepo, mwenemo iye akwenda, vumbu-vumbu amuna awiri akuvala nguwo zakuchena adaimira m'khundu mwawo

¹¹mbavunza mbati, “Imwe anthu a ku Galilea, mwatani munaimira pano mbamuyang'ana kudzulu? Yesuyu, akwatwa kubuluka kuna imwe mbaenda kudzulu ule, anabwera pontho sasawa ninga mudamuonera imwe kwenda kudzulu.”

¹²Penepo anyakutumwa adabwerera ku Yerusalemu kubulukira kuphiri ya Olivi. Nsinzo wache unakwana mathanyo chikwi chibodzi kubulukira ku Yerusalemu.

¹³Pidapita iwo mumzinda adakwira subi yapadzulu mukhakhala iwo mule. Akhalimo Peturo, Yohani, Yakobo na Andrea; Filipi na Tomasi; Batolomeo na Mateo; Yakobo mwana Alufeo; Simoni, mbodzi wa Ayuda wakufuna kudzesa utumbe kudziko ya Israele; na Yudasi mwana Yakobo.

¹⁴Na manyerezero abodzi ene iwo akhagumanyikana kupemphera ndzidzi onsene, pabodzi pene na akazi anango na Maria mache Yesu pontho na abale ache.

¹⁵Pidagwanda nsiku pang'ono Peturo adaimira pakati pa anyakukhulupira. Penepo pakhali anthu ninga dzana na makumawiri. Iye adalonga mbati,

¹⁶“Abale anga, pidathema kuti Malemba akwane-kwane pya pinthu pidafuna kuchitika kuna Yudasi, ninga mudalongera Mzimu Wakuchena kudzera muna Davite. Yudasiyu adapangiza anthu njira yakuphatira Yesu.

¹⁷Iye akhali mbodzi wa ife, mbasankhulwa kuphata basa pabodzi na ife.”

¹⁸Iye adagula munda na kobiri zikhadatambira iye thangwi ya pyakudawa pikhadachita iye. Penepo adagwa pansi chamsolo mbafa, mbatumbuka pakati, matumbo ache mbakhuthuka.

¹⁹Anthu onsene a ku Yerusalemu adapiva, natenepo adauthula mundawo dzina yakuti “Akeledama,” kweneko nkhulonga kuti “Munda wa Chiropa.”

²⁰Peturo adathimiza kulonga mbati, “Pyalembwa m'bukhu ya Masalimo kuti, ‘Nyumbache mbisanduke madembe; nee mbodzi akhalemo.’ Pyalembwa pontho kuti, ‘Munthu unango mbatambire basache.’

²¹“Natenepo panafunika unango akhalembo mboni pabodzi na ife yakuti Mbuya Yesu adalamuka kuimfa. Akhale mbodzi wa ale akhali pabodzi na ife ndzidzi onsene ukhafamba ife na Mbuya Yesu, kutomera mudabatizwa iye na Yohani,[2] kufikirana nsiku idakwatwa Yesu kwenda kudzulu.”

²³Natenepo adasankhula amuna awiri, Yosefe ule akhathulwa Basaba (wakudziwika pontho na dzina yakuti Yusito) na Matiasi.

²⁴Penepo adapemphera mbati, “Mbuya, imwe mumbadziwa mtima wa munthu onsene, mphapo tionesenimbo ngupi mwa awiriwa asankhula imwe,

²⁵towera atambire basa ya unyakutumwa m'mbuto mwa Yudasi ule adaisiya mbaenda kumbuto yakumthemera.”

²⁶Penepo iwo adachita ntsango, tenepo nyakusankhulwa akhali Matiasi, mbathimizira gulu ya anyakutumwa khumi na mbodzi ale.