Read cisena MABASA 10 Bible Online

MABASA 10 - cisena bible

MABASA 10

¹Muluwani ya Kesarea mukhali munthu unango, dzinache Konelio, ule akhali mkadamu wa gulu ya anyankhondo ya Aroma yakuchemerwa “Gulu ya Italia.”

²Iye pabodzi na banjache yonsene akhali anthu akupembedza pontho akugopa Mulungu. Iyembo akhaphedza pyakwanga Ayuda akutcherenga, pontho akhapemphera kuna Mulungu pyakwanga.

³Nsiku inango paora yachitatu na mawulo iye adaona masomphenya. Iye adaona mwadidi mwene mngelo wa Mulungu akudza kuna iye mbalonga mbati, “Konelio!”

⁴Tenepo Konelio adayang'anisisa mngeloyo na mantha mbalonga mbati, “Ninji penepi, Mbuya?” Mngeloyo adatawira mbati, “Mulungu akomerwa na kupemphera kwako pontho na mabasako adidi. Tenepo iye asasanyika kukutawira.

⁵Apo tuma amuna anango ku Yopa kuti akachemere munthu unango, dzinache Simoni Peturo.

⁶Iye ndi mlendo kunyumba ya Simoni, nyakufukuta nthembe ambakhala m'khundu-khundu mwa bara ule.”

⁷Pidenda mngelo ule, Konelio adachemera awiri a anyabasache na nyankhondo mbodzi. Nyankhondoyo akhali munthu wakupembedza Mulungu, pontho mbodzi wa anyakumtumikira Konelio.

⁸Iye adaapanga pyonsene pikhadamchitikira, tenepo adaatuma ku Yopa.

⁹Mangwana mwache, pikhali iwo panjira kwenda chifupi na Yopa, na masikati Peturo adakwira pansoyi ya nyumba kapemphera.

¹⁰Iye akhali na njala mbafuna chinthu chakuti adye. Tenepo ndzidzi ukhaphikwa kudya iye adaona masomphenya.

¹¹Adaona kudzulu kwafunguka, pontho chinthu chinango chakuoneka ninga chinguwo chikulu chakuphatwa nkhomo zache zinayi chikutchithisirwa padziko yapansi.

¹²M'chinguwomo mukhali nyama za mtundu onsene; nyama za miyendo minayi, nyama zakukambadza pontho na mbalame.

¹³Tenepo fala idaveka kuti, “Peturo, lamuka. Ipha, udye!”

¹⁴Peturo adatawira mbati, “Waa, tayu, Mbuya! Thangwi na kale ene nee ndidzati ndadyabi pinthu pyokhonda chena pontho pyakunyansa.”

¹⁵Fala idaveka kachiwiri kache kuti, “Pinthu pidachenesa Mulungu, leka kupiyesa kuti mphyakunyansa.”

¹⁶Penepi pidachitika katatu. Tenepo, kabodzi na kabodzi chinguwocho chidakwatwa kubwerera kudzulu.

¹⁷Peturo mbali kunyerezera kuti masomphenya enewa akulonganji, amuna adatumwa na Konelio ale akhadadziwa pakhali nyumba ya Simoni pale. Tenepo akhaimira pamsuwo wa mpanda.

¹⁸Iwo adachemera mbavunza mbati, “Ayi kuna mlendombo kuno dzinache Simoni Peturo?”

¹⁹Pikhali Peturo m'kati kuyesa-yesa kuvesa kuti masomphenya akulonganji, Mzimu Wakuchena adalonga mbati, “Ngava kuno! Amuna atatu[12] ali kuno kusaka-saka iwepo.

²⁰Natenepo lamuka tchitha, pontho leka chita nthontho kwenda nawo, thangwi ndine ndaatuma.”

²¹Natenepo Peturo adenda kuna amuna ale mbalonga mbati, “Munthu anasaka-saka imwe ule, ndine pano. Apo, mwadzeranji?”

²²Tenepo iwo adatawira mbati, “Mkadamu Konelio atituma. Iye ndi munthu wadidi wakupembedza Mulungu pontho wakulemedzwa pikulu na Ayuda onsene. Mngelo wa Mulungu adampanga kuti akuchemerereni kumusa kwache, kuti iye akave pinafuna imwe kalonga.”

²³Tenepo Peturo adaachemera amunawo kuti apite m'nyumbamo, towera agone nsiku ibodzi ninga alendo ache. Mangwana mwache Peturo adalamuka mbaenda nawo pabodzi. Anyakukhulupira anango a ku Yopa adendambo naye pabodzi.

²⁴Mangwana mwache iye adafika ku Kesarea. Kweneko Konelio pabodzi na abale ache na ashamwali ache, akhadachemera iye ale, akhamdikhira.

²⁵Pikhachita Peturo piteni pamsuwo, Konelio adabwera kagumanikana naye. Tenepo iye adagwa pamanyalo a Peturo mbamulambira.

²⁶Mbwenye Peturo adamulamusa mbalonga mbati, “Lamukani! Ine ndine munthu ene pyanga ninga imwe!”

²⁷Peturo akhali m'kati kulonga na Konelio pikhapita iye m'nyumba, mule mudagumana iye anthu azinji agumanyikana.

²⁸Tenepo Peturo adalonga kuna iwo mbati, “Imwe mukupidziwa mwekha ene kuti nkhudawira mwambo kuti munthu wa Chiyuda afambire penu kuphatizana na anthu okhonda khala Ayuda. Mbwenye Mulungu andionesa kuti ndileke yesa munthu kuti ngwakukhonda chena na wakunyansa pamaso pa Mulungu.

²⁹Natenepo pidandichemera imwe, ine ndidadza mwakukhonda pokanya. Mphapo ndikuvunzeni ninji chidandichemerera imwe?”

³⁰Tenepo Konelio adalonga mbati, “Zikhali nsiku zitatu zapitazo, pandzidzi ninga onthowu ora yachitatu na mawulo, ine ndikhapemphera[13] m'nyumba mwanga. Vumbu-vumbu munthu wakuvala nguwo zakuyetimira adaimira patsogolo panga

³¹mbalonga mbati, ‘Konelio! Mulungu ava kupemphera kwako, pontho akumbuka mabasako adidi ambachita iwe kuna anyakutcherenga.

³²Tenepo tuma munthu ku Yopa kuti akachemere Simoni Peturo. Iye ndi mlendo kunyumba ya Simoni nyakufukuta nthembe, ule ambakhala m'khundu-khundu mwa bara.’

³³Natenepo ine ndidakutumirani mphangwa kabodzi na kabodzi. Tenepo imwe mwachita pyadidi kubwera. Tonsene tili pano pamaso pa Mulungu kudikhira kuti tivesere pyonsene pyakupangani Mbuya kuti mulonge.”

³⁴Tenepo Peturo adatoma kulonga mbati, “Chinchino ndapidziwa kuti ndimomwene kuti Mulungu nkhabe yang'ana nkhopebi,

³⁵mbwenye Mulungu ambatawirisa anthu a madzinza onsene ale ambamgopa na kuchita pinthu pyakulungama.

³⁶Imwe mukudziwa mphangwa zidatumiza Mulungu kuna anthu a ku Israele kuapanga Mphangwa Zadidi za mtendere kudzera muna Yesu Khristu, Mbuya wa anthu onsene ule.

³⁷Imwe mukudziwa pinthu pikulu pidachitika m'dziko ya Israele monsene, kutomera m'nthemba ya Galilea pidamala lalika Yohani kuti anthu abatizwe.

³⁸Imwe mukudziwa pya Yesu wa ku Nazareti pontho na mule mudakhuthulira Mulungu pana iye Mzimu Wakuchena pontho mphamvu. Iye adenda konsene kuchita udidi na kuwangisa onsene akhali pansi pa utongi wa Satana ale, thangwi Mulungu akhali naye.

³⁹Tenepo ife ndife mboni za pyonsene pidachita iye m'dziko ya Israele na mu Yerusalemu. Iwo adamupha pakumkhomera pamtanda,

⁴⁰mbwenye pidagwanda nsiku zitatu, Mulungu adamulamusa kuimfa mbamuonesa kuna anthu.

⁴¹Iye hadaoniwe na anthu onsene tayu, mbwenye adaoniwa na mboni zikhadasankhula Mulungu kale ene zile, na ife ale tidadya na kumwa naye pabodzi pidalamuka iye kuimfa.

⁴²Tenepo iye adatonga kuti tilalike Mphangwa Zadidi kuna anthu, pontho na kuchitira umboni kuti iye ngontho ule akhadasankhula Mulungu kukhala nyakutonga miseru anthu amoyo na akufa ene.

⁴³Maprofeti onsene adachitira umboni pya iye kuti munthu onsene anakhulupira muna iye, Mulungu analekerera pyakudawa pyache kudzera muna Yesu.”

⁴⁴Pikhali Peturo m'kati kulonga mafala enewa, Mzimu Wakuchena adatchitha pana anthu onsene, akhavesera mphangwa zache ale.

⁴⁵Tenepo anyakukhulupira a Chiyuda akhadadza pabodzi na Peturo kubulukira ku Yopa ale, adadodoma nakuti Mulungu adakhuthula mtukwache wa Mzimu Wakuchena pana anthu okhonda khala Ayuda ene.

⁴⁶Thangwi iwo adaava akulonga m'pilongero pyachilendo na kukuza ukulu wa Mulungu. Tenepo Peturo adalonga mbati,

⁴⁷“Anthu enewa atambira Mzimu Wakuchena ninga mudachitira ife. Mphapo pana munthu anafuna kuakhondesa batizwa na madzi?”

⁴⁸Natenepo Peturo adaatonga kuti abatizwe na dzina ya Yesu Khristu. Iwombo adapempha Peturo kuti akhale nawo pabodzi nsiku pang'ono.